បន្ទាប់អស់ភារកិច្ចជាមួយក្លឹបនៅរដូវកាលទើបតែបញ្ចប់ ក្រោយរបូតតំណែងជើងឯក Champions League ក្រោមថ្វីជើង Man CITY ឥឡូវ Romelu Lukaku ក៏ត្រូវបន្តមកចូលរួមជួយជម្រើសជាតិបែលហ្សិកវិញម្តង នៅវគ្គជម្រុះបឋម EURO 2024។
យ៉ាងណារឿងហេតុសម្រាប់អតីតសមាជិកក្លឹប Man United ហាក់មិនចប់ទាល់តែសោះ ដោយជាការពិត គ្រប់គ្នាបានដឹង អំពីកំហុសដែល Lukaku បានធ្វេសប្រហែសកាលលេងឲ្យ Inter Milan ឥឡូវចូលមកដំណើរការកំពុងជួយបែលហ្សិក ក៏ស្រាប់កើតមានរឿងរ៉ាវធ្វើស៊ីផ្លូវចិត្តកីឡាករ ២ ផ្ទួនៗគ្នាក្នុងពេលតែមួយ៖
២) Guardiola ផ្លែផ្កាពាក្យសម្តីទៅ Lukaku
អ្នកចាត់ការលោក Pep Guardiola ជាមួយការឈ្នះពាន ៣/រដូវកាល ឲ្យសំពៅមាសសារនេះ លោកហាក់សប្បាយរីករាយជាពន់ពេក ព្រោះវាកៀកនឹងឈ្នះគ្រប់យ៉ាងអស់ទៅហើយជូនក្លឹប ដ្បិត UCL ជាពាន City មិនធ្លាប់បានកាន់ទាល់តែសោះក្នុងប្រវត្តិសាស្រ្ត។
កន្លងផុតជិត ១០ ថ្ងៃ ក៏ស្រាប់កំពូលគ្រូសញ្ជាតិអេស្ប៉ាញ បានចេញមកផ្ដល់បទសម្ភាសន៍លាយឡំពាក្យពេចន៍ឌឺដងទៅខ្សែប្រយុទ្ធនៃក្លឹប Inter ថែមទៀតផង។ បុរសវ័យ ៥២ ឆ្នាំ ប្រាប់សារព័ត៌មាន Marca យ៉ាងដូច្នោះ៖ “ចូរអ្នករាល់គ្នាផ្តល់ពេលវេលាសម្រាប់ Xavi បន្តិចទៀត [នៅ Barcelona] នេះក្រឡេកមកពួកយើង គឺទាមទារពេល ៨ ឆ្នាំឯណោះ ដើម្បីឲ្យ City បានឈ្នះ Champions League”។
លោកបន្ត៖ “ខ្ញុំជាម្ចាស់ជើងឯកអឺរ៉ុប ក៏ដោយសារតែខ្សែប្រយុទ្ធខាងក្រុមគេខកខានការតែតបាល់ចម្ងាយមិនដល់ ៣ ម៉ែត្របញ្ចូលទី”។ អត្ថន័យនេះចង់សំដៅដល់សាច់បាល់ត្រង់កីឡាកររបស់ Inter លើកចូលប្រអប់ ហើយព្យាយាមតែតបញ្ជូនតចេញពី Robin Gosens មកកាន់ Lukaku ដល់តែកីឡាករបែលហ្សិក បែរតែតផ្ចុចដីទៅប៉ះនឹងជើងរបស់អ្នកចាំទី Ederson ពោលអ្នកចាំទីប្រេស៊ីល មិនពិបាកក្នុងការសង្រ្គោះឡើយ បើទោះបីបាល់នោះចម្ងាយតែប៉ុន្មានម៉ែត្រពីបង្គោលទី។
១) Courtois អន់ចិត្តរឿងស្លាកប្រធានក្រុម
មុននេះប៉ុន្មានថ្ងៃជម្រើសជាតិបែលហ្សិក បានបញ្ចប់លទ្ធផលស្មើទល់អូទ្រីស ១-១ នៅវគ្គជម្រុះបឋមជុំទី ៣ ពានរង្វាន់ EURO។ យ៉ាងណាក្នុងប្រកួតនោះ ឃើញមានការផ្លាស់ប្តូរតំណែងប្រធានក្រុម បន្ទាប់តែ Kevin de Bruyne របួស ហើយត្រូវសម្រាកដល់ខែកញ្ញា។ ជាលទ្ធផលអ្នកចាត់ការលោក Domenico Tedesco បានផ្តល់ស្លាកប្រធានក្រុម ទៅឲ្យ Lukaku ហើយចំពោះការសម្រេចចិត្តខាងលើ បានធ្វើឲ្យ Courtois ជាអ្នកចាំទី ហាក់មានការអន់ចិត្ត ដ្បិតអីទល់អូទ្រីស ជាប្រកួតអបអរ ការបង្ហាញខ្លួនលើកទី ១០០ សម្រាប់គេ តែបែរមិនទទួលបានការឲ្យតម្លៃ។
យ៉ាងណារឿងនេះក៏ជឿថា នឹងមានការប៉ះទង្គិចរវាងទំនាក់ទំនង Lukaku&Courtois ខ្លះដែរ តែធ្ងន់បំផុតគឺអាចរវាងអ្នកចាត់ការសញ្ជាតិអ៊ីតាលីផ្ទាល់ ជាមួយនឹងកីឡាករ។ ជាក់ស្តែងការបកស្រាយចំៗចេញពីគ្រូសញ្ជាតិអ៊ីតាលី៖ “ពីដំបូងយើងសម្រេចគ្នារួចអស់ហើយ ថា Lukaku នឹងពាក់ស្លាកប្រធានក្រុមទល់អូទ្រីស រួចបន្ទាប់ទៀតប្រកួតទល់អេស្តូនី គឺជាវេនរបស់ Courtois ដល់តែចប់ការប្រកួត [ទល់អូទ្រីស] បែរ Courtois គេដើរមកនិយាយដាក់ខ្ញុំ ថាគេត្រលប់ទៅផ្ទះវិញហើយ ព្រោះគេមានការខកចិត្តណាស់ ខ្ញុំព្យាយាមបង្ហាញអំពីអ្វីដែលគេសក្តិសមទទួលបាន ក្នុងនាមជាអ្នកចាំទីដ៏ល្អបំផុតមួយ ដល់តែគេចេញមកបែបហ្នឹង ខ្ញុំពិតជាភ្ញាក់ផ្អើល”។
ជាការឆ្លើយតបពី Courtois៖ “រឿងនិយាយពីបញ្ហាបែបហ្នឹង មិនមែនលើកដំបូងទេ ជាមួយគ្រូមុនៗក៏ខ្ញុំធ្លាប់លើកឡើងដែរ តែសារនេះ ជាលើកទីមួយហើយដែលអ្នកចាត់ការចេះលើកដើមកីឡាករមកនិយាយលក្ខណៈបើកចំហ”៕
ប្រភព៖ បរទេស