អាទិត្យមុនបង្ហោះសារសុំទោសអនាគតភរិយា ដល់តែថ្ងៃនេះផ្ទុះដំណឹងបែកក្រឡាឆាតទៅទាក់ទងនារីដទៃទៀតហើយ រឿងរ៉ាវរបស់ Neymar Jr មួយរយៈក្រោយមិនជាល្បីសកម្មភាពលើទីលាន តែរឿងអាស្រូវលើផ្លូវដទៃ ហាក់មានភាគបន្តបន្ទាប់អត់ចេះចប់។
តារាឆ្នើមរបស់ក្លឹប Paris Saint-Germain រំឭកទៅសម្រង់សម្តីលើ Instagram កាលពីអាទិត្យមុន បាននិយាយរៀបរាប់យ៉ាងកម្សត់បែបនេះ៖ “បងដឹងពីអារម្មណ៍ឈឺចាប់របស់អូន បងដឹងពីទំហំចិត្តដែលអូនត្រូវការបងប៉ុណ្ណា បងក៏ដូចគ្នា បងតែងតែចង់នៅក្បែរអូន នេះបងជ្រុលជាធ្វើខុសទៅហើយ បងពិតជាបានខុសចំពោះអូន”។
“បងស្រមៃមិនចេញទេ ការដែលត្រូវរស់ដោយគ្មានអូន គោលដៅរបស់យើង គឺផ្តល់ក្តីស្រលាញ់រួមគ្នាសម្រាប់កូនរបស់យើង ការស្រលាញ់របស់យើងនឹងរឹងមាំឡើង”។ បន្ទាប់ការបង្ហោះសារនេះហើយ ងាកទៅខាងមិត្តស្រី អាចថាជាអនាគតប្រពន្ធផង គឺ Bruna Biancardi ហាក់ស្ងប់ស្ងាត់ ស្តាប់ទៅប្រហែលជាទទួលយក លើកលែងកំហុសសម្រាប់អនាគតស្វាមី គិតថាមនុស្សប្រុសឯណាដែលថាមិនខូច តែដាក់កំហិត ៣ យ៉ាងឥតអាចប្រកែកបានគឺ ១) ហាមថើបមាត់ ២) ហាមប្រកូកប្រកាសទំនាក់ទំនងនោះសាធារណៈ ពោលឲ្យមហាជនដឹងលឺតែទំនាក់ខ្លួន ៣) ឡើងគ្រែតែត្រូវប្រើស្រោម។
ដល់តែថ្ងៃនេះ Neymar ផ្ទុះរឿងខូចខិលឆាតទៅញ៉ែងញ៉ងនារីដទៃទៀតហើយ ប៉ះសារនេះខាងស្រី គេចេញមកបង្ហោះ Screenshot ជាសាធារណៈតែម្តង ពោលគឺស្ទាយបែបអូសក្រឡាដំណាក់កាលដំបូង មិនទទួលបានលទ្ធផលសម្រេច។
នោះគឺប៉ះតារាម៉ូដែលប្រេស៊ីល Celeste Bright ដែលមានជាង ១ លាន Followers លើ Instagram តែចម្លែកត្រង់រសៀលថ្ងៃសុក្រនេះ គណនីរបស់នាងបែរជាត្រូវបានបាត់ចេញពីបណ្តាញសង្គមខាងលើទៅវិញ។
ទោះយ៉ាងណាមុននេះ នាងបានសរសេររៀបរាប់ អមនឹង Screenshot ដែលគណនីផ្លូវការខ្សែប្រយុទ្ធជម្រើសជាតិសាំបាបានប្រើ Emoji បក់ដៃ មកកាន់នាង៖ “ខ្ញុំអត់ដែលស្គាល់មនុស្សនេះពីមុនទេ ខ្ញុំហត់នឿយនឹងឃើញសាររបៀបហ្នឹងចេញពីបុរស ដែលមានប្រពន្ធ ឬមានមិត្តស្រីហើយណាស់ Neymar មិនមែនជាមនុស្សតែម្នាក់ទេ គឺមានច្រើននាក់ទៀត ខ្ញុំគិតថាមនុស្សស្រីគួរតែទទួលបានការគោរព ឲ្យតម្លៃខ្ពស់ បុរសៗអើយចូលធ្វើខ្លួនឲ្យល្អជាងនេះ ព្រោះពួកយើងជាមនុស្សស្រីសក្តិសមនឹងទទួលបានស្នេហាដែលល្អប្រសើរជាងនេះ”។
មកទល់ពេលចុងក្រោយ ទាំងគណនីខាងប្រុស Neymar និងខាងស្រី Bruna ក៏មិនមានការឆ្លើយតបអ្វីនោះដែរ ដ្បិតបើតាមដឹង កូនដំបូងក្នុងផ្ទៃរបស់នាង គ្រោងនឹងសម្រាលនៅរដូវក្តៅ ល្បាក់ប៉ុន្មានខែខាងមុខនេះហើយ។
ងាកទៅអាជីពរបស់កីឡាករជំនាញជើងស្តាំបន្តិច ហាក់មិនមានចម្លើយជ្រើសការចាកចេញពី PSG ផ្ទេរទៅខាងក្លឹបអ្នកមានអារ៉ាប៊ីសាអ៊ូឌីតអ្វីនោះទេ ពោលគឺបន្តលើកុងត្រាសេសសល់ដល់ចុងខែមិថុនា ឆ្នាំ ២០២៥។ ចំពោះកាលបរិច្ឆេទវិលចូលទីលាន អាចនៅសប្តាហ៍ទី ៣ ខែក្រោយ ចំប្រកួតមិត្តភាពទល់ក្លឹប Le Havre នៅទឹកដីបារាំងផ្ទាល់តែម្តង៕
ប្រភព៖ បរទេស