តើ Trio តំបន់ប្រយុទ្ធណាមួយ ដែលអ្នកស្រលាញ់ពេញចិត្តបំផុតក្នុងប្រវត្តិសាស្រ្តបាល់ទាត់? យ៉ាងណា យើងពិតជាមិនអាចប្រកែកបាននៅប៉ុន្មានឆ្នាំចុងក្រោយ ឈុត MSN របស់ Barcelona មាន Messi, Suarez និង Neymar ដូចគ្នានឹង BBC របស់ Real Madrid មាន Bale, Benzema និង Cristiano បានសម្រេចបែកបាក់ទាំងស្រុង ១០០ ភាគរយអស់ហើយ ជាពិសេសថ្មីថ្មោងក្រោយការចាកចេញរបស់កីឡាករបារាំងពីអធិរាជស ក្នុងលក្ខខណ្ឌឥតតម្លៃខ្លួនទៅកាន់ក្លឹបអារ៉ាប៊ីសាអូឌីត Al Ittihad។
ដល់តែថ្ងៃនេះ ឈុតធ្លាប់តែរង្គើទឹកដីបារាំងគឺ MMN រួមមាន Messi, Mbappe និង Neymar មើលមិនឃើញថាមិនត្រូវ អាចនឹងចូលដល់ផ្លូវបំបែកមួយកញ្ចប់ធំដូចគ្នា នាពេលវេលាដ៏ខ្លីខាងមុខ បន្ទាប់តែផ្ទុះដំណឹងគួរឲ្យចាប់អារម្មណ៍ ២ ជួនគ្នាក្នុងពេលតែមួយ។
ជាការពិតចំណោមអ្នកទាំង ៣ មានកីឡាករចំណាស់ជាងគេ Lionel Messi ជ្រើសយកផ្លូវចាកចេញរួចរាល់ និងបានចុះហត្ថលេខាផ្ទេរទៅក្លឹបអាមេរិក Inter Miami ដោយឡែកពីរនាក់សេសសល់ ក៏អាចតក់ក្រហល់សុំក្លឹបចាកចេញដូចគ្នា នៅទីផ្សារដោះដូររដូវក្តៅ។
២) Kylian Mbappe មិនព្រមបន្តកុងត្រាថ្មី
បច្ចុប្បន្នខ្សែប្រយុទ្ធសញ្ជាតិបារាំង សេសសល់កុងត្រាដល់ចុងខែមិថុនា ឆ្នាំ ២០២៤ ហើយក្នុងកិច្ចព្រមព្រៀងគេមានជម្រើសបន្តថ្មីមួយឆ្នាំបន្ថែម តែការសម្រេចយកចម្លើយ យ៉ាងយូរនឹងត្រូវផុតត្រឹមថ្ងៃទី ៣១ កក្កដាឆ្នាំនេះឯង។ យ៉ាងណាចម្លើយរបស់ Mbappe ហាក់បានបញ្ចេញមកហើយ បន្ទាប់ការឈ្នះពានរបស់ Man City នៅ UCL ថ្មីថ្មោង នោះគឺ “No” បដិសេធដាច់អហង្ការ មិនមានចិត្តបន្តនៅ PSG តទៅទៀត។
ជាលទ្ធផលក្លឹបស្ថិតក្នុងទីក្រុងប៉ារីស ក៏បានគិតរួចរាល់ហើយដែរ បើកីឡាករមិនព្រមបន្ត នោះក្លឹបក៏នឹងមិនត្រាំត្រែងអូសជើង Mbappe ដល់អស់កុងត្រានាឆ្នាំបន្ទាប់ ផ្ទុយទៅវិញនឹងធ្វើការលក់ចេញតែម្តងនៅទីផ្សារដោះដូរខាងមុខ ដើម្បីបង្វិលចំណូលចូលមួយផ្នែក ជាជាងរបូតដោយទទេ ឥតបានមួយកាក់មួយសេន្តចូលហោប៉ៅ។
គោលដៅគឺ Real Madrid នោះឯង តែតម្លៃខ្លួនសារនេះ ក្លឹបអេស្ប៉ាញនឹងមិនទៅឆោតចាយលើស ១៥០ លានអឺរ៉ូនោះដែរ ដ្បិតអីក្នុងកិច្ចព្រមព្រៀងបើ Mbappe មិនព្រមស៊ីញ៉េបន្តកុងត្រា ម្ល៉េះចាប់ពីថ្ងៃទី ១ មករា ឆ្នាំ ២០២៤ តទៅ គេអាចជ្រើសការចាកចេញនៅលក្ខខណ្ឌ Free Free។
១) ក្លឹបនៅអារ៉ាប៊ីសាអូឌីតចង់បាន Neymar Jr
ក្នុងផែនការណ៍ទម្លាក់លុយអភិវឌ្ឍបាល់ទាត់រាប់ពាន់លានរបស់រដ្ឋាភិបាលនៅប្រទេសក្នុងប៉ែកមជ្ឈិមបូព៌ា ក៏មានសម្លឹងទៅលើតារាឆ្នើមសញ្ជាតិប្រេស៊ីលផងដែរ។ តាមរបាយការណ៍ចុងក្រោយ ខាងក្លឹប Al Hilal បន្ទាប់បរាជ័យការចរចា Messi ពួកគេក៏បានបង្វែរកញ្ចប់ប្រាក់ដ៏ច្រើនក្រាស់ក្រែលមកលើ Neymar វិញម្តង។
នេះគ្រោងផ្តល់ឲ្យមួយឆ្នាំ ២៥០ លានអឺរ៉ូ រាប់ចូលជាកីឡាករស៊ីថ្លៃដាច់គេនៅ Saudi Pro League ខ្ពស់ជាងទាំង Ronaldo និង Benzema ហើយលើកុងត្រាមានសុពលភាព ៣ ឆ្នាំ ម្ល៉េះសរុបខ្ទង់ចំណាយចូលល្បាក់ ៧៥០ លានឯណោះ។
គួបផ្សំកត្តាអាយុកាន់តែចំណាស់ចូល ៣១ ឆ្នាំ លាយឡំរបួសបន្តញាំញី ហើយ PSG ធ្លាក់ទម្រង់លេង ម្ល៉េះវាសុទ្ធសឹងជាហេតុផលអាចអូសទាញចិត្តឲ្យ Neymar ជ្រើសយកផ្លូវទៅកើបលុយធំមុនចូលនិវត្ត៕
ប្រភព៖ បរទេស