បើអ្នកជាអ្នកគាំទ្របាល់ទាត់កាន់ឆ្នាំ ក៏ជាអ្នកនិយមទស្សនាការប្រកួតពានរង្វាន់អឺរ៉ុប Champions League រៀងរាល់រដូវកាល ក៏ជឿថា ប្រាកដមានការងឿងឆ្ងល់ជាក់ជាមិនខាន ដោយសួរហេតុអ្វីបណ្តាក្លឹបបាល់ទាត់មួយចំនួនមានសិទ្ធអាចបំពាក់ផ្លាកសញ្ញានាមម្ចាស់ជើងឯក UCL ជាមួយតួលេខដែលពួកគេឈ្នះ និងក្លឹបមួយចំនួនផ្សេងទៀត បានឈ្នះ UCL ជាហូរហែដែរ តែបែរគ្មានសិទ្ធទៅវិញ។
នេះ CTS Sports សូមផ្សារភ្ជាប់មកកាន់វគ្គផ្ដាច់ព្រ័ត្ររដូវកាល ២០២២/២៣ ដែល Manchester City ត្រូវប៉ះ Inter Milan នៅវេលាទាបភ្លឺ ឈានចូលថ្ងៃទី ១១ មិថុនា ដោយបញ្ជាក់ជាមុនថា ចំណោមក្លឹបទាំងពីរមិនថាក្លឹបណាមួយ បើទោះបីឈ្នះជើងឯក ក៏រដូវកាលក្រោយ ពួកគេមិនមានសិទ្ធបំពាក់ស្លាកសញ្ញានាមក្លឹបជាម្ចាស់ពានរបស់ UEFA ដូចក្លឹប Real Madrid ឬ Liverpool ជាដើមនោះដែរ។
សួរថាតើមកពីមូលហេតុអ្វីទៅ? ពួកយើងធ្វើការបកស្រាយ ឲ្យងាយយល់ ងាយស្តាប់បំផុត នោះគឺត្រង់វាជាច្បាប់កំណត់របស់សមាគមបាល់ទាត់អឺរ៉ុប ដោយដាក់កំហិតឥតកែប្រែបាន ត្រង់ការបំពាក់ផ្លាកសញ្ញានាមម្ចាស់ជើងឯកទៅលើអាវ អាចធ្វើបានតែសម្រាប់ក្លឹបបានឈ្នះពានរង្វាន់ UCL យ៉ាងហោចណាស់ ៥ សម័យកាល ឬឈ្នះ UCL ៣ សម័យកាលជាប់ៗគ្នា។
ជាការពិតចាប់តាំងការបង្កើតឡើងនៅពាន European Cup ក្នុងឆ្នាំ ១៩៥៦ និងប្តូរឈ្មោះមកជា Champions League នៅ ឆ្នាំ ១៩៩១ មានដល់ទៅ ២២ ក្លឹបធ្លាប់បានឈ្នះពានរង្វាន់ តែមាន ៧ ក្លឹបប៉ុណ្ណោះ អាចបំពាក់ផ្លាកសញ្ញាដ៏ពិសេស និងមានតម្លៃមួយនោះបាន។
តួយ៉ាងគឺ Real Madrid ជាម្ចាស់ជើងឯក ១៤ សម័យកាល, AC Milan ៧ សម័យកាល, Barcelona, Bayern Munich និង Liverpool ៥ សម័យកាល។ ដោយឡែកបង្វែរទៅក្លឹបធ្លាប់បានឈ្នះ ៣ សម័យកាលជាប់ រួមមាន Ajax នៅឆ្នាំ ១៩៧១,៧២ និង ៧៣ ដូចគ្នានឹង Bayern Munich នៅឆ្នាំ ១៩៧៤,៧៥ និង ៧៦ ហើយ Real Madrid ជាន់គ្នានេះដែរ ធ្វើបានលើកចុងក្រោយនៅឆ្នាំ ២០១៦,១៧ និង ១៨។
ត្រង់ហេតុផលនេះ បើយើងមកគិតគូរជាមួយ Man City បើឈ្នះនៅរដូវកាល ២០២២/២៣ គឺជាលើកដំបូង ឬទើបតែលើកទី ១ ប៉ុណ្ណោះក្នុងប្រវត្តិសាស្ត្ររបស់ពួកគេ ដូច្នេះត្រូវការ ៤ លើកទៀត ទើបអាចឈោងដល់ការបំពាក់ផ្លាកពិសេសនោះបាន។ ចំណែកក្លឹបអ៊ីតាលី Inter Milan កន្លងមកពួកគេឈ្នះ ៣ លើក បើថែមសារនេះ ក៏ទើបតែបាន ៤ លើកប៉ុណ្ណោះឯង។
បើឆ្វែលទៅពានលំដាប់ពីរ UEFA Europa League ក៏ឥតខុសគ្នានឹងពានរង្វាន់រៀមច្បងខាងលើនោះដែរ គឺយ៉ាងហោចណាស់ឈ្នះជើងឯក ៥ សម័យ ឬឈ្នះជាប់ៗគ្នា ៣ សម័យកាល។ សព្វថ្ងៃមានតែក្លឹប Sevilla មួយប៉ុណ្ណោះ ដែលគ្រប់លក្ខខណ្ឌ ទាំងចំនួនពាន ទាំងការឈ្នះបីឆ្នាំជាប់ បន្ទាប់ការគ្រោងលើកចុងក្រោយទី ៦ កាលឆ្នាំ ២០២០ ហើយក៏រំពឹងឈានមកឈោងយកឱកាសលើកទី ៧ នៅឆ្នាំ ២០២៣ នេះ។
ក្លឹបបន្ទាប់ផ្សេងទៀត ដែលអាចដាក់គោលដៅកៀកបំផុតមាន Inter Milan, Liverpool, Juventus និង Atletico Madrid ធ្លាប់ឈ្នះ ៣ លើក។
ចុងក្រោយសូមកុំភ្លេចចុច Follow ឬដាក់ See First ទុកម្នាក់មួយឲ្យហើយទៅជាមួយទំព័រ CTS SPORTS ដើម្បីរង់ចាំការទស្សនាជំនួបវគ្គផ្តាច់ព្រ័ត្រពានរង្វាន់ UCL និង UEL នៅល្បាក់ដើមខែ និងពាក់កណ្តាលខែមិថុនាខាងមុខ៕
ប្រភព៖ បរទេស