ខ្សែប្រយុទ្ធ Paulo Dybala របស់ក្រុម Juventus បានបដិសេធចំពោះរឿងដែលថាខ្លួនមានចិត្តចង់ចាកចេញទៅលេងឱ្យក្រុម Manchester United នារដូវកាលខាងមុខនេះ។
Man Utd ដាក់គោលដៅយក Dybala តាំងពីរដូវក្ដៅកន្លងទៅម្ល៉េះ ប៉ុន្តែមិនត្រូវគ្នារឿងតម្លៃជាមួយក្រុម Juventus ។ ដោយឡែកសម្រាប់សាមីខ្លួនវិញ ក៏បានឆ្លើយចំពោះរឿងនេះដែរថា ខ្លួនមិនមានចិត្តចង់ចាកចេញទៅណានៅឡើយទេ ព្រោះថាបច្ចុប្បន្ននេះសប្បាយចិត្តលេងឱ្យក្រុមនៅអ៊ីតាលី។
“ខ្ញុំមិនបានគិតពីទីផ្សារដោះដូរកីឡាករទេ។ បច្ចុប្បន្នខ្ញុំសប្បាយចិត្តនៅ Juventus ហើយកំពុងផ្តោតអារម្មណ៍ឈ្នះពានទាំងអស់នៅទីនេះ។ នៅ Juventus យើងតែងតែចង់ធ្វើឱ្យល្អបំផុត ហើយគោលដៅធំរបស់ក្លឹបគឺយក Champions League យើងនឹងប្រឹងប្រែងឱ្យខ្លាំងបំផុតនៅឆ្នាំនេះ ដើម្បីទទួលបានជោគជ័យ”។ សម្ដីរបស់ Dybala ៕ប្រភពDailyMail