បើនិយាយជាមួយអ្នកតាមដានបាល់ទាត់អឺរ៉ុប ចប់ពីមួយខែទៅមួយខែ តែងមានរឿងថ្មីត្រូវជជែកគ្នាឥតឈប់ ហើយគ្រប់ហេតុការណ៍សំខាន់ ពិតណាស់នឹងមិនអាចរំលងការចុះផ្សាយពីទំព័រ CTS SPORTS បានឡើយ។
នេះបើទោះបីរដូវកាលនៃក្របខ័ណ្ឌកំពូលៗ ត្រូវបានបញ្ចប់ តែយើងក៏ដល់ពេលវេលាត្រូវកត់ត្រានូវដំណឹងចចាមអារ៉ាមវិញម្តង ដោយក្លឹបធំតូចចាប់ផ្តើមគិតគូរដល់ការលក់ចេញទិញចូល សាងអ្នកចាស់ ឆ្លាស់ចូលអ្នកថ្មី ហើយក្នុងអត្ថបទនេះ ពួកយើងសូមក្រវែលលើកមកចែករំលែកនូវព័ត៌មានកំពុងរសើបពាក់ព័ន្ធនឹងក្លឹបអធិរាជស Real Madrid៖
២) ក្លឹបយក្សនៅអារ៉ាប៊ីសាអ៊ូឌីត ចង់បាន Karim Benzema
មិនរំពឹងទេ ការចុះចូលតែមួយ ឬទៅរួបរួមជាថ្មី នឹងមិត្តចាស់ Cristiano Ronaldo ផ្ទុយទៅវិញ បើជាការពិត គឺមានតែហែកមុខយក្សកើតជាគូប្រជែងនឹងគ្នារវាងអ្នកទាំងពីរ។ បើតាមដំណឹងចុះផ្សាយចុងក្រោយ ក្លឹបទើបឈ្នះជើងឯក Saudi Pro League ថ្មីថ្មោង គឺ Al-Ittihad បានដាក់សំណើទៅកាន់កីឡាករសញ្ជាតិបារាំង ពោលសន្យានឹងផ្តល់ជូនប្រាក់ឈ្នួល ២០០ លានអឺរ៉ូ នារយៈពេល ២ រដូវកាល។
សំណើនេះ ល្មមនឹងឲ្យកីឡាករវ័យ ៣៥ ឆ្នាំ កើបលុយទុកចូលនិវត្តយ៉ាងធូរ ហើយជួនពេលសុពលភាពកុងត្រារបស់ខ្លួនជាមួយក្លឹបកាន់ឆ្នាំនៅទឹកដីអេស្ប៉ាញ កៀកនឹងបញ្ចប់នៅឆ្នាំក្រោយផង អ៊ីចឹងការបដិសេធ រាប់ថាមានភាគរយទាប ជាងការយល់ព្រម។
គួរឲ្យដឹង Benzema បានចាយពេលនៅក្លឹបម្ចាស់ដី Santiago Bernabeu តាំងឆ្នាំ ២០០៩ បូកទៅចូលជិតមួយទសវត្សកន្លះ ហើយបានកត់ត្រាឈ្មោះខ្លួនឯងនៅជើងស៊ុតលំដាប់ទីពីរ ប្រចាំប្រវត្តិសាស្រ្តក្លឹប មាន ៣៥៣ គ្រាប់ នៅពីក្រោម CR7 ជិត ១០០ គ្រាប់ តែបូកផ្សំសមិទ្ធផលគ្រប់ពានរង្វាន់ សម្រេចអស់ហើយនោះ ម្ល៉េះក៏គ្មានហេតុផលចាក់ដោតអ្វីដែលកីឡាករខាងលើ ជ្រើសការបន្តនៅតទៅទៀតដែរ។
១) Roberto Firmino កំពុងស្ថិតក្នុងការពិចារណារបស់ Real Madrid
គុណភាពនៅមាន អាយុក៏មិនទាន់ជាចំណាស់ពេក បូកផ្សំនឹងការឈរជើងក្នុងលក្ខខណ្ឌឥតតម្លៃខ្លួនផង ម្ល៉េះ Real Madrid ក៏ទំនងនឹងមិនបោះបង់ឱកាសសារនេះដែរ ជុំវិញការថ្ពក់យកកីឡាករសញ្ជាតិប្រេស៊ីលមកចុះចូលនៅក្លឹបក្នុងទីក្រុង Madrid។
តាមរបាយការណ៍ Fabrizio Romano ចុះផ្សាយ ជាការពិត Firmino បានស្ថិតក្នុងគោលដៅអាទិភាពរបស់អធិរាជស ហើយមកទល់ពេលចុងក្រោយក៏មិនមានបញ្ហាអ្វីត្រូវបានរាំងស្ទះនោះដែរ និយាយឲ្យងាយសល់ ចាំតែចរចាលក្ខខណ្ឌបុគ្គលលើប្រាក់ឈ្នួល និងប្រាក់ Bonus ផ្សេងៗតែប៉ុណ្ណោះឯង។
ប្រយុទ្ធប្រអប់វ័យ ៣១ ឆ្នាំ ទើបដើរចេញពី Anfield ក៏រំពឹងនឹងក្លាយជាអ្នកជំនួសដ៏សក្តិសម នៅតំណែងចាស់របស់ Karim Benzema ហើយចំណេញបំផុតគឺ Real មិនចាំបាច់ចាយលុយ ដល់ល្បាក់រយលាន ដូចផែនការណ៍ចាស់ លើការចង់បាន Harry Kane នោះដែរ៕
ប្រភព៖ បរទេស
