បាល់ទាត់គឺអាចធ្វើឲ្យមនុស្សជាច្រើនរស់ស្រួល ទោះខ្លះពុំបានឆ្លងកាត់ការសិក្សាខ្ពង់ខ្ពស់ ឬបញ្ចប់ថ្នាក់បរិញ្ញាបត្រនៅសាលាថ្លៃៗ ក៏ចុងក្រោយបានក្លាយជាសេដ្ឋី ដេកលើគំនរទ្រព្យ មួយអាទិត្យលុយចូលខ្ទង់សែនខ្ទង់លានដុល្លារក៏មាន។
ដូច Cristiano Ronaldo ដូច Sadio Mane ពួកគេធ្លាប់បានសារភាព ថាបើគ្មានបាល់ទាត់ ជីវិតពេលនេះ គឺផ្ទុយស្រឡះ ១៨០ ដឺក្រេ ដ្បិតអីកាលកុមារភាពមានការខ្វះខាត ពុំទទួលបានឱកាសរៀនសូត្រដិតដល់ដូចកូនគេឯទៀតឡើយ។ ចុះមុននិងក្រោយ ប្រសិនជាគ្មានបាល់ទាត់ តើតារាឆ្នើមទាំង ៥ រូប នឹងប្រកបមុខរបរ ឬការងាររកស៊ីអ្វី ដើម្បីចិញ្ចឹមក្រពះ?
៥) Virgil van Dijk
មិនខុសពីជីវិតកម្សត់កម្ររបស់កីឡាករបាល់ទាត់ល្បីៗភាគច្រើន ដូចគ្នាសម្រាប់ខ្សែការពារសញ្ជាតិហូឡង់ Van Dijk អតីតកាលក៏ស្ថិតក្នុងទ្រនំគ្រួសារក្រលំបាកផងដែរ។ តារាឆ្នើមរបស់ក្លឹបហង្សក្រហម Liverpool ធ្លាប់បានលើកឡើង៖ “កាលនៅអាយុ ១៦ ឬ ១៧ ឆ្នាំ ពេលខ្ញុំចង់មានលុយទៅទិញអាហារហូប ខ្ញុំអត់បានគិតច្រើននោះទេ ទន្ទឹមពេលម្តាយខ្ញុំគាត់គ្មានប្រាក់ គឺខ្ញុំបានដើរទៅសុំការងារគេធ្វើនៅអាហារដ្ឋានក្នុងតំបន់មួយកន្លែង គឺជាអ្នកលាងចានឲ្យគេ”។
ត្រង់អាជីពការងារជា អ្នកលាងចាន នេះដែរ Van Dijk បានសង្កត់ធ្ងន់ បើគ្មានសំណាង បានក្លាយជាកីឡាករបាល់ទាត់ ថាមិនត្រូវ មើលមិនឃើញ លោកក៏អាចនឹងបន្តវាមកទល់សព្វថ្ងៃ ព្រោះក្នុងជីវិតគ្មាននរណាអាចមើលឃើញ ឬទស្សន៍ទាយដឹង ទុកជាមុនឡើយ។
៤) Zlatan Ibrahimovic
ងាកមកបុរសសញ្ជាតិស៊ុយអែត តាមសើបមើលប្រវត្តិមិនជាពិបាកអីពេកនោះទេ ហើយលោកធ្លាប់បានបង្ហើប ថាក្រៅតែអាជីពបាល់ទាត់ គឺមានអាជីពអាទិភាព ២ ផ្សេងទៀត មួយជាការងារម្តាយរបស់លោកផ្ទាល់ ចង់ឲ្យធ្វើ គឺជាអ្នកបម្រើការផ្នែកច្បាប់ ឬជាមេធាវី ហើយមួយផ្សេងទៀត ជាអាជីពលោកស្រលាញ់ គឺជាកីឡាករគុនចម្រុះ លើសង្វៀន UFC។
៣) Sadio Mane
មិនរំពឹងខ្ពស់ទេ នេះគិតត្រឹមបាយបីពេលចិញ្ចឹមក្រពះ ឲ្យតែអាចរស់រានមានជីវិត គឺវាគ្រប់គ្រាន់ណាស់ទៅហើយសម្រាប់កីឡាករសេណេហ្គាល់។
ផ្តើមជីវិតលំបាកក្នុងភូមិ Bambali ដ៏តូចមួយ Mane ធ្លាប់អះអាងថា នៅទីនោះ គ្មានការងារអ្វី ក្រៅតែពីជា កសិករ នោះឡើយ។ ដោយសារហេតុផលនេះ ក្រោយៗមកពេលមានបាន ខ្សែប្រយុទ្ធជំនាញជើងស្តាំ បានចំណាយលុយរាប់សិបលានចេញពីហោប៉ៅ ទៅជួយផ្គត់ផ្គង់ភូមិកម្សត់ Bambali ឲ្យកើតជាភូមិទំនើបថ្មី ក៏ដើម្បីបណ្តុះបណ្តាលក្មេងៗជំនាន់ក្រោយ មិនឲ្យលំបាកដូចជាខ្លួន។
២) Cristiano Ronaldo
មិននិយាយថយក្រោយ តែសារទៅពេលខាងមុខ CR7 បានគិតរួចរាល់ហើយ ប្រសិនចូលនិវត្តពីអាជីពបាល់ទាត់ ហើយត្រូវដកឃ្លាទាំងស្រុងពីវិស័យនេះ គឺលោកនឹងសាកល្បងរសជាតិថ្មី ក្នុងអាជីពជាអ្នកសម្តែងខ្សែភាពយន្ត។
នេះមិនមែនជាកីឡាករដំបូងទេ ដែលបានចាប់យកអាជីពជាតារាសម្តែងភាពយន្ត ដោយកន្លងមកក៏ធ្លាប់មាន Pele, Vinnie Jones និង David Beckham ជាគំរូស្រាប់ហើយដែរ។
១) Erling Haaland
វ័យកំពុងពេញកើបលុយ កើបកិត្តិយសជាមួយបាល់ទាត់ ថ្មីៗកន្លងទៅមនុស្សយន្តជំនាញបញ្ចប់ទីឲ្យ Man City ក៏ត្រូវបានអ្នកកាសែតសួរនាំថា៖ “ក្រៅតែពីអាជីពបាល់ទាត់ តើអ្នកនឹងជ្រើសយកការងារអ្វី”។ ចម្លើយដ៏ភ្ញាក់ផ្អើលចេញពីមាត់យុវជនន័រវេស ប្រាប់ថា៖ “ខ្ញុំនឹងធ្វើជាជាងផ្សារដែក ឬក៏ប្រហែលជាកសិករមួយរូប”៕
ប្រភព៖ បរទេស