បើអាចយកឈ្នះ Mainz 05 ពេញ ៣ ពិន្ទុកាលពីថ្ងៃមុន ម្ល៉េះថ្ងៃនេះ ៣១ ឧសភា ជាថ្ងៃកំណើតចូលវ័យ ៣៤ ឆ្នាំសម្រាប់ Marco Reus ប្រហែលកំពុងគេងឱបពាន អបអរយ៉ាងសប្បាយរីករាយ ជាមួយសមិទ្ធផលធំលើកដំបូងក្នុងអាជីព តែលទ្ធផលបែរផ្ទុយស្រឡះ ហើយស៊យបន្តជាន់ស៊យ ទាំងអាជីពនៅជម្រើសជាតិ ទាំងអាជីពនៅក្លឹប រកលេខដាក់គ្មាន។
ជាការពិត Reus បានត្រាំត្រែងជិតមួយអាជីពនៅទឹកដីអាល្លឺម៉ង់ ជាប្រទេសកំណើត ពោលតាំងឆ្នាំ ១៩៩៥ ជាមួយការហ្វឹកហាត់ក្នុងឈុតថ្នាល បន្តបន្ទាប់ឆ្ពោះមកអភិវឌ្ឍខ្លួននៅឈុតធំ ហែលកាត់ក្លឹបផ្សេងៗ រួមមាន Rot Weiss Ahlen, Borussia Monchengladbach និង Borussia Dortmund ទល់បច្ចុប្បន្ន ប្រហែលអ្នកមិនជឿទេ ថាបុរសម្នាក់នេះ មិនទាន់បានស្គាល់ជាតិឈ្នះពានលីគកំពូលសូម្បីម្តង។ CTS Sports បង្ហាញពេលវេលាគួរឲ្យសោកស្តាយបំផុត ៣ លើកសម្រាប់ខ្សែបម្រើ និងប្រយុទ្ធស្លាបខាងលើ៖
៣) ការកៀកយកបានពាន UCL
បន្ទាប់មកចូលរួមជាមួយ Dortmund នៅឆ្នាំ ២០១២ ក៏ស្រាប់តែរំលងចូលឆ្នាំបន្ទាប់ កីឡាករសញ្ជាតិអាល្លឺម៉ង់មានឱកាសឡើងដល់វគ្គផ្តាច់ព្រ័ត្រពានអឺរ៉ុប UEFA Champions League គ្រានោះ ពួកគេត្រូវតតាំងក្លឹប Bayern Munich។
ស្ថិតនៅជម្រើស ១១ នាក់ដំបូង Reus លេងពេញតង់ ហើយលទ្ធផលមុននាទី ៨៩ គឺស្មើ ១-១ លុះដល់វេលានោះ កៀកនឹងបញ្ចប់ការប្រកួត ឈានដល់ការថែមម៉ោង ក៏ស្រាប់តែ Arjen Robben របស់ Bayern អាចរកបានគ្រាប់បាល់យកឈ្នះ ទម្លាក់ Dortmund ឲ្យគ្រោងត្រឹមតំណែងជើងឯករង។ នេះមានន័យថា ដំណើរកៀកនឹងឆ្ពោះទៅការលើកពាន UCL លើកដំបូងក្នុងអាជីព បែរត្រូវបញ្ចប់ត្រឹមចុងតង់នាទី ៨៩ នោះឯង។
២) របួសចំពេលអាល្លឺម៉ង់ឈ្នះ World Cup
ខកខានតាំងឆ្នាំ ១៩៩០ មកទល់សព្វថ្ងៃ មានសម័យកាលមួយគត់ ដែលឥន្ទ្រីយ៍ដែកអាល្លឺម៉ង់ បានឈ្នះជើងឯក World Cup នោះគឺពេលសាំបាប្រេស៊ីលធ្វើជាម្ចាស់ផ្ទះ ក្នុងឆ្នាំ ២០១៤។ យ៉ាងណាមុនព្រឹត្តិការណ៍ចាប់ផ្តើម Reus បានជួបរបួសផ្នែកកជើង ហើយមិនត្រូវបានអ្នកចាត់ការលោក Joachim Low ដាក់ឈ្មោះទៅក្នុងបញ្ជីកោះហៅឡើយ ជាហេតុនាំឲ្យមេដាយនាមម្ចាស់ជើងឯក ពុំត្រូវបានរាប់បញ្ចូលឈ្មោះរបស់គេ។ ក្រោយៗមកនៅពេលមានវត្តមាន បែរជាពេលជម្រើសជាតិធ្លាក់ជើង ដូច ២០១៨ និង ២០២២ អាល្លឺម៉ង់ងើបមិនផុតវគ្គចែកពូលផង។
១) ការកៀកយកបានពាន Bundesliga
និយាយទៅជឿទេ ឈរជើងនៅក្របខ័ណ្ឌកំពូលអាល្លឺម៉ង់ តាំងឆ្នាំ ២០១០ តែបែរមិនដែលស្គាល់ជាតិឈ្នះពាន Bundesliga សូម្បីតែម្តង។ អស់ស៊យហើយត្រឹមឆ្នាំ ២០២៣ នេះ ដែល Dortmund បានប្រដេញពិន្ទុនាំមុខជាបន្តបន្ទាប់ ទៅលើ Bayern ដល់កៀកបញ្ចប់រដូវកាល សល់មួយប្រកួតជុំទី ៣៤ កាត់សេចក្តី ដែលក្លឹបរបស់ Reus ត្រូវការ ៣ ពិន្ទុទល់ Mainz 05 នៅប្រកួតចុងក្រោយ បែរមិនអាចយកបាន។
ជាលទ្ធផលការស្មើ ក៏នាំឲ្យពួកគេមាន ៧១ ពិន្ទុ ដូចគ្នា ធៀបនឹង Bayern ដល់បន្តទៅធៀបគ្រាប់បាល់ចំណេញគឺ Dortmund សម្រេចជាក្លឹបត្រូវឈរលេខ ២ មិនបានឈ្នះពានរង្វាន់ដដែល។ នេះ Reus សេសសល់កុងត្រាត្រឹមចុងខែមិថុនា ឆ្នាំក្រោយ ក៏រាប់ជាឱកាសចុងប៉ូចក្នុងអាជីពគេដែរ ដូច្នេះយើងនឹងរង់ចាំមើលទាំងអស់គ្នា តើវានឹងត្រូវបញ្ចប់ដោយបែបនេះ ឬមានអ្វីអាចប៉ះប៉ូវមុនចូលនិវត្ត?
ប្រភព៖ បរទេស
