ឈរជើងនៅជិត ៣០០ ប្រកួត ក្នុងអាជីពជាកីឡាករបាល់ទាត់ជិត ៦ ឆ្នាំមកនេះ កាលពីយប់មិញនៅជំនួបទល់ Valencia គឺជាពេលវេលាលើកដំបូង ដែល Vinicius Jr ស្គាល់ជាតិរងការពិន័យកាតក្រហម ហើយកំហុសសារនេះ ពុំបានកើតឡើងដោយការប៉ះទង្គិចឬស្លាយទៅលើគូប្រជែងអ្វីនោះទេ ផ្ទុយទៅវិញ គឺកើតឡើងដោយសារទង្វើព្យាយាមទាមទារភាពត្រឹមត្រូវ និងបញ្ឈប់ការរើសអើងពណ៌សម្បុរ។
រឿងហេតុចាប់កើតឡើងនៅនាទី ៧០ ក្នុងជំនួបក្របខ័ណ្ឌ La Liga នៅពេលការប្រកួតបានផ្អាក គ្រា Vinicius រត់ទៅហៅអាជ្ញាកណ្តាល ហើយមកចង្អុលនិងស្រែកទៅតំបន់អ្នកគាំទ្រ Valencia នៅកីឡដ្ឋាន Mestalla ដែលកីឡាករវ័យ ២២ ឆ្នាំអះអាងថាខ្លួន បានទទួលរងពាក្យរើសអើង ប្រមាថឥតឈប់ពីពួកគេទាំងអស់នោះ។
សកម្មភាពមិនត្រូវបានបញ្ឈប់ ហើយកម្តៅឡើងកាន់តែខ្លាំង បន្ទាប់កីឡាករ Real Madrid សំដៅចូលទៅជួយតវ៉ា ស្រែកដាក់អ្នកគាំទ្រក្លឹបម្ចាស់ផ្ទះ ស្របពេលសមាជិកក្លឹប Valencia បានព្យាយាមចូលទៅសម្រួលស្ថានការណ៍។ មួយរំពេចក្រោយ វាបានស្ងប់ទៅវិញបន្តិច ហើយអ្នកចាត់ការលោក Carlo Ancelotti ព្យាយាមនិយាយលួងចិត្តឲ្យ Vinicius បន្តឈរជើងក្នុងការប្រកួត ដ្បិតបើកីឡាករអះអាងចង់ដើរចេញ ចង់បញ្ឈប់ការប្រកួតដោយឯកឯង ជួនពេល Thibaut Courtois ពេលនោះ ក្នុងនាមជាមិត្តរួមក្លឹប ជាអ្នកប្រឆាំងកាយវិការរើសអើង ក៏និយាយច្បាស់ដែរ បើ Vinicius ដើរចេញ ខ្លួនក៏នឹងដើរចេញពីការប្រកួតដូចគ្នា។
ជាលទ្ធផលវាបានបន្តដោយភាពស្ងាត់ស្ងៀមជាង ១០ នាទី មុនកំហឹងផ្ទុះឡើងជាថ្មី នៅកៀកបញ្ចប់ការប្រកួត ដល់អ្នកចាំទី Giorgi Mamardashvili និងកីឡាករបម្រុង Hugo Duro មករុញ មកច្រាន Vinicius ហើយអាជ្ញាកណ្តាលសម្រេចផ្តល់កាតលឿង ឲ្យ Vinicius និង Mamardashvili តែក្រោយពិនិត្យ VAR មួយរំពេចក្រោយនោះ ក៏សម្រេចជាថ្មី គឺពិន័យកាតក្រហមដោយផ្ទាល់តែម្តង ដល់កីឡាករប្រេស៊ីល វាជាកាតក្រហមលើកទីមួយក្នុងអាជីពរបស់គេ។
បន្ទាប់ចប់ការប្រកួត ការបរាជ័យរបស់ Real Madrid គឺជារឿងមួយឡែក តែអ្នកចាត់ការលោក Carlo Ancelotti បានលើកឡើង៖ “ខ្ញុំអត់ចង់និយាយទេ បាល់ទាត់សព្វថ្ងៃវាគ្មានន័យអីទាំងអស់ ខ្ញុំប្រាប់អាជ្ញាកណ្តាលពេលនោះ ថាគាត់គួរតែបញ្ឈប់ការប្រកួតនេះតែម្តងទៅ នេះមនុស្សសឹងមួយកីឡដ្ឋានបានស្រែករើសអើងមកកាន់កីឡាករ ខ្ញុំនៅតែប្រកាន់គោលជំហរនេះដូចគ្នា បើទោះបីក្រុមខ្ញុំឈ្នះ ៣-០ ក៏ដោយ”។
ស្របពេលដែល Vinicius សាមីខ្លួនរងការរើសអើង ដល់ស្រក់ទឹកភ្នែក ក៏បានលើកឡើង៖ “នេះមិនមែនជាលើកទី ១ ទី ២ ឬទី ៣ ទេ តែច្រើនលើកច្រើនសារមកហើយ ការរើសអើងយូរទៅវាក្លាយជាទង្វើធម្មតានៅ La Liga នេះសហព័ន្ធបាល់ទាត់អេស្ប៉ាញ បែរគិតថាវាជារឿងធម្មតា ដូចគ្នានឹងខាងក្លឹបគូប្រជែង បែរជាគាំទ្រឲ្យរឿងនេះឲ្យកើតឡើងទៅវិញ”។
“ខ្ញុំមានការសោកស្តាយណាស់ កន្លែងឈ្នះពានរង្វាន់ធ្លាប់ជារបស់ Ronaldinho, Ronaldo Nazario, Cristiano Ronaldo និង Lionel Messi បែរថ្ងៃនេះ ប្រែមកក្លាយជាកន្លែងរើសអើងគ្នាទៅវិញ ខ្ញុំសុំទោសសម្រាប់បងប្អូនជនជាតិអេស្ប៉ាញដែលមិនយល់ស្រប តែខ្ញុំសុំនិយាយដោយច្បាស់ថា នៅទឹកដីប្រេស៊ីលសព្វថ្ងៃ រាប់ចូលអេស្ប៉ាញជាប្រទេសដែលមានការរើសអើងខ្ពស់បំផុត”។
គួរឲ្យដឹងថា បន្ទាប់កើតមានរឿងនេះឡើង ក៏មានកីឡាកររួមអាជីព ទាំងក្នុងនិងក្រៅក្លឹបជាបន្តបន្ទាប់ បានបង្ហាញសារគាំទ្រ ការលើកទឹកចិត្តដល់ Vinicius តួយ៉ាងដូចសមាជិកមួយផ្នែកធំរបស់ Real Madrid រួមទាំង Kylian Mbappe, Neymar Jr, Achraf Hakimi, Riyad Mahrez, Richarlison, Reece James និងលោក Rio Ferdinand ជាដើម បានកៀរគរ Mention កំពូលកីឡាករជាច្រើន ឲ្យបន្តគាំទ្រ និងបញ្ឈប់ទង្វើរើសអើងពណ៌សម្បុរនៅគ្រប់សកម្មភាពជាបន្ទាន់៕
ប្រភព៖ បរទេស