និយាយអំពីចំណងស្នេហ៍រវាងតារាបាល់ទាត់ ជាទូទៅចូលមកដល់ល្បាក់វ័យ ៣០ ឆ្នាំ ភាគច្រើនបានចោលភាពខូចខិល រួចកែប្រែមកក្លាយជាស្វាមី ជាឪពុកពេញច្បាប់ ឬរាប់ថាបង្កើតគ្រួសារពេញលេញមួយបាត់ទៅហើយ ក៏ប៉ុន្តែករណីរបស់ Neymar Jr ហាក់មិនទាន់ត្រៀមលក្ខណៈទទួលយកជីវិតបែបនោះបានទាល់តែសោះ។
ដូចធ្លាប់បានដឹង ពីដើមឡើយខ្សែប្រយុទ្ធស្លាបសញ្ជាតិប្រេស៊ីលធ្លាប់មានកូនហៅប៉ា តាំងខ្លួននៅឈរជើងឲ្យ Barcelona ដោយគេមានឈ្មោះថា David Lucca da Silva Santos បច្ចុប្បន្នធំធាត់មានអាយុ ១១ ឆ្នាំ។ នេះជាកូនប្រុសដែល Neymar ផ្ញើក្នុងពោះមិត្តស្រីចាស់ Carolina Dantas ហើយមកទល់សព្វថ្ងៃ ត្រឹមរាប់អានគ្នាជាមិត្ត។
ងាកមកជីវិតស្នេហាច្បាស់ការរបស់កីឡាករក្លឹប PSG សព្វថ្ងៃនេះវិញ គឺមានទំនាក់ទំនងរវាងតារាម៉ូដែលសញ្ជាតិប្រេស៊ីល Bruna Biancardi ដែលបញ្ឆេះឡើងតាំងឆ្នាំ ២០២១ ហើយមកទល់ខែមេសា ឆ្នាំ ២០២៣ កន្លងទៅថ្មីថ្មោង បានប្រកាសដំណឹងមានបុត្រ ជាកូនប្រុសក្នុងពោះ ដ្បិតបើមិនទាន់ចូលរោងជ័យ ហៅគ្នាជាប្តីប្រពន្ធនៅឡើយ។
បើទោះបី Neymar និង Bruna តែងចែកចាយរូបភាពផ្អែមល្ហែមជាមួយគ្នា តែចចាមអារ៉ាមដូចការពិត នៅបន្តចុះផ្សាយឥតល្ហែពាក់ព័ន្ធនឹងភាពខូចខិលនៅខាងក្រៅរបស់កីឡាករជំនាញជើងស្តាំ ខ្លះទៅថា Neymar តែងឆាតញ៉ែញ៉ងស្រីៗជាច្រើនរាប់ភ្លេច ខ្លះទៅថា Neymar បានទៅស្កាត់ជួប Ex របស់គេនៅឯទឹកដីអាមេរិក គឺ Bruna Marquezine កាលពីពេលថ្មីថ្មោង។
ដោយឃើញការឈឺចាប់អស់នេះ ក៏នាំឲ្យមិត្តភក្តិជាច្រើនរបស់តារាស្រីមាន ៥ លាន Follower លើ Instagram រំអុកឲ្យនាង គួរតែសុំ Neymar ចែកផ្លូវទៅ ដ្បិតមិនខ្វះទេប្រុសក្នុងលោក ហេតុអ្វីនៅបន្តត្រាំត្រែង ផ្សាំភាពឈឺចាប់ ទាំងដឹងរឿងរ៉ាវអស់នោះទៅវិញ។
ក៏ស្រាប់តែមកទល់ថ្ងៃនេះ មានរបាយការណ៍ពីកាសែត Em Off ចុះផ្សាយ៖ “Neymar Jr បានព្រមព្រៀងលក្ខខណ្ឌពិសេសជាមួយមិត្តស្រី Bruna Biancardi”។ វាជាមូលហេតុនាំឲ្យចំណងស្នេហ៍របស់អ្នកទាំងពីរ អាចបន្តមកទល់ជាង ៣ ឆ្នាំ ដោយគ្មានការបែកបាក់។
ក្នុងលក្ខខណ្ឌទាំង ៣ នោះ ស្តាប់ទៅពិតជាចម្លែក ហើយមិនប្រាកដថាមានមនុស្សស្រីឯទៀត អាចធ្វើចិត្តបាន អាចអនុញ្ញាតឲ្យប្រុសដែលខ្លួនស្រលាញ់ទៅធ្វើរឿងបែបហ្នឹងកើតឡើយ។
១) Neymar អាចទៅញ៉ែស្រីខាងក្រោយដោយសេរី តែហាមប្រកូកប្រកាសជាសាធារណៈ ឬបើកចំហក្នុងសកម្មភាពណាមួយជាដាច់ខាត និងមិនអនុញ្ញាតឲ្យថើបមាត់គ្នា
២) Neymar អាចហៅស្រ្តីណាមួយឡើងគ្រែ ឬរួមភេទជាមួយនារីដទៃណាក៏បាន តែត្រូវប្រាកដ ១០០ ភាគរយ ថាបានប្រើប្រាស់ស្រោមអនាម័យ
៣) អាចធ្វើសកម្មភាពទាំងពីរខាងលើ តែត្រូវធានាថា មិនបោះបង់នាង [Biancardi] និងកូន រួចរក្សាការបង្ហាញជាសាធារណៈអំពីទំនាក់ទំនងជាធម្មតា
ចុងក្រោយផ្សារភ្ជាប់មកក្នុងអាជីពជាកីឡាករលើទីលានបន្តិច មួយរយៈចុងក្រោយជាមួយការលេងឲ្យក្លឹប សង្កេតឃើញ Neymar ហាក់ធ្លាក់ទម្រង់លេងជាខ្លាំង បូកផ្សំនឹងរបួសញាំញីផង សឹងតែនាំឲ្យគេបាត់ឈ្មោះចេញពីបញ្ជីកីឡាករកំពូល។ ដូចគ្នានឹងនៅជម្រើសជាតិក៏លែងសូវលេចវត្តមានតទៅទៀត ហើយថ្មីថ្មោងអាវលេខ ១១ ក៏ត្រូវបានជំនួសដោយរលកក្រោយ Rodrygo Goes៕
ប្រភព៖ បរទេស