រដូវកាល Premier League ២០២២/២៣ នឹងត្រូវបិទបញ្ចប់នារាត្រីចុងសប្ដាហ៍សៅរ៍-អាទិត្យនេះ តែទោះយ៉ាងណាតំណែងនិងចំណាត់ថ្នាក់មួយចំនួន គឺបានសម្រេចជាមុនរួចរាល់ បើទោះបីសេសសល់ ១ ប្រកួតក្នុងដៃ។
៤ ក្លឹបបានកៅអី Champions League ឬចំណាត់ថ្នាក់ Top 4 រួមមាន Man City, Arsenal, Man United និង Newcastle United ស្របពេល ២ ក្លឹបបានកៅអី Europa League ឬចំណាត់ថ្នាក់ទី ៥ និងទី ៦ មាន Liverpool និង Brighton ហើយកៅអីលេខ ៧ វគ្គជម្រុះបឋម Europa Conference League គឺចាំអ៊ុតមើលរវាង Aston Villa, Tottenham ឬ Brentford។
ក៏ប៉ុន្តែ សំណួរចាក់ដោតមួយ បានរំលេចចេញពីមាត់អ្នកគាំទ្រជាច្រើនលើទំព័រ CTS Sports ដោយសួរមកថា៖ “បង! ចុះបើ Man City ឈ្នះពាន Champions League នៅខែក្រោយ អ៊ីចឹងមានន័យថា Liverpool នឹងទទួលបានកៅអីស្វ័យប្រវត្តិរដូវកាលក្រោយពិតឬអត់”? ចម្លើយមួយម៉ាត់យ៉ាងខ្លី៖ គឺអត់ទេ!!
ដល់តែអ៊ីចឹងផ្តើមឆ្ងល់ទៀតហើយ រួចចុះមួយកៅអីទំនេរក្នុងវគ្គចែកពូលនោះ នឹងត្រូវផ្ទេរទៅឲ្យក្លឹបណាវិញ បើ City កាន់ ២ កៅអីតែឯង? ជាការពិតសមាគមបាល់ទាត់អឺរ៉ុប UEFA បានផ្តល់កៅអីស្វ័យប្រវត្តិសម្រាប់ក្លឹបទាំង ២៦ ដោយឥតឆ្លងកាត់វគ្គជម្រុះចម្រាញ់បឋម Qualifying Round ឬ Play-off Round។ ២ កៅអីពិសេសក្នុងចំណោមនោះ គឺផ្តល់ជូនសម្រាប់ក្លឹបឈ្នះជើងឯករដូវកាលចាស់ នៃពាន UCL និង UEL។
ត្រង់ចំណុចនេះ មិនថាក្លឹបដឹកនាំដោយលោក Pep Guardiola ឬ Simone Inzaghi ក្នុងករណីដែលពួកគេឈរនៅចំណាត់ថ្នាក់ Top 4 បានកៅអីរួចរាល់ ដល់ហើយបន្ថែមកៅអីផ្សេងទៀតក្នុងនាមជាម្ចាស់ជើងឯក នោះការសម្រេច គឺរវាង City ឬ Inter Milan នឹងត្រូវឈរឈ្មោះនារដូវកាលបន្ទាប់ ក្នុងនាមជាក្លឹបឈ្នះពាន UCL ពោលមិនមែនជាក្លឹប Top 4 នៃលីគកំពូលអង់គ្លេស ឬអ៊ីតាលីឡើយ។
រួចហើយមួយកៅអីទំនេរ បានពីឈ្មោះក្លឹបមួយក្នុងចំណោមពីរនោះ គឺតាមច្បាប់បាល់ទាត់អឺរ៉ុប សម្រេចរុញទៅឲ្យក្លឹបឈ្នះជើងឯក នៃលីគកំពូលដែលមានពិន្ទុ UEFA Coefficient ខ្ពស់បំផុត ដែលមិនទទួលបានកៅអីស្វ័យប្រវត្តិ។ មានន័យថារដូវកាល ២០២៣/២៤ មួយកៅអីក្នុងវគ្គចែកពូល UCL គឺប្រគល់ទៅឲ្យក្លឹបឈ្នះជើងឯកលីគកំពូលអ៊ុយក្រែន Ukrainian Premier League ដោយភាគរយខ្ពស់សព្វថ្ងៃអាចជាក្លឹប Shakhtar Donetsk។
ដោយឡែកក្នុងលក្ខខណ្ឌតែមួយគត់ ដែលក្លឹបនៅអង់គ្លេសអាចទទួលបាន ៥ កៅអីនៅ Champions League នារដូវកាលតែមួយ គឺលុះត្រាណាតែក្លឹបឈ្នះជើងឯក UCL ឬ UEL រដូវកាលចាស់ ជាក្លឹបដែលឈរក្រៅចំណាត់ថ្នាក់ Top 4 មានន័យជាឧទាហរណ៍៖ ប្រសិនពាក់កណ្តាលខែមិថុនាខាងមុខ ម្ចាស់ជើងឯក UCL ជាក្លឹប Liverpool, Chelsea ឬ Spurs ម្ល៉េះទើបទៅរដូវកាលបន្ទាប់ អាចមានក្លឹបអង់គ្លេស ៥ ពោល ៤ ក្លឹបនៅកៅអី Top 4 និង ១ ក្លឹបនៅកៅអីនាមម្ចាស់ជើងឯកពានអឺរ៉ុបរដូវកាលចាស់។ ច្បាប់នេះក៏នឹងអនុវត្ តទៅលើបណ្តាលីគកំពូលដទៃៗទៀតដែរ៕
ប្រភព៖ បរទេស
