ផ្តើមចេញពីក្មេងប្រុសនៅប្រទេសតូចក្រូអាត មកក្លាយជាយុវជននៅ Dinamo Zagreb មុនរំលេចខ្លួនជាតារាឆ្នើមមួយរូបនៅ Tottenham Hotspur ហើយចុងក្រោយក៏មករង្គើដល់កើតជា Legend ប្រចាំក្លឹបអធិរាជស Real Madrid តែបេសកកម្មចុងប៉ូចក្នុងអាជីព សម្រាប់ Luka Modric គឺសមិទ្ធផលជាមួយជម្រើសជាតិ លោកនៅមិនទាន់សម្រេចបានសូម្បីមួយ។
ជាការពិតស្ថិតក្នុងវ័យ ៣៧ ឆ្នាំ ខ្សែបម្រើជំនាញជើងស្តាំ សកម្មខាងដឹកបាល់ ខាងបង្កើតឱកាស ឆ្លាស់តំណែងរត់ឡើងចុះពេញទីលាន បានមកប្រលូកក្នុងអាជីពជាកីឡាករបាល់ទាត់ ក្នុងឆ្នាំ ២០០០ បើរាប់តាំងនៅឈុតថ្នាល រួចមកទល់ពេលចុងក្រោយ ក៏បានឈ្នះពានរង្វាន់មួយកញ្ចប់សព្វគ្រប់ ទាំងពាននៅក្លឹប ទាំងពានឯកត្តជន តួយ៉ាង La Liga, UEFA Champions League, UEFA Super Cup, FIFA Club World Cup និងបណ្តាពានក្នុងស្រុកមួយចំនួនផ្សេងទៀត នៅឯលីគកំពូលអេស្ប៉ាញ លាយឡំពាន UEFA Best Player of the Year, The Best FIFA Men’s Player of the Year ដូចគ្នានឹងពានធំ Ballon d’Or ជាដើម។
ក៏ប៉ុន្តែបើក្រឡេកទៅបញ្ជីសមិទ្ធផលរួមជាមួយជម្រើសជាតិឈរលេខ ៧ នៅ FIFA Ranking បែរត្រឹមខកចិត្ត ខិតជិតជាម្ចាស់ជើងឯក ពោលបានត្រឹមជើងឯករង ឬលេខ ២ ម្តងហើយម្តងទៀត នៅប៉ុន្មានឆ្នាំចុងក្រោយ។
មុនមានវត្តមាន Modric ប្រទេសតូចនៅអឺរ៉ុបមួយនេះ ហាក់មិនជាល្បីល្បាញខ្លាំង ឬនឹងធឹងដូចសព្វថ្ងៃឡើយ ដោយសមិទ្ធផលអស់ធំឈោងបានលេខ ៣ ម្តងកាលនៅ World Cup 1998 រួចជាប់គាំងរហូតមកដល់ឆ្នាំ ២០១៨ ឆ្លង ២ ទសវត្សបន្ទាប់ ទើបក្រូអាតអាចចារប្រវត្តិសាស្រ្តថ្មី ឡើងដល់វគ្គផ្តាច់ព្រ័ត្រជាលើកដំបូង តែមិនអាចយកឈ្នះបារាំង ជាម្ចាស់ជើងឯក។
នេះខកខានម្តងហើយ ដល់តែរំលងចូលសម័យកាល World Cup បន្ទាប់ក្នុងឆ្នាំ ២០២២ ក៏ត្រូវខកខានម្តងទៀត ដ្បិតបានឡើងប្រកិតៗនឹងឱកាសឈ្នះពាន ពោលបានធ្លាក់នៅវគ្គពាក់កណ្តាលផ្តាច់ព្រ័ត្រ ក្រោមថ្វីជើងអាហ្សង់ទីន ជាម្ចាស់ជើងឯក ដែលឡើងទៅយកឈ្នះបារាំង នៅវគ្គចុងក្រោយ។ យ៉ាងណាពេលនោះ ក្រូអាតបានកត់ត្រាជ័យជម្នះថ្មីមួយទៀតដែរ គឺតំណែងលេខ ៣ ឬមេដាយសំរឹទ្ធក្នុងព្រឹត្តិការណ៍ជាលើកទីពីរ។
ដល់តែរំលងជាងកន្លះឆ្នាំ ក៏ដាំការឈឺចាប់ជាថ្មី នៅពានរង្វាន់ UEFA Nations League ដោយបានបរាជ័យក្រោមថ្វីជើងអេស្ប៉ាញ ទាំងសោកស្តាយបំផុត ត្រង់ចាញ់បាល់ប៉េណាល់ទី ៥-៤ ក្រោយស្មើគ្រាប់បាល់ ១២០ នាទី ០-០។
យ៉ាងណា យើងនឹងរង់ចាំមើលបន្តទៅទៀតសម្រាប់ព្រឹត្តិការណ៍នៅឆ្នាំបន្ទាប់គឺ EURO 2024 ដែល Modric ត្រូវហៀរចូលអាយុ ៣៨ ឆ្នាំ ហើយក៏អាចជាឱកាសចុងក្រោយផងដែរ។
រំឭកជាថ្មី ការលើកឡើងទាំងអស់ យើងពុំមានន័យថា Modric ជាអ្នកត្រួសត្រាយសុទ្ធសាធ ឬមានតំណែងធំជាអ្នកចាត់ការអ្វីនោះទេ គ្រាន់ថា បើយើងមើលនឹងភ្នែក គឺជាការពិតបុរសម្នាក់នេះ បានចូលរួមចំណែកសំខាន់សឹងគ្រប់ការប្រកួត ហើយរាប់ថាលោកស្រលាញ់ជាតិខ្លាំង ព្រោះកីឡាករល្មមៗបែបចូលនិវត្តបាត់ទៅហើយត្រឹមអាយុស្រករកីឡាករខាងលើ។ យ៉ាងណា អ្នកគាំទ្រក្រូអាតក៏មិនអាចមើលរំលងការចូលរួមពីកីឡាករធំៗដទៃដូច Marcelo Brozovic, Ivan Perisic និង Ivan Rakitic ជាដើម។ ចុងក្រោយពីក្រូអាត គឺជាប្រទេសតូចមួយនៅទ្វីបអឺរ៉ុប មានផ្ទៃដីត្រឹម ៥៦ ៥៩៤ គីឡូម៉ែត្រការ៉េ និងចំនួនប្រជាជនតែជិត ៤ លាននាក់ប៉ុណ្ណោះឯង៕
ប្រភព៖ បរទេស