ត្រលប់ទៅកាលពីជាងមួយឆ្នាំមុន នៅកំឡុងខែឧសភា ឆ្នាំ ២០២២ តារាឆ្នើមរបស់ក្លឹប Paris Saint-Germain និងជម្រើសជាតិមាន់គកបារាំង គឺ Kylian Mbappe ធ្លាប់បានលើកឡើង ក្នុងអត្ថន័យមើលស្រាលចំៗដល់បាល់ទាត់នៅប៉ែកអាមេរិកឡាទីន ថាមានកម្រិតទាបជាង ធៀបនឹងប៉ែកអឺរ៉ុប ដល់តែលទ្ធផលបង្ហាញចេញមកនៅរយៈពេល ១២ ខែបន្ទាប់ បែរជាផ្ទុយស្រឡះទាំងស្រុង ទាំងនៅពានធំ ពានតូច។
ថយក្រោយទៅបទសម្ភាសន៍មុនចាប់ផ្តើមយុទ្ធនាការ World Cup ធ្វើឡើងនៅប្រទេសកាតារ ពេលនោះត្រូវបានអ្នកកាសែតសួរនាំអំពីជម្រើសជាតិ ដែលសង្ឃឹមខ្ពស់នឹងឈ្នះជើងឯក ហើយចម្លើយរបស់ Mbappe សង្កត់ធ្ងន់ថា៖ “ខាងអឺរ៉ុបពួកយើងរមែងមានតែមជាង ព្រោះយើងតែងតែតតាំងគ្នានៅកម្រិតដ៏ខ្ពស់ ខុសពីអាហ្សង់ទីន និងប្រេស៊ីល ពួកគេពុំមានការប្រកួតប្រជែងបែបនោះទេនៅប៉ែកអាមេរិកឡាទីន ជារួមបាល់ទាត់នៅទីនោះ មិនមានការអភិវឌ្ឍល្អប្រសើរដូចនៅតំបន់ពួកយើងឡើយ ហេតុផលត្រង់ហ្នឹងទើបប្រទេសឈ្នះជើងឯក World Cup ពេលក្រោយៗ តែងតែជាប្រទេសនៅអឺរ៉ុប”។
ចាំបានរំលងតែប៉ុន្មានថ្ងៃល្បាក់ពេលនោះ Lautaro Martinez កីឡាករជម្រើសជាតិអាហ្សង់ទីន ក៏ចេញមកឆ្លើយតបភ្លាម ទៅការយល់ឃើញរបស់ Mbappe ថាជាការលើកឡើងមិនយុត្តិធម៌ ត្រង់ការពិតទៅទាំងប្រេស៊ីល ទាំងអាហ្សង់ទីន សុទ្ធសឹងមានធនធានកីឡាករល្អៗដូចតែប្រទេសនៅអឺរ៉ុបអ៊ីចឹងឯង។
យ៉ាងណាការលើកឡើងរបស់កីឡាករបារាំង អាចថាមិនខុសនោះទេ បើយើងសារថយក្រោយចន្លោះឆ្នាំ ២០០២ ដល់ ២០១៨ ដែលក្រោយពេលប្រេស៊ីលកាន់ពានក្នុងប្រទេសជប៉ុនរួចមក បន្តបន្ទាប់គឺជាអ៊ីតាលី, អេស្ប៉ាញ, អាល្លឺម៉ង់ និងបារាំង។ ក៏ប៉ុន្តែនៅចុងឆ្នាំ ២០២២ ការគិតរបស់ Mbappe មិនដូចជាការពិត ដែលបានកើតឡើង ជាក់ស្តែងនាវគ្គផ្តាច់ព្រ័ត្រ គឺជម្រើសជាតិមកពីឡាទីនដែលកីឡាករបានមើលស្រាលនោះឯង ជាអ្នកទម្លាក់មាន់គកបារាំង មិនឲ្យឈ្នះពាន ២ សម័យកាលជាប់។
ក្រោយស្មើលទ្ធផល ៣-៣ នៅម៉ោងបន្ថែម ១៥ នាទីពីរដង ឈានដល់ការស៊ុតប៉េណាល់ទីកាត់សេចក្តី គឺអាហ្សង់ទីនបានយកឈ្នះបារាំង ៤-២ ក្លាយជាម្ចាស់ជើងឯក បន្ទាប់ខកខានតាំងឆ្នាំ ១៩៧៨។
មិនទាន់ចប់ត្រឹមតែប៉ុណ្ណឹងទេ បន្តមកដល់ព្រឹត្តិការណ៍បន្ទាប់របស់ FIFA គឺ U20 World Cup ដែលទើបតែបញ្ចប់ ក៏អ៊ុយរុយហ្គាយជាជម្រើសជាតិមកពីអាមេរិកឡាទីន បានឈ្នះជើងឯក ក្រោយបំបាក់អ៊ីតាលី ជាជម្រើសជាតិមកពីអឺរ៉ុប ដោយលទ្ធផល ១-០ កាលពីថ្ងៃម្សិលមិញ។ នេះខាងឡាទីនខកខានធ្វើបានតាំងឆ្នាំ ២០១១ កាលប្រេស៊ីលឈ្នះព័រទុយហ្គាល់។
ចូលទៅខែក្រោយ ក៏នឹងមានព្រឹត្តិការណ៍ FIFA Women’s World Cup វិញម្តង ហើយបេក្ខភាពមកពីខាងសហព័ន្ធ CONMEBOL ឬខាងឡាទីន មាន ៣ ប្រទេសចូលរួម តួយ៉ាងអាហ្សង់ទីន ប្រេស៊ីលនិងកូឡុំប៊ី ខណៈខាងអឺរ៉ុប UEFA មានដល់ ១២ ប្រទេស។
យើងនឹងរង់ចាំមើលលទ្ធផលនៃព្រឹត្តិការណ៍នេះមួយបន្ថែមទៀត ដ្បិតអីក្នុងប្រវត្តិសាស្រ្តខាងឡាទីនឥតធ្លាប់ស្គាល់ជាតិឈ្នះជើងឯកម្តងណាឡើយ ពោលធ្លាប់តែអាមេរិកខាងជើងគឺសហរដ្ឋអាមេរិក ឈ្នះ ៤ សម័យ, អឺរ៉ុបមានអាល្លឺម៉ង់និងន័រវេស សរុបឈ្នះ ៣ សម័យ ហើយអាស៊ី គឺជប៉ុនឈ្នះ ១ សម័យ៕
ប្រភព៖ បរទេស