ឆ្លងកាត់ពីមួយខែទៅមួយខែ រឿងរ៉ាវថ្មីៗជាច្រើនក្នុងពិភពបាល់ទាត់បានកើតឡើងបន្តកន្ទុយគ្នា ហើយសរុបរយៈពេលកន្លះឆ្នាំ ២០២៣ វិថីបាល់ទាត់ក៏ដើរដល់ផ្លូវបំបែក សម្រាប់តារាឆ្នើមចាស់វស្សាជាច្រើន នៅទូទាំងលីគកំពូលអឺរ៉ុប៖
៥) Gerard Pique
បន្ទាប់មានរឿងបែកបាក់ ប្រេះស្រាំចំណងស្នេហ៍រវាងដៃគូកាន់ឆ្នាំ Shakira ក៏កីឡាករអេស្ប៉ាញសម្រេចចិត្តជ្រើសយកផ្លូវបែក ដកខ្លួនចេញពីអាជីពបាល់ទាត់នៅល្បាក់ពេលវេលាតែមួយនោះដែរ។ ចាប់តាំងខែមករា ឆ្នាំ ២០២៣ ក៏លែងមានវត្តមានអតីតខ្សែការពារកណ្ដាលដ៏ប៉ិនប្រសព្វខាងលើ ចូលរួមជួយអ្នកមានបុណ្យតទៅទៀត ក៏ចំពេលដែលក្លឹបបានឈ្នះជើងឯក La Liga ក្រោយខកខាន ៣ រដូវកាល។
ទោះជាយ៉ាងណា បុរសវ័យ ៣៥ ឆ្នាំ បានបង្ហើបការត្រលប់មក Barcelona ជាថ្មី តែមិនក្នុងតំណែងជាកីឡាករ ពោលអាចជាជំនួយការ ជាអ្នកចាត់ការ ឬសមាជិកនៅតំណែងដទៃណាមួយ។
៤) Gareth Bale
ជាចំណែកមួយក្នុង Trio រជ្ជកាលមាស BBC ឲ្យអធិរាជស ហើយក៏បានប្រកាសចូលនិវត្តពីអាជីពបាល់ទាត់ នៅថ្ងៃទី ៩ មករាកាលពីដើមឆ្នាំ បន្ទាប់ចូលរួមជួយក្លឹបនៅអាមេរិកបានជាង ៦ ខែ។ ទន្ទឹមការបន្សល់ទុកសមិទ្ធផល កំណត់ត្រាជាហូរហែ តែបន្តពេលទៅមុខ Bale ហាក់មិនសូវផ្សារភ្ជាប់ខ្លួន មកកាន់ពិភពបាល់ទាត់ឡើយ ផ្ទុយទៅវិញផ្តោតលើកីឡាទីពីរដែលខ្លួនស្រលាញ់ គឺវាយកូនហ្គោល។
៣) Mesut Ozil
ស្ថិតនៅអាយុ ៣៤ ឆ្នាំ អតីតកីឡាករសញ្ជាតិអាល្លឺម៉ង់ ក៏ប្រកាសចូលនិវត្តជាមួយក្លឹបឈរជើងចុងក្រោយ នៅទឹកដីទួរគី Basaksehir។ គួរឲ្យដឹងដែរថា Ozil ត្រូវបានអ្នកគាំទ្រទទួលស្គាល់ ជាខ្សែបម្រើនិងស្លាបប្រយុទ្ធ ពោរពេញដោយបច្ចេកទេស ភាពច្នៃប្រឌិតលើទីលាន ហើយទទួលបានការគាំទ្រខ្លាំងគ្រាឈរជើងឲ្យក្លឹប Real Madrid និង Arsenal។
២) Zlatan Ibrahimovic
វាហាក់ជាដំណឹងដ៏ភ្ញាក់ផ្អើលបំផុតនៅរដូវក្តៅសារនេះ ក៏ដោយសារតែមុនប៉ុន្មានខែសារថយក្រោយ យើងពុំទទួលបានចចាមអារ៉ាម ឬតម្រុយអ្វី អំពីការព្យួរស្បែកជើងរបស់អតីតកីឡាករសញ្ជាតិស៊ុយអែតនោះឡើយ។
លុះមកទល់ដើមខែមិថុនា បែរបុរសវ័យ ៤១ ឆ្នាំ ប្រកាសលាអ្នកគាំទ្រ នៅកីឡដ្ឋាន San Siro ជាមួយការស្ពាយអនុស្សាវរីយ៍ដ៏គួរឲ្យចងចាំជាច្រើន បូករួមទាំង ៥៦១ គ្រាប់ នៅកំឡុងឈរជើងរយៈពេល ២៤ ឆ្នាំក្នុងអាជីព។ យ៉ាងណាសោកស្តាយសម្រាប់ Zlatan ជ័យជម្នះធំ គេមិនអាចសម្រេចគឺ ពានរង្វាន់ UEFA Champions League បើទោះបីមានឱកាសធ្លាប់ឈរជើងនៅក្របខ័ណ្ឌអឺរ៉ុប ជាមួយបណ្តាក្លឹបទាំង ៧ ដូច Ajax, Juventus, Inter, Barcelona, PSG, Man United និង AC Milan។
១) Joaquin
បើទោះបីបុរសម្នាក់នេះ មិនសូវមានអ្នកស្គាល់ច្រើន តែប្រធានបទនៃការព្យួរស្បែកជើងរបស់គេ គឺពិតជាគួរឲ្យចាប់អារម្មណ៍ ជាពិសេសសម្រាប់អ្នកគាំទ្រក្លឹប Real Betis។
អតីតកីឡាករលេងតំណែងប្រយុទ្ធ វ័យ ៤១ ឆ្នាំ បានមកចូលរួមជាមួយ Betis ដល់ទៅ ២ លើក ពោលលើកដំបូងចន្លោះឆ្នាំ ២០០០ ដល់ ២០០៦ មុនចុះចូលជាថ្មីនៅឆ្នាំ ២០១៥ ដល់ ២០២៣។ សរុបការឈរជើងក្នុងអាជីពជាមួយក្លឹបនៅអេស្ប៉ាញនិងអ៊ីតាលី ចូល ៨៤៧ ប្រកួត ក៏រកបាន ១១២ គ្រាប់និង Assist ១០៣ លើក។ យ៉ាងណាចូលទៅរដូវកាលបន្ទាប់ យើងលែងបានលឺអ្នកអធិប្បាយហៅឈ្មោះ Joaquin តទៅទៀតហើយ៕
ប្រភព៖ បរទេស
