គ្រូបង្វឹកថ្មីរបស់ Chelsea លោក Mauricio Pochettino ចង់នាំយកសុភមង្គលត្រឡប់ទៅកីឡដ្ឋាន Stamford Bridge ហើយមានបំណងចង់ឈ្នះពាន។
អ្នកចាត់ការសញ្ជាតិអាហ្សង់ទីនបានចូលកាន់តំណែងថ្មីរបស់គាត់នៅដើមខែកក្កដា ហើយធ្វើដំណើរទៅកាន់ភាគខាងលិចទីក្រុងឡុងដ៍ ចំពេលមាន ភាពច្របូកច្របល់នៅក្លឹប។
ក្រុមតោខៀវបានបញ្ចប់ក្នុងចំណាត់ថ្នាក់ទី១២ ក្នុងក្របខ័ណ្ឌ Premier League កាលពីរដូវកាលមុន ដោយលេងក្រោមអ្នកចាត់ការបួននាក់ផ្សេងគ្នា ដែលសុទ្ធតែមានការលំបាកក្នុងការរួមបញ្ចូលកីឡាករចំណូលថ្មីជិត ៦០០លានផោនទៅក្នុងក្រុម។
អតីតគ្រូបង្វឹកក្រុម Tottenham លោក Pochettino ឥឡូវនេះត្រូវបានប្រគល់ភារកិច្ចឱ្យនាំមកនូវការងើបឡើងនៃទម្រង់ និងលទ្ធផល ហើយត្រៀមខ្លួន សម្រាប់ការប្រកួតប្រជែងនៅខាងមុខ។
គាត់បាននិយាយនៅក្នុងបទសម្ភាសន៍ជាមួយក្លឹបថ្មីរបស់គាត់ដែលបានចេញផ្សាយនៅលើបណ្តាញសង្គមថា៖
“ខ្ញុំដឹងយ៉ាងច្បាស់ថា Chelsea គឺជាក្លឹបដ៏អស្ចារ្យបំផុតមួយនៅក្នុងពិភពលោក។ ពិតណាស់ វាងាយស្រួលសម្រាប់ពួកយើង ក្នុងការសម្រេច ចិត្តផ្លាស់មកទីនេះ។
ខ្ញុំគិតថាវាគួរឱ្យរំភើបសម្រាប់ពួកយើង ហើយពិតណាស់អ្វីដែលយើងចង់បានគឺការនាំមកនូវសុភមង្គលម្តងទៀត ដល់ក្លឹបបាល់ទាត់ ដ៏អស្ចារ្យ មួយនេះ ប្រឹងប្រែងធ្វើការ លេងតាមរបៀបដែលអាចឲ្យអ្នកគាំទ្រអាចរីករាយនឹងបាល់ទាត់”៕
