មនុស្សយើងម្នាក់ៗមិនថាកំពុងបម្រើអាជីពការងារ ឬរបររកស៊ីអ្វីទេ តែងតែមានក្តីស្រមៃ មានគោលដៅក្នុងជីវិត ខ្លះបានដាំជាប់វាឡើងទៅក្នុងបេះដូង តាំងពីកាលនៅកុមារភាព។ ដោយឡែកងាកមកក្នុងពិភពបាល់ទាត់ឯណេះ ភាគតិចណាស់ដែលកីឡាករអាចតស៊ូ ស្ម័គ្រស្មោះ ដល់សម្រេចឈោងបានវត្តមានជាមួយក្លឹបក្នុងក្តីស្រមៃកាលពីនៅក្មេង ខ្លះទៅ កាលនៅក្មេងស្រលាញ់ផ្សេង ដល់តែធំឡើងស្រលាញ់ផ្សឹង។
CTS Sports បង្ហាញកីឡាករ ៥ រូប មាន ៤ រូបហើយ ដើររំលងក្តីស្រមៃខ្លួនឯង ហើយបានទៅចូលរួមនៅក្លឹបដទៃ ក្រោមហេតុផលផ្សេងៗពីគ្នា៖
៥) Khvicha Kvaratskhelia
ខ្សែប្រយុទ្ធវ័យ ២២ ឆ្នាំ កំពុងជាប់កុងត្រារយៈពេលយូរនៅក្លឹប Napoli តែជានិច្ចកាលបានអះអាងឥតលាក់លៀមថា ខ្លួនពិតជាស្រលាញ់ ពិតជាចង់ទៅចូលរួមនៅ Real Madrid ជាក្លឹបក្នុងក្តីស្រមៃអស់កាលជាយូរ។
ទោះជាយ៉ាងណាដោយសារហេតុផលរាំងស្ទះ ដូចកត្តាការចរចាមិនត្រូវរ៉ូវ និងមូលហេតុដែលប្រធានក្លឹប រួមទាំងឪពុកព្យាយាមចង់ឲ្យកីឡាករសញ្ជាតិហ្សកហ្សីទៅចូលរួមនៅ Barcelona ទើបសម្រេចឲ្យ Kvaratskhelia បន្តនៅក្លឹបអ៊ីតាលី ហើយត្រូវរង់ចាំមើលឱកាសល្អ ជាមួយការផ្ទេរទៅចូលរួមនៅអធិរាជស។
៤) Kylian Mbappe
ឃើញចចាមអារ៉ាមផ្សារភ្ជាប់ឥតល្ហែ ពាក់ព័ន្ធកីឡាករបារាំងនឹងក្លឹបស្ថិតក្នុងប្រទេសអេស្ប៉ាញ តិចច្រឡំទៅ ថា Mbappe កាលនៅតូចមានចិត្តចង់ទៅចូលរួមទីនោះ។ ជាការពិត ក្លឹបដែលគេស្រលាញ់កំឡុងពេលធំធាត់ មិនមែន PSG ហើយក៏កាន់តែមិនមែន Real Madrid ផ្ទុយទៅវិញគឺ AC Milan នៅប្រទេសអ៊ីតាលី។
ហេតុផលត្រង់ថា ខ្សែប្រយុទ្ធជំនាញជើងសងខាង បានមើលថែដោយម៉ែដោះជនជាតិអ៊ីតាលី ជាអ្នករស់នៅក្នុងទីក្រុង Milan ហើយរស់នៅជាមួយយូរទៅក៏ដាក់ចិត្ត ដាក់គំនិត គិតឃើញដូចគ្នា ថា AC Milan ជាក្លឹបដ៏ល្អមួយកាលនោះ។
៣) Jadon Sancho
អតីតកាលធ្លាប់ឈរជើងឲ្យ Man City បន្ទាប់មកធំធាត់សមត្ថភាពនៅ Dortmund មុនចូលរួមជាមួយ Man United ទល់សព្វថ្ងៃ តែក្លឹបក្នុងក្តីស្រមៃកាលនៅតូចរបស់ស្លាបប្រយុទ្ធសញ្ជាតិអង់គ្លេសគឺតោខៀវ Chelsea។ Sancho ធ្លាប់លើកឡើង៖ “វីរបុរសសញ្ជាតិអង់គ្លេសដែលខ្ញុំស្រលាញ់គឺ Frank Lampard ហើយតាំងពីតូចមក និយាយដោយស្មោះ ខ្ញុំជាអ្នកគាំទ្រ Chelsea”។
២) Vinicius Jr
នេះគឺជាកីឡាករតែម្នាក់គត់ ដែលបានដាក់ក្តីស្រមៃច្បាស់លាស់តាំងនៅតូច ហើយក៏ពេលនេះអាចសម្រេចវាបានផងដែរ។ Vinicius មានចិត្តស្រលាញ់ និងចង់មកចូលរួមជាមួយ Real Madrid តាំងពីដំបូងមក រួចក្តីស្រមៃរកបានគ្រាប់បាល់នៅ ‘El Clasico’ និងឈ្នះ Champions League គឺសម្រេចបានហើយ នៅឡើយតែការឈ្នះ World Cup មួយផ្សេងទៀត។
១) Jude Bellingham
អ្នកប្រហែលច្រឡំធំហើយ បើកំពុងគិតថា Bellingham កាលនៅក្មេងមានចិត្តចង់មកចូលរួមនៅ Real Madrid នោះ ផ្ទុយទៅវិញគឺជាក្លឹបគូប្រជែង Barcelona ឯណោះទេ។ កាលនៅរៀនថ្នាក់បឋមសិក្សា Bellingham ធ្លាប់ត្រូវបានគ្រូឲ្យបំពេញក្តីស្រមៃដូចបណ្តាសិស្សឯទៀត ហើយគេសរសេរថា៖ “ខ្ញុំចង់ក្លាយជាកីឡាករអាជីពមួយរូប ឲ្យក្លឹប Barcelona និងជម្រើសជាតិអង់គ្លេស”៕
ប្រភព៖ បរទេស
