ជាញឹកញយនៅលើទីលាន របៀបដែលកីឡាករ អ្នកចាត់ការ ក៏ដូចជាបណ្តាជំនួយការគ្រប់ផ្នែក ប្រាស្រ័យទាក់ទងគ្នា តាមរយៈភាសានិយាយនានា ពួកគេតែងទម្លាប់យកដៃមកខ្ទប់មាត់ កំឡុងពេលបញ្ចេញសូរសំឡេង។
មួយផ្នែកតូចនៃអ្នកគាំទ្រ ខ្លះទៅអត់ដឹង បែរគិតថា វាត្រឹមជាទម្លាប់ដូចតែមនុស្សទូទៅ ពោលគឺខ្ទប់មាត់ ព្រោះមិនចង់ឲ្យភាយខ្យល់ដង្ហើមឬក្លិនមាត់មិនល្អ ទៅកាន់អ្នកដែលបានស្តាប់ ខ្លះទៅក៏គិតហេតុផលផ្សេងៗពីនោះ។ យ៉ាងណាតាមការប្រមែប្រមូលរបាយការណ៍គួរឲ្យទុកចិត្តជាច្រើន CTS Sports សូមទាញលើកមកបង្ហាញនូវមូលហេតុគួរឲ្យចាប់អារម្មណ៍ទាំង ៦ នៅពីក្រោយកាយវិការអស់នោះ ក៏ជឿថា បងប្អូនយើងភាគច្រើនមិនធ្លាប់បានគិតដល់នោះឡើយ៖
៦) ដើម្បីសង្កត់សូរសម្លេង
ក៏ដោយសារតែភាពអ៊ូអរ សំឡេងហ៊ោកញ្ជ្រៀវក្នុងកីឡដ្ឋាន បែបនេះការយកដៃមកខ្ទប់ពេលនិយាយ គឺអាចសង្កត់ឲ្យសូរសម្លេងរបស់ពួកគេ កាន់តែលឺច្បាស់ទៅដល់ដៃគូម្ខាងទៀត។ ផ្ទុយទៅវិញ បើនិយាយធម្មតាៗដូចការជជែកគ្នាមួយទល់មួយនៅកន្លែងស្ងាត់ គឺសំឡេងនឹងសាយទៅខាងក្រៅ លាយឡំសំឡេងអ៊ូអរកំពុងមានស្រាប់នៅកីឡដ្ឋាន ម្ល៉េះនឹងនាំឲ្យម្ខាងទៀតពិបាកស្តាប់ជាក់ជាមិនខាន។
នេះបើផ្អែកតាមការលើកឡើងរបស់អ្នកពិគ្រោះយោបល់លោក Phil Hall ជាបុគ្គលធ្លាប់បម្រើការជាមួយក្លឹបធំៗជាច្រើននៅ Premier League។ ក៏ប៉ុន្តែវាមិនមែនជាមូលហេតុតែមួយនោះឡើយ។
៥) បញ្ចៀសអ្នកជំនាញអានបបូរមាត់
មានពាក្យពេចន៍សំខាន់ជាច្រើន ដែលកីឡាករល្បីៗចង់លាក់បាំង មិនឲ្យសាយភាយទៅខាងក្រៅ ជាពិសេសកំឡុងពេលពួកគេស្ថិតក្នុងកម្មវិធី ឬការប្រកួតកំពុងផ្សាយផ្ទាល់។ ដោយសារនៅខាងក្រៅ មានអាជីពការងារមួយ ហៅថា “អ្នកជំនាញអានបបូរមាត់” ដែលពួកគេអស់នោះ ទោះមិនស្តាប់លឺសំឡេង ក៏អាចកាត់ន័យយល់ ត្រឹមការមើលបបូរមាត់ ក៏ដឹងថាកីឡាករបានជជែករឿងអ្វីមួយ។
បុគ្គលអស់នេះ តែងពាំនាំលក់ទិន្នន័យដែលពួកគេប្រមូលបានទៅកាន់អ្នកកាសែត ឬក្រុមអ្នកស្រាវជ្រាវចង់បានរឿងរ៉ាវសម្ងាត់ពីកីឡាករកំពូល។
៤) លាក់តាក់តិចឬយុទ្ធសាស្រ្ត
ជុំវិញការសន្ទនាជាមួយមិត្តរួមក្លឹប នៅពេលប្រកួត បើនិយាយលឺៗ ប្រាកដណាស់ផែនការណ៍សម្ងាត់ ឬតាក់តិចដើម្បីយកឈ្នះទៅលើគូប្រជែង នឹងត្រូវបែកខ្ញែកទៅត្រចៀកក្រុមម្ខាងទៀតមិនខាន។ ដូច្នេះហើយការជជែក ឬការចង់ផ្លាស់ប្តូរយុទ្ធសាស្រ្តភ្លាមៗ ដូចជាដឹកពាក្យពីអ្នកចាត់ការនៅខាងក្រៅ មកកីឡាករនៅខាងក្នុងទីលាន គឺពួកគេទម្លាប់យកដៃខ្ទប់មាត់បែបនេះឯង។
៣) លាក់ការសន្ទនាសម្ងាត់
គ្រប់កីឡាករលើទីលាន បើទោះបីពេលប្រកួតជាគូប្រជែង តែខាងក្រៅទីលាន ក៏ខ្លះជាមិត្តជិតដិតនឹងគ្នាផងដែរ។ បែបនេះ ក៏មានពេលវេលាខ្លះ ពួកគេចង់ឆ្លៀតជជែករឿងរ៉ាវផ្ទៃក្នុង រឿងរ៉ាវការផ្ទេរចេញចូលមួយចំនួន អ៊ីចឹងដើម្បីបញ្ចៀសដំណឹងអស់នោះបែកការទៅខាងក្រៅ ការអនុវត្តមធ្យោបាយខាងលើ ជារឿងដែលមិនអាចរំលង។
២) លាក់ពាក្យពេចន៍អាក្រក់
ជួនខ្លះទៅប៉ះទង្គិចគ្នា ដល់និយាយពាក្យអាក្រក់ ឬភាសាគ្រោតគ្រាតទៅលើក្រុមម្ខាងទៀត ហើយកីឡាករនៅចេះគ្រប់គ្រងអារម្មណ៍ គឺពួកគេអនុវត្តវិធីនេះឯង ដើម្បីធានាថាពាក្យអស់នោះ អាចលឺដល់តែអ្នកដែលពួកគេចង់បញ្ចេញកំហឹងដាក់ប៉ុណ្ណោះ ជារួមមិនឲ្យខូចកិត្តិយសមុខមាត់ខ្លួនឯង ទៅកាន់អ្នកគាំទ្រនៅខាងក្រៅឡើយ។
១) កាយវិការបង្ហាញការប្រឆាំង
ធ្លាប់កើតមានថ្មីថ្មោងនៅ World Cup 2022 រវាងជំនួបអាល្លឺម៉ង់ និងជប៉ុន ដោយសមាជិកទាំងអស់របស់ក្រុមឥន្រ្ទីយ៍ដែកមកពីទ្វីបអឺរ៉ុប បានយកដៃខ្ទប់មាត់ ថតរូបមុនការប្រកួតចាប់ផ្តើម។
កាយវិការរបស់ពួកគេ ចង់ផ្ញើសារក្នុងន័យប្រឆាំងទៅកាន់ FIFA ជុំវិញការហាមឃាត់ប្រើប្រាស់ខ្សែដៃប្រធានក្រុម “One Love” គាំទ្រដល់ការស្រលាញ់ភេទដូចគ្នា។ នេះវាផ្ទុយស្រឡះពីការប្រកួតនៅលីគកំពូលអឺរ៉ុប រមែងត្រូវបានអនុញ្ញាតឥតប្រកែកឡើយ៕
ប្រភព៖ បរទេស