ស្ថានភាពខ្សែការពារកណ្តាលវ័យ ៣០ ឆ្នាំ Harry Maguire ដែលទទួលបានការចាប់អារម្មណ៍ច្រើនពីបងប្អូនយើង នៅថ្ងៃនេះ CTS Sports នឹងធ្វើការប្រមែប្រមូលរឿងរ៉ាវគួរឲ្យចាប់អារម្មណ៍ទាំងអស់ ក៏ដូចជាផែនការណ៍សម្រេចចិត្តរបស់កីឡាករផ្ទាល់ ដូចគ្នានឹងគំនិតគិតឃើញរបស់ក្លឹប ហើយមានបញ្ហាអ្វីខ្លះ កំពុងរាំងស្ទះ។
ជាការពិតរំឭកថយក្រោយទៅខែសីហា ឆ្នាំ ២០១៩ ក្លឹបម្ចាស់ដី Old Trafford បានចាយលុយ ៨៧ លានអឺរ៉ូ ថ្ពក់យក Maguire ក្នុងតួលេខបំបែកកំណត់ត្រាចេញពី Leicester City ហើយល្អតែមួយឆ្នាំពីរ ដល់ចូលមក ២០២២/២០២៣ ក៏ស្រាប់តែបែកទម្រង់ ជាប់គាំងរបូតតំណែងជិតមួយរដូវកាលពេញ បន្ទាប់ការមកដល់នៃចំណូលថ្មី Lisandro Martinez ដូចគ្នានឹង Raphael Varane ហើយម្តងម្កាលទាល់ខ្លាំង Erik ten Hag ជាអ្នកចាត់ការ ស៊ូប្រើការពារស្លាប Luke Shaw បត់មកលេងកណ្តាលក៏មាន ជាជាងការប្រើប្រាស់ ប្រធានក្រុមសញ្ជាតិអង់គ្លេស។
ដូចបានចុះផ្សាយសព្វមួយដងតាមចចាមអារ៉ាមក្លឹបស្ថិតក្នុងទីក្រុង Manchester ពិតជាព្យាយាមចង់លក់ចេញ Maguire ក្នុងតម្លៃខាតពាក់កណ្តាលក៏ហ៊ាន នេះបានតែ ៤០ លានអឺរ៉ូក៏យកដែរ តែបញ្ហារាំងស្ទះ ទាស់ត្រង់ថា កត្តាប្រាក់ឈ្នួលរបស់កីឡាករ ពិបាកនឹងរកក្លឹបដទៃឲ្យព្រមទទួលយកណាស់។
ក៏ដោយសារដើមឡើយ Maguire ទទួលបានតែ ១៦០ ០០០ ផោន/សប្ដាហ៍ បន្ទាប់ក្លឹបធ្លាក់ទៅ Europa League ដល់ចូលរដូវកាលថ្មីឡើងទៅ Champions League វិញ តាមកិច្ចព្រមព្រៀងគឺត្រូវបន្ថែម ២០ ភាគរយ ទៅស្មើប្រាក់ឈ្នួលចាស់ គឺ ២០០ ០០០ ផោន។ ដូច្នេះបណ្ដាក្លឹបខាងមុខទាំងអស់ ដែលចង់បានកីឡាករកម្ពស់ ១,៩៤ ម៉ែត្រ ត្រូវចាយលុយយ៉ាងតូចមួយសប្តាហ៍ ២ ខ្ទាស់ធំនោះឯង។ រួចបើសួរថា មានក្លឹបណាខ្លះបានផ្សារភ្ជាប់ចចាមអារ៉ាមចង់បាន Maguire ក៏មិនតិចនោះដែរ នេះតាំងពី Juventus, AC Milan, AS Roma និង Tottenham Hotspur ជាដើម។
ចំពោះការចង់បានរបស់ក្លឹប គឺរៀបរាប់ចប់ហើយ នេះយើងមកស៊ីជម្រៅទឹកចិត្តកីឡាករ ពិតជាមិនចង់ចាកចេញទាល់តែសោះ ពោលព្យាយាមតស៊ូខិតខំអស់គ្រប់វិធី ដើម្បីចង់ទទួលបានតំណែងនៅជម្រើសដំបូងរបស់ខ្លួនត្រលប់មកវិញ។ ដូចបច្ចុប្បន្នភាព Maguire កំពុងដាក់ចិត្តហ្វឹកហាត់ខ្លាំងក្លាលើសកីឡាករដទៃ នេះមួយថ្ងៃដាក់កំហិតខ្លួនឯងឲ្យហ្វឹកហាត់ ៣ ពេល រួចបានអនុវត្តបន្តបន្ទាប់រយៈពេលជិត ៣ សប្តាហ៍មកហើយ។
គេកំពុងស្ថិតនៅទីលានហ្វឹកហាត់ក្នុងប្រទេសព័រទុយហ្គាល់ឯណោះ ជាមួយអតីតខ្សែការពារឆ្នើមព័រទុយហ្គាល់ ក៏ជា Legend មួយរូបរបស់ក្លឹបតោខៀវ Chelsea កីឡាករ Ricardo Carvalho។ កីឡាករថែមទាំងបានបង្ហោះរូបភាព ជាមួយសារដាក់ឆន្ទៈខ្ពស់បែបនេះថា៖ “គ្មានការកំណត់ គ្មានលេសអ្វីទាំងអស់” សំដៅទៅពេលវេលាហ្វឹកហាត់ ដែលមិនចង់ឈប់ទាល់តែសោះឡើយ។
យើងនឹងរង់ចាំមើលបន្តទៅទៀត អំពីការសម្រេចចិត្តរបស់អ្នកចាត់ការសញ្ជាតិហូឡង់លោក Ten Hag ដ្បិតអីរដូវកាលមុន គេឈរជើងត្រឹម ១៦ ប្រកួតនៅ Premier League មិនបានដល់ ៨០០ នាទីផង។ នេះអ្វីដែលអាចកត់សម្គាល់ដឹងមុន គឺតំណែងជាប្រធានក្រុម ប្រាកដណាស់នឹងមិនផ្តល់ឲ្យ Maguire តទៅទៀត ពោលនឹងបង្វែរផ្តល់ជូនខ្សែបម្រើ Bruno Fernandes ពេញលេញតែម្តង ចាប់ពីបើករដូវកាលថ្មី ២០២៣/២៤៕
ប្រភព៖ បរទេស
