Malcom កីឡាករចំណូលថ្មីរបស់ក្រុម FC Barcelona ថាការបានលេងជាមួយ Lionel Messi គឺពិតជាអារម្មណ៍អស្ចារ្យខ្លាំងណាស់ ហើយកីឡាករអាហ្សង់ទីននេះដូចជាកីឡាករមកពីក្រៅភពអីចឹង។
កីឡាករប្រេស៊ីលតាំងពីចូលលេងឱ្យ Barcelona មក ទើបតែមានឱកាសជាប់ជម្រើស១១នាក់ដំបូងកាលលេងចាញ់ក្រុម Real Betis ៣-៤ កន្លងទៅនេះទេ។ បទពិសោធលេងជាមួយ Messi លើកទី១នេះ បានធ្វើឱ្យ Malcom សប្បាយចិត្តយ៉ាងខ្លាំង ព្រោះនេះជាក្ដីស្រមៃរបស់ខ្លួនបានឈរនៅលើទីលាន ចាប់ដៃគូជាមួយ Messi ។
Malcom បាននិយាយទៀតថា៖ “មុនពេលប្រកួត នៅតាមផ្លូវដើរចេញមកទីលាន គាត់បានប្រាប់ខ្ញុំថាពេលគាត់បានបាល់ គាត់នឹងរកមើលខ្ញុំ ហើយបោះមកខ្ញុំ។ គាត់ជាកីឡាករម្នាក់ដែលចង់ឱ្យក្រុមទទួលជ័យជម្នះ បើទោះជាអ្នកណាស៊ុតចូលក៏ដោយ ហេតុដូច្នេះហើយទើបគាត់ជាប្រធានក្រុមរបស់យើង។ សម្រាប់ខ្ញុំ គាត់ជាកីឡាករល្អជាងគេលើលោកនេះ ដែលគ្មាននរណាអាចធ្វើបានដូចឡើយ”៕ប្រភព៖ foxsportsasia