គ្មានការជួបជុំណា ដែលថាមិនមានការបែកបាក់នោះឡើយ ឆ្នាំនេះឈរជើងរួមគ្នា ឆ្នាំក្រោយអាចចាកចេញ ក្លាយជាគូប្រជែងក៏មាន។ លើសតែពីលទ្ធផលឈ្នះចាញ់ បាល់ទាត់ក៏អាចឲ្យមនុស្សស្រក់ទឹកភ្នែកបានដែរ ជាពិសេសនៅថ្ងៃត្រូវដើរចេញពីក្លឹបកាន់ឆ្នាំ ក៏ឥតខុសពីផ្ទះដែលបានរួមរស់អស់ច្រើនរដូវកាល។
ជាដំណឹងផ្លូវការ កីឡាករឈរជើងឲ្យក្លឹបកាន់ឆ្នាំទាំង ៥ រូប បានប្រកាសអំពីដំណើរចែកផ្លូវ ក្រោមហេតុផលផុតសុពលភាពកុងត្រា រួចពុំមានការបន្តថ្មី៖
៥) Milan Skriniar
ជញ្ជាំងការពារដ៏រឹងមាំរបស់ក្លឹបអ៊ីតាលី Inter Milan បានមកចុះចូលនៅរដូវក្តៅ ឆ្នាំ ២០១៧ ហើយគិតមកទល់បច្ចុប្បន្ន ឆ្លងកាត់រយៈពេល ៦ ឆ្នាំ។ កំឡុងពេលឡើងជើងខ្លាំង កីឡាករសញ្ជាតិស្លូវ៉ាគី ក៏ធ្លាប់ត្រូវបានក្លឹបធំៗជាច្រើនតាមចែចូវ ចង់ថ្ពក់ចេញពីទឹកដី San Siro តួយ៉ាងមានតាំងពី Barcelona តែគេនៅដាក់ឆន្ទៈស្មោះស្ម័គ្រ ឈរជើងជាមួយក្លឹបមកទល់ថ្ងៃចុងក្រោយ។
មិនទាន់មានដំណឹងអំពីទ្រនំបន្ទាប់របស់ Skriniar ដោយនេះទំនងរង់ចាំដល់បញ្ចប់ភារកិច្ចធំ ការតតាំង Man City នៅវគ្គផ្ដាច់ព្រ័ត្រ Champions League សិនក៏ថាបាន។
៤) Roberto Frimino
តារាឆ្នើមសញ្ជាតិប្រេស៊ីល ទើបតែរកបានគ្រាប់បាល់សំខាន់ឲ្យ Liverpool តាមស្មើ Aston Villa នៅសល់ដង្ហើម Champions League ក៏ប៉ុន្តែពេលវេលានៅមុខអ្នកគាំទ្រក្នុងទឹកដី Anfield គឺបានបញ្ចប់រួចរាល់។
ក្នុងនាមជាកូនប្រុស Firmino បានស្រក់ទឹកភ្នែក នៅអត្ថន័យបង្កប់ទៅដោយការនឹករលឹក ការចងចាំអនុស្សាវរីយ៍ល្អៗ ជាមួយក្លឹប Liverpool ដែលបានឈរជើងតាំងរដូវក្តៅ ឆ្នាំ ២០១៥។ តាមចចាមអារ៉ាមទ្រនំបន្ទាប់របស់កីឡាករវ័យ ៣១ ឆ្នាំ ទំនងផ្លាស់ទៅចូលរួមជាមួយក្លឹបស្ថិតក្នុងប្រទេសអារ៉ាប៊ីសាអូឌីត។
៣) James Milner
មិនខុសពី Firmino សម្រាប់ Milner ក៏ចាកចេញនៅរដូវក្តៅខាងមុខតែមួយដូចគ្នា បន្ទាប់រួមរស់តាំងឆ្នាំ ២០១៥។ យ៉ាងណាខ្សែបម្រើចាស់វស្សាខាងលើ ក៏ទទួលបានការលាដ៏កក់ក្តៅផងដែរ នៅប្រកួតលើកចុងក្រោយក្នុងទឹកដី Anfield មុនការចែកផ្លូវ។ តាមការចុះផ្សាយរបស់សារព័ត៌មាន Sky Sports ក្លឹបរួមលីគ Brighton ទំនងជាផ្ទះថ្មី របស់កីឡាករវ័យ ៣៧ ឆ្នាំ។
២) Phil Jones
នៅប៉ុន្មានរដូវកាលចុងក្រោយ ទោះមិនសូវបានលេងជាប់លាប់ ក៏កីឡាករអង់គ្លេសនៅបន្តស្ម័គ្រស្មោះជាមួយក្លឹបម្ចាស់ដី Old Trafford តែយ៉ាងណារដូវក្តៅ ២០២៣ នៅតែជាពេលវេលាឥតអាចប្រកែកបាន អំពីដែនបញ្ចប់របស់ Jones។ មកចូលរួមតាំងឆ្នាំ ២០១១ សរុបគឺរយៈពេល ១២ ឆ្នាំ ជាក្លឹបទីពីរក្នុងអាជីពបន្ទាប់ Blackburn Rovers។
១) Sergio Busquets
អ្នកដែលគួរឲ្យសោកស្តាយបំផុត ក្នុងចំណោមអ្នកទាំង ៥ គឺជាតារាចាស់វស្សា Busquets ដ្បិតអី Barcelona ជាក្លឹបតែមួយគត់ក្នុងអាជីពរបស់លោកតាំងតែពីដើមមក។ នេះបើរាប់ទាំងជាមួយឈុតថ្នាលចូលជិត ២ ទសវត្ស បើជាមួយឈុតធំ គឺរយៈពេល ១៥ ឆ្នាំពេញ មុនប្រកាសចាកចេញ។
កាដូចុងក្រោយសម្រាប់កីឡាករអេស្ប៉ាញ គឺពានរង្វាន់ La Liga ដែលទើបឈ្នះថ្មីថ្មោង ហើយអំពីទ្រនំបន្ទាប់ ល្ហៀងៗអាចជាផ្លាស់ទៅក្លឹបនៅមជ្ឈិមបូព៌ា ឬខាងប៉ែកសហរដ្ឋអាមេរិក មុនការចូលនិវត្ត៕
ប្រភព៖ បរទេស