នៅសល់ត្រឹមរយៈពេលជាង ២ សប្តាហ៍ទៀតប៉ុណ្ណោះ ការប្រកួតវគ្គផ្តាច់ព្រ័ត្រពានរង្វាន់ Champions League នឹងចូលមកដល់ ហើយលើទំព័រ CTS SPORT ដែលបងប្អូនកំពុងស្តាប់ ក៏នឹងមានផ្សាយបន្តផ្ទាល់ជំនួបពិសេសនោះផងដែរ ម្ល៉េះក៏ឆ្លៀតចុច Follow ជាការចំណាំទុកម្នាក់មួយឲ្យហើយទៅ។
Inter Milan នឹងត្រូវតទល់ Manchester City ក្នុងដំណើរឆ្ពោះទៅការលើកពានរង្វាន់ ៣ នារដូវកាលតែមួយដូចគ្នា ដ្បិតអីកន្លងទៅក្លឹបអ៊ីតាលី បានឈ្នះ Supercoppa និង Coppa Italia រួចរាល់ ហើយរង់ចាំអ៊ុតមើលឱកាសនៅ Champions League មួយប្រកួតទៀត ដោយឡែកងាកទៅក្លឹបអង់គ្លេស បានឈ្នះពានធំ Premier League នៅឡើយ FA Cup និង UCL ត្រូវកាត់សេចក្តីត្រឹមមួយប្រកួតរៀងគ្នា នាខែក្រោយ។
ឥឡូវយើងងាកមកមតិយល់ឃើញរបស់កីឡាករក្លឹប Real Madrid គឺអ្នកចាំទី Thibaut Courtois បើទោះបីក្លឹបគេចាញ់ តែនៅប្រកួតខាងមុខ សេសសល់កីឡាកររួមសញ្ជាតិបែលហ្សិក ២ រូប ហើយក៏ជាឱកាសដំបូងរបស់អ្នកទាំងពីរ ក្នុងការក្រសោបឱបពានប្រចាំទ្វីប Champions League លើកទីមួយក្នុងអាជីព។
ដូចគ្នាយើងបានដឹង នោះគឺខ្សែបម្រើ Kevin de Bruyne របស់ City ត្រូវមកតតាំងមិត្តរួមជម្រើសជាតិ គឺខ្សែប្រយុទ្ធ Romelu Lukaku របស់ Inter។ រួចបើសួរថា ចុះមតិយល់ឃើញរបស់ Courtois ចង់ឲ្យក្លឹបមួយណាកាន់ពានជាង? ចម្លើយ បានឆ្លើយឥតស្ទាក់ស្ទើរត្រង់ការជ្រើសយកក្លឹបមកពីទីក្រុង Milan ជាជាងក្លឹបដែលបានទម្លាក់ខ្លួនកាលពីពាក់កណ្តាលខែ។
ចំពោះហេតុផលមិនបានទាក់ទងនឹងជីវិតឯកជន ឬរឿងអាស្រូវដណ្តើមមិត្តស្រីកាលពីជិត ១០ ឆ្នាំមុនឡើយ ផ្ទុយទៅវិញ Courtois បានសង្កត់ធ្ងន់ ថាមកពីចំណងមិត្តភាពរវាង Lukaku ជិតដិតជាងជាមួយ De Bruyne។ នេះបើនិយាយនូវរយៈពេលលេងឲ្យប្រទេសកំណើតរួមគ្នា អ្នកទាំងបី បានសហការគ្នាជាង ១ ទសវត្សប្រហែលគ្នា តែពិសេសត្រង់អ្នកចាំទីវ័យ ៣១ ឆ្នាំ ធ្លាប់ឆ្លងកាត់ពេលវេលាឈរជើងរួមក្លឹបតែមួយ ជាមួយនឹងខ្សែប្រយុទ្ធវ័យ ៣០ ឆ្នាំ កាលនៅ Chelsea ល្បាក់ ២០១១ ដល់ ២០១៤។
ប្រាប់នៅបទសម្ភាសន៍ឲ្យ Prime Video អ្នកចាំទីក្លឹបស្តេចស បានលើកឡើង៖ “ខ្ញុំសង្ឃឹមថា Romelu [Lukaku] នឹងអាចឈ្នះពាន UCL ជាការពិតការលើកឡើងនេះ ដូចខ្ញុំប្រឆាំងនឹង Kevin [de Bruyne] តែវាត្រង់ថា ខ្ញុំបានស្គាល់ Lukaku នៅរយៈពេលយូរជាងបន្តិច”។
រំឭកឲ្យបងប្អូនបានដឹងដែរថា ទាញទៅរឿងរ៉ាវខាងក្រៅទីលាន ដើមឡើយ Courtois និង De Bruyne ធ្លាប់ប៉ះទង្គិចគ្នា នៅពេលកីឡាករលេងតំណែងបម្រើ បែកបាក់មិត្តស្រី Caroline Lijnen ដែលតាមទៅរស់នៅជាមួយអ្នកចាំទីបែលហ្សិក ហើយអត់និយាយចូលគ្នាអស់រយៈកាលច្រើនឆ្នាំ មុនមកត្រូវរ៉ូវជាថ្មីនៅប៉ុន្មានឆ្នាំក្រោយ ស្របពេលទីបញ្ចប់បានបែកបាក់ រកបានមនុស្សស្រីដទៃជាគូជីវិតរៀងខ្លួន។
បញ្ជាក់ ស្ថិតិឈរជើងរបស់ Lukaku រដូវកាលនេះ ៣៤ ប្រកួត ក៏រកបាន ១៣ គ្រាប់និង Assist ៦ លើក ហើយក៏នឹងទទួលបានមេដាយនាមម្ចាស់ជើងឯកផងដែរ ដ្បិតបើស្ថិតក្រោមការគ្រប់គ្រងរបស់ក្លឹបអាណាព្យាបាល Chelsea។ ចំណែក De Bruyne សកម្មខ្លាំងដល់ ៤៧ ប្រកួត ក៏រកបាន ១០ គ្រាប់និង Assist ២៨ លើកឯណោះ៕
ប្រភព៖ បរទេស