ជួនខ្លះ ស្ថានភាពខ្លះការបរាជ័យមិនសុទ្ធតែជាកំហុស ឬចន្លោះប្រហោងរបស់បុគ្គលជាកីឡាករតែម្នាក់នោះទេ ផ្ទុយទៅវិញ វាអាចមកពីកត្តាខាងក្រោយជាច្រើន ដែលពិបាកនឹងបកស្រាយ។ យ៉ាងណាងាកមកកីឡាករទាំង ៣ រូប អតីតកាលធ្លាប់ជាសមាជិកបិសាចក្រហម Manchester United មិនធ្លាប់ស្គាល់ជាតិសូម្បីវគ្គ ៤ ក្រុម Champions League លុះដល់តែផ្លាស់មកកាន់ទ្រនំថ្មីរួមគ្នា បែរអាចឈោងដល់ក្តីស្រមៃធំ គឺឈរជើងនៅវគ្គផ្តាច់ព្រ័ត្រ ឬវគ្គដណ្តើមពានរង្វាន់ទៀតផង៖
៣) Henrikh Mkhitaryan
ចាយពេលឈរជើងនៅទឹកដី Old Trafford រយៈពេល ១ ឆ្នាំកន្លះ រួចសមិទ្ធផលអស់ធំគឺការឈ្នះជើងឯក Europa League មុនជ្រើសការចាកចេញនៅរដូវរងា ២០១៨ ទៅកាន់ក្លឹប Arsenal។ យ៉ាងណាការឈរជើងនៅក្លឹបក្នុងទឹកដីអង់គ្លេស មិនកើតជាផល ដែលកីឡាករអាមេនីចង់បាននោះឡើយ រួចធ្លាប់លើកឡើង ថាខ្លួនមិនអាចសម្របខ្លួនបានល្អ ជាហេតុនាំឲ្យជ្រើសការផ្ទេរមកកាន់ក្លឹបអ៊ីតាលី AS Roma និង Inter Milan នាពេលចុងក្រោយ។
ខ្សែបម្រើ Mkhitaryan បានជោគជ័យខ្លាំងជាមួយក្លឹបស្ថិតក្នុងទីក្រុង Milan ស្ថិតិរដូវកាលនេះ នៅ UCL ១២ ប្រកួត ក៏រកបាន ២ គ្រាប់ ហៅជាចំណែកធំ ជួយក្លឹបឆ្ពោះមកកាន់វគ្គចុងក្រោយ។
២) Romelu Lukaku
រងការរិះគន់ឥតល្ហែនៅ United ជាហេតុនាំឲ្យកីឡាករជ្រើសការផ្ទេរចេញ មកកាន់ក្លឹបអ៊ីតាលី មុនបំបែកកំណត់ត្រាតម្លៃផ្ទេររយលាន វិលចូល Chelsea។ យ៉ាងណាពេលចុងក្រោយបែរខ្ចីជើងមកចូលរួមនៅ Inter Milan ដដែល ក៏ចំពេលបានឡើងដល់វគ្គសំខាន់ Champions League។
ក្រោមការដឹកនាំរបស់លោក Simone Inzaghi តារាឆ្នើមសញ្ជាតិបែលហ្សិកក៏រកបាន ៣ គ្រាប់និង Assist ១ ផងដែរ នៅ ៧ ប្រកួតក្នុងក្របខ័ណ្ឌអឺរ៉ុប ហើយឱកាសសារនេះ ក៏អាចនឹងស្គាល់ជាតិកាន់ពានលើកដំបូងក្នុងអាជីព។
១) Matteo Darmian
ក៏ជាកីឡាករធ្លាប់ឈរជើងឲ្យ United ល្បាក់សម័យកាល Lukaku និង Mkhitaryan ដូចគ្នា ហើយបានជ្រើសការផ្ទេរចេញមកក្លឹបនៅប្រទេសកំណើត នារដូវក្តៅឆ្នាំ ២០១៩។ ដំបូងជាមួយ Parma ក្រោយមកជាមួយ Inter ដល់ក្លាយជាតារាចាស់វស្សារះឡើងជាថ្មី បង្ហាញខ្លួនជាប់លាប់ដល់ ៣ ពាន់នាទីរដូវកាលនេះ។
ខ្សែការពារស្លាបស្តាំ វ័យ ៣៣ ឆ្នាំ ក៏មិនធ្លាប់ស្គាល់ជាតិឈ្នះពាន UCL នោះដែរ ម្ល៉េះហើយសារនេះ វាជាឱកាសដ៏ធំមិនធ្លាប់មានក្នុងអាជីព។
រំឭកឲ្យដឹងដែរថា ក្លឹបអ៊ីតាលី Inter Milan បានខកខានឡើងមកដល់វគ្គផ្តាច់ព្រ័ត្រ តាំងឆ្នាំ ២០១០ ជារួមគឺ ១៣ ឆ្នាំមកហើយ តាំងកាលជំនាន់ Jose Mourinho នៅដឹកនាំ សារនោះបានយកឈ្នះ Bayern Munich ២-០។ ដោយឡែក ២០២៣ ពួកគេនឹងត្រូវជួបរវាងគីឡូធ្ងន់មកពីអេស្ប៉ាញ Real Madrid ឬមកពីអង់គ្លេស Manchester City ស៊ីសងលើលទ្ធផលសម្រេចការប្រកួតជើងទី ២ នារាត្រីនេះ មានផ្សាយបន្តផ្ទាល់លើទំព័រ CTS Sports៕
ប្រភព៖ បរទេស