មួយរយៈក្រោយកីឡាករល្អៗបានកើនឡើងតម្លៃខ្លួនខ្ពស់កប់ពពក ជាពិសេសយុវជនឆ្នើមដែលមានអាយុនៅខ្ចី ហើយសេសសល់កុងត្រារយៈពេលយូរ ជាមួយក្លឹបអាណាព្យាបាល។ ងាកមកក្នុងអត្ថបទនេះ CTS Sports សូមធ្វើការច្របាច់រៀបចេញជាឈុត ១១ រូប ប្រើប្រព័ន្ធ ៣-៣-៤ កំពុងមានហាងឆេងខ្ពស់បំផុត តាំងពីតំណែងអ្នកចាំទី ដល់ប្រយុទ្ធ ដោយផ្អែកតាមទិន្នន័យជាក់លាក់ចេញពីគេហទំព័រ TransferMarkt។ (បញ្ជាក់៖ ១ ផោន ស្មើ ១,២៧ ដុល្លារ)
អ្នកចាំទី Mike Maignan – ដៃស្អិតសញ្ជាតិបារាំង វ័យ ២៨ ឆ្នាំ របស់ក្លឹប AC Milan ជាអ្នកចាំទីកំពុងមានហាងឆេងខ្ពស់បំផុត ពោលដល់ទៅ ៣៩ លានផោន។ សព្វថ្ងៃទាំងនៅជម្រើសជាតិមាន់គក ក៏ Maignan រមែងជាប់ជម្រើសដំបូងផងដែរ។
ខ្សែការពារកណ្តាល Josko Gvardiol – កីឡាករដែលកំពុងមានដំណឹងល្ហិចល្ហៀង ត្រៀមផ្ទេរទៅក្លឹបមេឃខៀវ Manchester City សព្វថ្ងៃក្រោមការគ្រប់គ្រងរបស់ក្លឹបអាណាព្យាបាល RB Leipzig គេមានហាងឆេងថ្លៃខ្លួន ៦៤ លានផោន។
ខ្សែការពារកណ្តាល Matthijs de Ligt – ងាកមកសមាជិករបស់ក្លឹប Bayern Munich ឯណេះ ក៏ពុំបានធ្លាក់តម្លៃខ្លួននោះដែរ ព្រោះអីពេលចុងក្រោយកំពុងឈរជើងឲ្យក្លឹបឈ្នះជើងឯក Bundesliga ហើយហាងឆេងគឺស្មើ Gvardiol ពោល ៦៤ លានផោន។
ខ្សែការពារកណ្តាល Ruben Dias – ចំណែកកីឡាករទើបឈ្នះជើងឯក Champions League ជាមួយ Man City រាប់បានជាខ្សែការពារកណ្តាលមានហាងឆេងខ្ពស់បំផុត ដល់ទៅ ៦៩ លានផោនឯណោះ។
ខ្សែបម្រើ Jude Bellingham – ជាមួយកុងត្រាថ្មីសន្លាងនៅ Real Madrid ក៏រុញឲ្យអតីតសមាជិកក្លឹប Dortmund កាន់តែឡើងតម្លៃខ្លួន នេះមកដល់ ១០៣ លានផោន រាប់ជាកីឡាករលេងតំណែងស្នូលថ្លៃខ្ពស់ដាច់គេសព្វថ្ងៃ។
ខ្សែបម្រើ Phil Foden – ជាកីឡាកររបស់សំពៅមាសទៀតហើយ ដល់តែមកមើលតារាឆ្នើមសញ្ជាតិអង់គ្លេស ក៏មានហាងឆេង ៩៤ លានផោន តែបញ្ជាក់សមាជិកក្លឹបដឹកនាំដោយលោក Pep Guardiola នៅមានអ្នកថ្លៃជាងនេះ។
ខ្សែបម្រើ Jamal Musiala – អាយុទើប ២០ ឆ្នាំ បូកផ្សំសុពលភាពកុងត្រាសេសសល់ដល់ចុងខែមិថុនា ឆ្នាំ ២០២៦ ក៏រុញឲ្យហាងឆេងកីឡាករអាល្លឺម៉ង់ឡើងមកដល់ ៩៤ លានផោន។
ប្រយុទ្ធស្លាបស្តាំ Bukayo Saka – ដោយឡែកតារាឆ្នើមវ័យក្មេងរបស់ Arsenal ឯណេះ បើទោះបីខកខានការឈ្នះពាន Premier League តែកត្តាកុងត្រាវែងឆ្ងាយ លាយឡំទេពកោសល្យឥតអាចប្រកែកបាន នាំឲ្យតម្លៃខ្លួនឡើងដល់ ១០៣ លានផោន។
ប្រយុទ្ធស្លាបឆ្វេង Vinicius Jr – កីឡាករប្រេស៊ីលសព្វថ្ងៃ ហៅបានជាស្លាបប្រយុទ្ធកំពុងមានហាងឆេងខ្ពស់បំផុតហើយ ដល់ទៅ ១២៨ លានផោន។
ប្រយុទ្ធជួរមុខ Erling Haaland និង Kylian Mbappe – អ្នកទាំងពីរជាកីឡាករកំពុងមានហាងឆេងខ្ពស់ជាងកីឡាករណាៗទាំងអស់ក្នុងលោក ដល់ទៅ ១៥៤ លានផោន។ នេះយើងធ្វើការបូកសរុបបញ្ចូលគ្នា ឈុត ១១ រូប ដូចរៀបរាប់មានតម្លៃ ១ ០៦៦ លានផោន ឬចូលជិត ១ ៣៥៥ លានដុល្លារអាមេរិក៕
