កើតចេញក្នុងទ្រនំគ្រួសារក្រលំបាក រកព្រឹកខ្វះល្ងាច ជួនខ្លះដើរទៅបោសសំរាមតាមផ្លូវ ជួនខ្លះដើរទៅសុំអាហារគេ ដើម្បីតែចម្អែតក្រពះ ជារួម Cristiano Ronaldo ធ្លាប់បានហែលកាត់ការលំបាកឆ្អែតឆ្អន់អស់ហើយ រួចលោកក៏មិនចង់ធ្លាក់ទៅក្នុងជីវិតនោះម្តងទៀត កាន់តែមិនចង់ឲ្យក្រុមគ្រួសារ ជាពិសេសកូនៗ ជួបការលំបាកជាន់ដានចាស់ដូចជាកុមារភាពទីទាល់ក្ររបស់ខ្លួន។
មកទល់សព្វថ្ងៃនេះ បើទោះបីអាចកើបចំណូលរយលានពីអាជីពជាកីឡាករបាល់ទាត់ តែងាកទៅខាងក្រៅទីលាន អតីតក្មេងប្រុសកើតលើដីកោះ Madeira ប្រទេសព័រទុយហ្គាល់ ពិតជាបានខិតខំទាំងយប់ថ្ងៃ ជ្រៀតខ្លួនចូលទៅក្នុងអាជីវកម្មខាងក្រៅបន្ថែម ហើយបើយើងមិនរាប់ប្រភពលុយទទួលបានពីការផ្សព្វផ្សាយ លុយចេញពីចំណូលនៃការបើកសណ្ឋាគារ ទៀតសោតយីហោបង្កើតឡើងដោយបុរសវ័យ ៣៨ ឆ្នាំ ពេលនេះ បានលេចរូបរាងជាមួយផលិតផល ៥ ប្រភេទ កំពុងចរាចរចែកចាយទូទាំងសកលលោក៖
៥) ខោទ្រនាប់ CR7
វាជាផលិតផលដំបូងដែល Ronaldo បានចេញលក់ទៅលើទីផ្សារ ក្នុងឆ្នាំ ២០១៣។ រចនាបថសម្គាល់ម៉ាកយីហោ ក៏មិនខុសពីផលិតផលដទៃ នេះបានដាំជាប់ពាក្យ “CR7” ទៅវ័ណ្ឌជុំវិញចង្កេះ ហើយវាមានតម្លៃជា Set ជាប់ពី ២៥ ទៅ ៥០ ដុល្លារ។
៤) ស្បែកជើង CR7
‘Cristiano Ronaldo Footwear’ ជាយីហោស្បែកជើងដែលបានបង្កើតឡើងនៅឆ្នាំ ២០១៤ ហើយមានរោងចក្រផលិតក្នុងប្រទេសព័រទុយហ្គាល់ផ្ទាល់តែម្តង។ វាមានច្រើនជម្រើស ច្រើនតម្លៃ ខណៈមួយម៉ូដែលដូចបង្ហាញក្នុងរូប គឺថ្លៃប្រមាណជិត ១១០ ដុល្លារ។
៣) ទឹកអប់ CR7
សុទ្ធតែជារបស់ដែលមនុស្សប្រុសខ្វះមិនបាន នេះរំលងចូលឆ្នាំបន្ទាប់ ២០១៥ ល្បាក់លោកនៅឈរជើងឲ្យក្លឹប Real Madrid គឺបានបញ្ចេញការលក់ទឹកអប់ជាច្រើនក្លិន ច្រើនប្រភេទ ជាមួយតម្លៃចាប់ពីជាង ២០ ទៅដល់ ៦០ ដុល្លារ។
ជាមួយផលិតផលទីបីនេះ គឺហាក់ផ្ទុះការគាំទ្រខ្លាំង ដោយឃើញបងប្អូនទាំងនៅប៉ែកអាស៊ី អឺរ៉ុប អាមេរិកខាងជើងក៏និយមទិញប្រើជាបន្តបន្ទាប់ផងដែរ តាមរយៈការចែកចាយទៅតាមបណ្តាហាងតូចធំជាច្រើនពាន់កន្លែង។
២) វ៉ែនតា CR7
មានទាំងប្រភេទពាក់យកម៉ូតធម្មតា ប្រភេទការពារចំណាំងពីពន្លឺព្រះអាទិត្យ ដោយអាជីវកម្មដាក់លក់វ៉ែនតាផ្តើមឡើងនៅល្បាក់ឆ្នាំ ២០២០។ គ្រប់ម៉ូតគ្រប់ប្រភេទ បើអ្នកមើលពីចម្ងាយនឹងមិនចាប់អារម្មណ៍ទេ តែបើយកមកមើលឲ្យជិត គឺសុទ្ធសឹងមានដាំជាប់លេខ ‘7’ ជាសញ្ញាសម្គាល់យីហោ។ ចំពោះតម្លៃរបស់វា មានចាប់ពីចន្លោះ ១០០ ទៅជាង ២០០ ដុល្លារអាមេរិក។
១) ទឹករ៉ែធម្មជាតិ URSU
ទើបតែផលិតផលចុងក្រោយនេះ ដែលមិនប្រើប្រាស់ឈ្មោះ CR7 ឬមានលេខ 7 តែបែរដាក់ជាលេខ ៩ សម្គាល់ទៅលើនោះវិញ។ ការអះអាងខ្លះ ថាមកពីលេខ ៩ ចង់រំឭកដល់លេខអាវចាស់របស់លោកកាលនៅ Real Madrid ខ្លះថាជាលេខតំណាងដល់កម្រិត pH ស្មើនឹងតួលេខនៃជាតិអាល់កាឡាំង គឺសំដៅដល់ទឹករ៉ែធម្មជាតិនោះឯង។
ចំពោះតម្លៃទឹកទទួលទានខាងលើ លក់លើទីផ្សារនៅប្រទេសអេស្ប៉ាញ មួយដបចន្លោះពី ០,៧៥ ទៅ ០,៨៥ ដុល្លារ មានប្រភេទ ៥០០ មីលីលីត្រ និង ១,៥ លីត្រ។
សរុបមក យើងចាប់អារម្មណ៍ត្រង់គ្រប់ផលិតផលទាំងអស់ដូចបានរៀបរាប់ខាងលើ CR7 មិនហត់នឹងជួលតារាណា ឬមានចាត់តាំង BA ណា មកផ្សព្វផ្សាយឲ្យឡើយ ផ្ទុយទៅវិញលក់ខ្លួនឯង ធ្វើទីផ្សារខ្លួនឯង កើបលុយចូលហោប៉ៅខ្លួនឯង ជារួមគឺពេញលក្ខណៈមួយចប់។ ចុះសម្រាប់បងប្អូនយើងវិញ ចំណោមផលិតផលទាំងអស់ តើធ្លាប់បានប្រើប្រាស់ផលិតផលណាខ្លះហើយរបស់ Ronaldo បើមានជួយផ្ញើរូបតាមប្រអប់ Comment ខាងក្រោមវីដេអូផង៕
ប្រភព៖ បរទេស
