បើសួរថាក្លឹបបាល់ទាត់នៅអឺរ៉ុបណាដែលសកម្មលើទីផ្សារដោះដូររដូវក្តៅសារនេះបំផុត? ចម្លើយប្រាកដជាមិនអាចគេចផុតពីក្លឹបបារាំង Paris Saint-Germain នោះទេ ដ្បិតអីទាំងការចាកចេញ ទាំងការទិញចូល រាប់មកទល់រសៀលថ្ងៃពុធគឺមិនក្រោម ១០ រូបឡើយ។
ឥឡូវយើងនិយាយតែការនាំចូលចំណូលថ្មីធំៗ តាំងពីអ្នកចាត់ការ តាំងពីតំបន់ការពារ ដល់ប្រយុទ្ធ ហើយ CTS Sports សូមច្របាច់រៀបចេញជាឈុត ១១ រូបរជ្ជកាលថ្មី ២០២៣/២៤ តាមរយៈការប្រើប្រាស់ប្រព័ន្ធ ៤-៣-៣ ដែលអ្នកចាត់ការសញ្ជាតិអេស្ប៉ាញនិយមយកមកប្រើប្រាស់៖
អ្នកចាំទី Gianluigi Donnarumma: មិនមានអ្វីគួរឲ្យសង្ស័យនោះទេ ខណៈដែលគុណភាពសង្រ្គោះបាល់របស់ដៃទីមួយសញ្ជាតិអ៊ីតាលី នៅបន្តធ្វើបានល្អ បើធៀបនឹងអ្នកឯទៀតដូចកីឡាករខ្ចីជើងឲ្យ Nottingham, Keylor Navas និងដៃទីពីរ Sergio Rico។
ខ្សែការពារកណ្តាល Milan Skriniar និង Lucas Hernandez: ជាចំណូលថ្មីទាំងព្រម ដែលក្លឹបស្ថិតក្នុងទីក្រុងប៉ារីសយកបានម្នាក់ ក្នុងលក្ខខណ្ឌឥតតម្លៃខ្លួនចេញពី Inter Milan ខណៈដែល Lucas ក្លឹបចាយអស់ ៤៥ លានអឺរ៉ូទៅឲ្យ Bayern Munich។ តាមបទពិសោធន៍កាន់ឆ្នាំលើទីលានរបស់ពួកគេ មិនពិបាកនោះទេសម្រាប់ Enrique ក្នុងការសម្រេចចិត្ត ដាក់ឲ្យចាប់ដៃគ្នានៅជញ្ជាំងកណ្តាល។
ខ្សែការពារស្លាបស្តាំ Achraf Hakimi និងស្លាបឆ្វេង Nuno Mendes: នេះជាកីឡាករបន្តមកពីរដូវកាលចាស់ ហើយផ្អែកតាមគុណភាពរបស់ពួកគេ ក៏មិនទាមទារត្រូវរកអ្នកជំនួស ជារួមល្អទាំងការពារ ល្អទាំងការឆ្មក់ម្តងម្កាលទៅតំបន់ស្លាបប្រយុទ្ធខាងលើ។
ខ្សែបម្រើការពារ Manuel Ugarte: យុវជនវ័យ ២២ ឆ្នាំ សញ្ជាតិអ៊ុយរុយហ្គាយ ត្រូវបាន PSG ចាយលុយដល់ ៦០ លានអឺរ៉ូថ្ពក់យកគេចេញពីក្លឹបព័រទុយហ្គាល់ Sporting CP។ បែបនេះក៏ជឿថា Enrique នឹងដាក់វត្តមានគេ ទៅក្នុងផែនការណ៍រដូវកាលថ្មី ក៏ជាចក្ខុវិស័យរបស់ក្លឹប ដែលចង់គាស់ចូលតំបន់ស្នូលថ្មីទាំងស្រុង។
ខ្សែបម្រើ Marco Verratti: ទោះមានអ្នកថ្មីល្អប៉ុណ្ណា ក៏ជឿថា PSG នឹងមិនអាចបោះបង់ ឬមើលរំលងកីឡាករកាន់ឆ្នាំសញ្ជាតិអ៊ីតាលីបានដែរ។ ដូច្នេះតំណែងរបស់គេ នៅបម្រើខាងលើ ក៏នៅតែមាន រួចអ្នកជម្រើសបន្តបន្ទាប់ រួមមាន Vitinha, Fabian Ruiz, Renato Sanches, និង Carlos Soler ជាដើម។
ខ្សែបម្រើ Kang-in Lee: នេះគឺជាបម្រើប្រយុទ្ធដែលជាទូទៅ PSG កម្រយក Role នេះចូលណាស់ តែជាមួយការមកដល់របស់គ្រូថ្មី ចំណាំរៀបប្រព័ន្ធសម្រុកទៅមុខខ្លាំងជាងការពារ អ៊ីចឹងការប្រើប្រាស់កីឡាករកូរ៉េខាងត្បូង គឺពិតជាតម្រូវការចាំបាច់។
ខ្សែប្រយុទ្ធស្លាបឆ្វេង Neymar Jr: បើទោះបី Julian Draxler ត្រលប់មកវិញ ក៏មិនរំពឹងអាចប្រជែងឈ្នះជម្រើសដំបូងជាមួយកីឡាករប្រេស៊ីលនោះដែរ។ វាបូកផ្សំ Neymar ជាសះស្បើយត្រៀមខ្លួនរួចរាល់ បន្ថែមនឹងទំនាក់ទំនងជិតដិតស្រាប់រវាងអតីតគ្រូនៅ Barcelona ផង អ៊ីចឹងតំបន់ប្រយុទ្ធខាងឆ្វេង ពិតណាស់នឹងធ្លាក់មកកីឡាករវ័យ ៣១ ឆ្នាំដដែល។
ខ្សែប្រយុទ្ធស្លាបស្តាំ Marco Asensio: នេះគឺជាអ្នកជំនួស Lionel Messi ដែលបានចាកចេញ ហើយ PSG យកមកមិនអស់លុយផ្ទេរសូម្បីមួយរៀល ចេញពីការផុតកុងត្រានៅ Real Madrid។
ខ្សែប្រយុទ្ធប្រអប់ Kylian Mbappe: បើមិនចាកចេញទៅណា ជាការពិតកីឡាករបារាំងក៏នឹងបន្តជាប់ជម្រើសដំបូងជាប់លាប់ដដែល ហើយអ្នកបន្ទាប់បន្សំតួរង តួជំនួសនៅតំណែងនេះ រួមមាន Mauro Icardi និងចំណូលថ្មីទើបយកបាន Hugo Ekitike៕
ប្រភព៖ បរទេស