រដូវកាលមុនៗយើងសកម្មនឹងព័ត៌មានទីផ្សារដោះដូរនៅលីគកំពូលអឺរ៉ុប ដល់តែរដូវក្តៅ ២០២៣ នេះ បែរមកចាប់អារម្មណ៍ឥតល្ហែពាក់ព័ន្ធនឹងព័ត៌មាននៃការមកដល់របស់អ្នកនេះ របស់អ្នកនោះ ជាមួយក្របខ័ណ្ឌ Saudi Pro League របស់ប្រទេសអារ៉ាប៊ីសាអ៊ូឌីតទៅវិញ។
អត់ឲ្យចន្លោះថ្ងៃ ក្រឡេកមកចចាមអារ៉ាមនៅថ្ងៃនេះវិញ ក៏មានរឿងត្រូវជជែកផងដែរ សារនេះវេនអ្នកចាំទីទើបតែផុតកុងត្រាជាមួយក្លឹប Manchester United គឺកីឡាករអេស្ប៉ាញ David de Gea។ បុរសវ័យ ៣២ ឆ្នាំ ដែលមករួមរស់នៅ Old Trafford តាំងឆ្នាំ ២០១១ ទីបំផុតបានអស់សុពលភាព ក្លាយជា Free Agent លើទីផ្សារដោះដូរ ហើយគោលដៅក្នុងរ៉ាដាដំបូង ទំនងផ្ទេរទៅក្លឹបមានវត្តមានមិត្តចាស់ Cristiano Ronaldo គឺ Al Nassr។
ហេតុផល De Gea មិនជ្រើសយកការបន្តកុងត្រាថ្មី ក៏ដោយសារក្លឹបបិសាចក្រហម មិនអាចបន្តការផ្តល់ជូនប្រាក់ឈ្នួលខ្ពស់ដូចមុនសម្រាប់កីឡាករ ពោលបើចង់បន្ត គឺតម្រូវឲ្យកាត់ថ្លៃពលកម្មជាចាំបាច់។ អ៊ីចឹងព្រមព្រៀងទាំងសងខាង ការចែកផ្លូវក៏បានកើតឡើង រួចក្លឹបក៏បង្វែរទៅរកអ្នកជំនួសដូចដំណឹងជាមួយដៃស្អិត Inter កីឡាករ Andre Onana ជាដើម។
ជជែកបន្តអំពីរឿងរ៉ាវអតីតសមាជិកក្លឹប Atletico Madrid ក៏លេចលឺថាក្លឹប Al Nassr នឹងហ៊ានធានារ៉ាប់រងការផ្តល់ជូនប្រាក់ឈ្នួលដល់ទៅ ២៥០ ០០០ ផោន/សប្តាហ៍ រាប់ជាការផ្តល់ឲ្យខ្ពស់បំផុតមួយហើយសម្រាប់កីឡាករនៅល្បាក់អាយុប៉ុណ្ណេះ។
មិនទាន់ច្បាស់ការសម្រេចចិត្តរបស់អ្នកចាំទីសញ្ជាតិអេស្ប៉ាញ តែត្រឹមចង់ចែករំលែកទៅអ្នកគាំទ្រឲ្យបានដឹងថា បើមិនមានអ្វីប្រែប្រួល ទាក់ទិនការចាកចេញនៃសមាជិកក្លឹបនៅមជ្ឈិមបូព៌ាទេនោះ De Gea នឹងជាកីឡាករបរទេសគ្រប់ចំនួនកំណត់ចុងក្រោយហើយអាចមកចូលរួម។
ជាការពិតផ្សារភ្ជាប់នឹងព័ត៌មានដោះដូរទៅលីគអារ៉ាប៊ីសាអូឌីតដ៏សកម្ម ក៏កើតមានសំណួរពីអ្នកគាំទ្រចោទសួរមកកាន់ CTS SPORTS ដោយចង់ដឹងថា តើច្បាប់បាល់ទាត់នៅទីនោះ អាចអនុញ្ញាតឲ្យផ្ទេរចូលកីឡាករបរទេសប៉ុន្មានរូបទៅ ទើបបានក្លឹបមួយៗលឺតែចង់បានអ្នកចង់បានអ្នកនោះឥតឈប់?
ចម្លើយបើយើងរំឭកទៅច្បាប់ចាស់កាលរដូវកាល ២០១៦/១៧ ដើមឡើយនៅប្រទេសកាន់សាសនាឥស្លាមខាងលើ កំណត់ការផ្ទេរចូលកីឡាករបរទេសត្រឹម ៤ រូបប៉ុណ្ណោះ ហើយក៏ថែមមិនអនុញ្ញាតឲ្យចុះហត្ថលេខាយកអ្នកចាំទីបរទេសនោះដែរ។
ក៏ប៉ុន្តែក្រោយមកច្បាប់ខាងលើត្រូវបានផ្លាស់ប្តូរ ត្រង់អ្នកចាំទីក្រៅប្រទេសក៏អាចមកចូលរួមបាន ដូចករណីថ្មីថ្មោង Edouard Mendy ផ្ទេរទៅក្លឹប Al Hilal ហើយចំនួនកំណត់ដំឡើងពី ៤ មកដល់ ៨ រូប ជាតួលេខអស់ធំ។
ត្រង់ចំណុចនេះ ងាកទៅ Al Nassr កន្លងមកក៏ធ្លាប់ធ្វើការលក់ចេញកីឡាករភ្លាមៗផងដែរ ពេល Cristiano Ronaldo មកដល់ ដូចករណីលក់ខ្សែប្រយុទ្ធកាមេរូន Vincent Aboubakar។ ដោយឡែកសព្វថ្ងៃពួកគេមានកីឡាករបរទេស ៧ រូបហើយ ដូចអ្នកចាំទីកូឡុំប៊ី David Ospina, ខ្សែការពារកូឌីវ័រ Ghislain Konan, ខ្សែការពារកូរ៉េខាងត្បូង Jin-su Kim, ខ្សែបម្រើប្រេស៊ីល Talisca, ខ្សែបម្រើអាហ្សង់ទីន Pity Martinez, ខ្សែប្រយុទ្ធអ៊ូបេគីស្ថាន Jaloliddin Masharipov និងកំពូលខ្សែប្រយុទ្ធព័រទុយហ្គាល់ Cristiano Ronaldo ដូច្នេះអាចបន្ថែមចូលកីឡាករបរទេសត្រឹមមួយរូបទៀតប៉ុណ្ណោះ៕
ប្រភព៖ បរទេស