ក្នុងនាមជាតារាឆ្នើមលំដាប់ពិភពលោក ក៏រាប់ជា GOAT ល្អបំផុតគ្រប់ពេលវេលានៅប្រវត្តិសាស្រ្តបាល់ទាត់ ជាទូទៅ Cristiano Ronaldo មិនងាយលាន់មាត់សរសើរដល់ឈ្មោះកីឡាករចាស់ថ្មីរូបណាឡើយ ហើយមួយសារៗដែលវីរបុរសសញ្ជាតិព័រទុយហ្គាល់លើកឡើង ក៏ជាសម្តីនឹងត្រូវកត់ត្រាទុកចែកចាយពាសពេញបណ្តាញសង្គម។
វិលត្រលប់ទៅ ៦ ឆ្នាំមុន កាល ២០១៧ គ្រាជារជ្ជកាលមាសរបស់ CR7 នៅក្លឹបអធិរាជស Real Madrid ពេលនោះបន្ទាប់កាន់ពានកីឡាករល្អបំផុតប្រចាំទ្វីបអឺរ៉ុប UEFA Player of the Year ក៏លោកត្រូវបានគេសួរនាំ ឲ្យចុចឈ្មោះអនាគតកីឡាករដែលអាចស្នងជោគជ័យបន្តពីខ្លួន។
ជាការឆ្លើយតបកីឡាករជំនាញជើងស្តាំ បាននិយាយចំដល់ឈ្មោះអ្នកទាំង ៦ យ៉ាងដូច្នោះថា៖ “នេះជាសំណួរល្អ ខ្ញុំបានមើលឃើញកីឡាករពោរពេញដោយឥទ្ធិពលដែលពួកគេនឹងអាចទៅរួច តួយ៉ាងគឺ Asensio, Mbappe, Neymar, Dembele, Hazard, Rashford និងមួយចំនួនផ្សេងទៀត ជារួមទៅ បន្តសម័យកាលទៅមុខ យ៉ាងហោចណាស់ក៏មាន ១០ រូបដែរ”។
សារពេលវេលាមកទល់សព្វថ្ងៃ ការពិតមិនដូចការគិតរបស់ Ronaldo ទាំងស្រុងនោះទេ នេះ CTS Sports សូមធ្វើការសង្ខេបដំណើរអាជីពរបស់ពួកគេដូចតទៅ៖
៦) Marco Asensio
ល្បាក់ Ronaldo នៅលាន់មាត់សរសើរ ពេលនោះ Asensio មានអាយុ ២១ ឆ្នាំ គេក៏រៀបនឹងរះជាបណ្តើរៗ ដ្បិតអីជាប់ឈ្មោះជាកីឡាករវ័យក្មេងបង្អស់ លំដាប់ទី ៤ រកបានគ្រាប់បាល់នៅវគ្គផ្តាច់ព្រ័ត្រ UCL។ លុះទល់សព្វថ្ងៃគឺផ្ទុយស្រឡះ អាជីពកាន់តែស្រុតចុះ ពេលវេលាលើទីលានកាន់តែថមថយ ហើយប្រុងនឹងចាកចេញនៅលក្ខខណ្ឌឥតតម្លៃខ្លួន ពី Real Madrid កំឡុងរដូវក្តៅខាងមុខ។
៥) Kylian Mbappe
នេះរាប់ជាការទស្សន៍ទាយត្រូវ ព្រោះបន្ទាប់ការលើកឡើងរបស់ Ronaldo ឃើញថាយុវជនសញ្ជាតិបារាំងបានធំធាត់ផ្លែផ្កាក្នុងអាជីព បន្តបន្ទាប់រៀងរាល់ឆ្នាំ។ បានលើកទាំងពាន World Cup 2018 ជាមួយបារាំង ហើយក៏ជាប់ឈ្មោះជាម៉ាស៊ីនស៊ុតច្រើនគ្រាប់បំផុតក្នុងប្រវត្តិសាស្រ្តក្លឹប PSG។
៤) Neymar Jr
ការទស្សន៍ទាយគឺចំពេល Neymar ផ្ទេរមក PSG ថ្មីថ្មោង តែលទ្ធផលសម្រេចក្រោយៗមក មិនបានទាំងពានរង្វាន់ធំជាមួយក្លឹប ដូចគ្នាពានឯកត្តជននានា Ballon d’Or ក៏មិនទាន់ស្គាល់ជាតិដែរ។ ជួនពេលអាយុកាន់តែជ្រេចូល ៣១ ឆ្នាំ បូកផ្សំរបួសញាំញីឥតឈប់ ម្ល៉េះការឡើងទៅចំណុចខ្ពស់ដូចការគិតរបស់ CR7 ក៏រំពឹងឥតអាចទៅរួចនោះដែរ។
៣) Ousmane Dembele
នៅថ្ងៃដែល Ronaldo ចុចឈ្មោះ Dembele គឺជាពេលវេលាដែលកីឡាករបារាំងផ្ទេរមក Camp Nou នៅតម្លៃកំណត់ត្រា ១៤០ លានអឺរ៉ូ។ អាជីពរបស់គេ មិនជានឹងនរ ជាមួយក្លឹបបច្ចុប្បន្នឡើយ តែអំពីគុណភាពលើទីលាន ឃើញថានៅមានពិតៗ គ្រាន់ត្រូវរាំងស្ទះដោយសាររបួស។ ក៏ប៉ុន្តែកត្តាអាយុនៅត្រឹម ២៦ ឆ្នាំ ម្ល៉េះយើងក៏មិនទាន់អាចមើលស្រាលអាជីពរបស់ខ្សែប្រយុទ្ធស្លាបរូបនេះបានដែរ។
២) Eden Hazard
កាល ២០១៨ នរណាមិនស្គាល់ Hazard សុទ្ធតែអ្នកមិនដែលតាមដានបាល់អឺរ៉ុប។ ការទស្សន៍ទាយរបស់ CR7 ត្រឹមត្រូវតែមួយឆ្នាំដំបូង លុះក្រោយៗពេលផ្ទេរមកអធិរាជស កុំថាឡើយស្នងតំណែង Ronaldo នេះស្នងត្រឹមសមិទ្ធផលខ្លួនឯងធ្លាប់ធ្វើបាននៅ Chelsea ក៏កីឡាករបែលហ្សិកបង្ហាញមិនកើតផង។ សុពលភាពកុងត្រានឹងត្រូវផុតពាក់កណ្តាលឆ្នាំក្រោយ រីឯកត្តាអាយុក៏នឹងហៀរចូល ៣៣ ឆ្នាំ ម្ល៉េះការស្រោចស្រង់ត្រលប់មកវិញ ពិតជារឿងពិបាក។
១) Marcus Rashford
មិនសូវខុសនឹងករណី Dembele អាជីពរបស់ Rashford មានឡើងមានចុះ ដោយសាររបួសញាំញី តែយ៉ាងណាដល់ពេលវេលាចុងក្រោយ កីឡាករអង់គ្លេសហាក់រកឃើញខ្លួនឯងកាន់តែច្បាស់ ជាមួយនឹងការពង្រឹងបន្ថែម ក្រោមដំណើរត្រួសត្រាយរបស់អ្នកចាត់ការ Erik ten Hag។
បុរសវ័យ ២៥ ឆ្នាំ កំពុងចារកំណត់ត្រាគួរឲ្យចាប់អារម្មណ៍ជាច្រើន ជុំវិញស្ថិតិគ្រាប់បាល់ ហើយក៏ដាក់គោលដៅជាមួយបេសកកម្ម Champions League នៅរដូវកាលបន្ទាប់៕
ប្រភព៖ បរទេស