Wayne Rooney បានបង្ហាញខ្លួនឱ្យជម្រើសជាតិអង់គ្លេសជាចុងក្រោយ ក្នុងការប្រកួតមិត្តភាពឈ្នះអាមេរិក ៣-០ នៅយប់មិញនេះ។
Rooney បាននិយាយអរគុណទៅដល់បុគ្គលិក និងកីឡាករទាំងអស់ដែលបានបង្កើតការប្រកួតមិត្តភាពលាគ្នានេះឡើង។ វាជាការប្រកួតមួយដែលខ្លួនមិនបំភ្លេចបាន ហើយក៏អរគុណដល់អ្នកគាំទ្រ សហព័ន្ធបាល់ទាត់អង់គ្លេស ផងដែរ ដែលបានបង្ហាញក្ដីគោរពដល់រូបគេ ក្នុងនាមជាកីឡាករម្នាក់របស់ជម្រើសជាតិអង់គ្លេស។
អតីតកីឡាកររបស់បិសាចក្រហម Manchester United បានបន្ដទៀតថា៖ “នេះជាយប់មួយដែលខ្ញុំតែងតែស្រមៃ នេះជាយប់មួយដែលខ្ញុំនឹងចង់ចាំរហូតទៅ។ សម្រាប់ពួកយើង លេងឱ្យអង់គ្លេសគឺដូចគ្រួសារមួយ យើងនឹងរក្សាការចង់ចាំដ៏ល្អនេះ។ ក្រុមអង់គ្លេស បច្ចុប្បន្នកំពុងដំណើរការបានយ៉ាងល្អ ជាមួយយុវជនដ៏អស្ចារ្យរបស់យើង។ ខ្ញុំច្បាស់ណាស់ថាប៉ុន្មានឆ្នាំទៀតអង់គ្លេស នឹងទទួលបានផលជាក់ជាមិនខាន”។
Wayner Rooney បានបញ្ចប់ភារកិច្ចពីជម្រើសជាតិដោយលេងបាន១១៩ប្រកួត ទាត់បញ្ចូលទី៥៣គ្រាប់ជាប់ឈ្មោះជាកីឡាករទាត់ចូលច្រើនជាងគេឲ្យអង់គ្លេស៕ប្រភពDailyMail