កន្លងទៅថ្មីៗនេះបានផ្ទុះព័ត៌មានគួរឲ្យចាប់អារម្មណ៍ ពាក់ព័ន្ធអនាគតខ្សែប្រយុទ្ធវ័យក្មេង Rafael Leao ជាមួយក្លឹប AC Milan ជុំវិញការចុះហត្ថលេខាលើកុងត្រាថ្មី ដល់ចុងខែមិថុនា ឆ្នាំ ២០២៨ អមនឹងប្រាក់ឈ្នួលខ្ពស់ជាងមុន ៥ លានអឺរ៉ូ/ឆ្នាំ រីឯតម្លៃផ្តាច់កុងត្រា ឬ Release Clause ក៏ដាក់កប់ពពក ១៧៥ លានអឺរ៉ូជាកំហិត។ នេះបើតាមអ្នករាយការណ៍ Fabrizio Romano បានចុះផ្សាយ។
ក៏ជឿថា ក្រៅតែពីគុណភាព ទេពកោសល្យ ដល់ស្នាមញញឹមដែលតែងតែរំលេចរាល់គ្រប់សកម្មភាពលើទីលាន ពិតណាស់បងប្អូនយើងភាគច្រើន នឹងមិនធ្លាប់បានដឹងនោះទេ អំពីរឿងរ៉ាវអាថ៌កំបាំងគួរឲ្យចាប់អារម្មណ៍ ៥ ទាក់ទិនកីឡាករព័រទុយហ្គាល់ខាងលើ៖
៥) ជម្រើសជាតិអាចឈរឈ្មោះ ក្រៅពីព័រទុយហ្គាល់
Leao បានតំណាងឲ្យព័រទុយហ្គាល់ ហើយក៏ឈរជើងលើសចំនួនប្រកួតដែល FIFA អនុញ្ញាតឲ្យផ្លាស់ប្តូរដែរ តែទាញត្រលប់ថយក្រោយ CTS Sports សូមនាំឲ្យបងប្អូនស្គាល់ពីជម្រើសជាតិមួយផ្សេងទៀត គេអាចទៅចូលរួម នោះគឺអង់ហ្គោឡា ក្នុងទ្វីបអាហ្វ្រិក។ ក៏ដោយសារមានឈាមជ័រតពីឪពុកលោក Antonio Leao មានសញ្ជាតិដើមអង់ហ្គោឡានោះឯង។
៤) ជាម្ចាស់កំណត់ត្រាគ្រាប់បាល់លឿនជាងគេ
និយាយតែក្នុងលីគកំពូលទាំង ៥ ប្រចាំតំបន់អឺរ៉ុប កីឡាករវ័យ ២៣ ឆ្នាំ ក៏បានកត់ឈ្មោះខ្លួនឯង ដាំជាប់ក្នុងកំណត់ត្រាប្រវត្តិសាស្រ្ត នាមអ្នករកបានគ្រាប់បាល់ប្រើថេរវេលាខ្លីបំផុតលើទីលាន ត្រឹម ៦,២ វិនាទី។
នេះបានយកឈ្នះទាំងកំណត់ត្រា Shane Long នៅ Premier League ក៏ដូចជាគ្រាប់បាល់ Kylian Mbappe ឲ្យ PSG នៅ Ligue 1។ Leao ធ្វើវាបាននៅថ្ងៃទី ២០ ខែធ្នូ ឆ្នាំ ២០២០ ឲ្យក្លឹប AC Milan ប្រកួតយកឈ្នះ Sassuolo ដោយលទ្ធផល ២-១។ គ្រាន់តែអាជ្ញាកណ្តាលផ្លុំកញ្ចែ កែបាល់ចេញភ្លាម កីឡាករក្លឹបម្ចាស់ផ្ទះ រត់ស្រុះគ្នា ហើយ Leao ទទួលបានបាល់ពីមិត្តរួមក្រុម ឆ្ពោះសំដៅទៅបញ្ចប់ទីឥតឲ្យខុសឡើយ។
៣) អត្ថន័យពីក្រោយស្ទាយអបអរ
ចំណាំមើលកីឡាករជំនាញជើងស្តាំ តែងលើកដៃដូចនិយាយទូរស័ព្ទ រាល់ពេលអបអរគ្រាប់បាល់ ហើយអត្ថន័យនៅពីក្រោយនោះ គឺចង់ផ្ញើការជូនដំណឹងទៅកាន់លោកឪពុកជាអ្នកមានគុណ ថាកូនប្រុសអាចរកគ្រាប់បាល់បានហើយ ជាពិសេសរាល់ពេលពុំមានវត្តមាន នៅទស្សនាក្នុងកីឡដ្ឋាន។
២) ជាប់រហស្សនាម “Mbappe ព័រទុយហ្គាល់”
កំឡុងពេលឈរជើងមួយឆ្នាំនៅទឹកដីបារាំងក្លឹប Lille ក៏ស្រាប់តែអ្នកគាំទ្រហៅ Leao ជា “Mbappe ព័រទុយហ្គាល់” ត្រង់តាក់តិច បច្ចេកទេសខ្សែប្រយុទ្ធទាំងពីរ មើលទៅស្រដៀងគ្នា ជាពិសេសការរត់ ការអូសបាល់ផុតជើងខ្សែការពារ និងគុណភាពបញ្ចប់ទីជាក់ច្បាស់ តែយ៉ាងណាសាមីខ្លួនមិនហ៊ានទទួលយកឡើយ ព្រោះជឿថា គុណភាព Mbappe គឺស្ថិតនៅកម្រិតខ្ពស់ជាងខ្លួនឆ្ងាយ។
១) នរណាជា idol ក្នុងដួងចិត្ត?
បើទោះបីគ្រប់គ្នាប្រដូចគេទៅនឹង Mbappe ហើយមកទល់បច្ចុប្បន្នមានពេលវេលានៅក្បែរ Zlatan Ibrahimovic តែការស្រលាញ់អស់ពីពោះ សម្រាប់ Leao គឺនៅរក្សាទុកផ្ញើជូន Cristiano Ronaldo ជារៀងរហូតទៅ។
និយាយប្រាប់ប៉ុស្តិ៍ DAZN៖ “កីឡាករដែលខ្ញុំស្រលាញ់បំផុតគឺ Cristiano Ronaldo គាត់ក៏ជាជនរួមជាតិព័រទុយហ្គាល់ ហើយក៏តែងតែបំផុសជំរុញទឹកចិត្តខ្ញុំច្រើនណាស់ដែរ គាត់ជាបុគ្គលគំរូ ពេលវេលាខ្ញុំជួបគាត់ដំបូង ពិតជារំភើបនិងមានមោទកភាពបំផុត ព្រោះធ្លាប់តែបានឃើញលើប៉ុស្តិ៍ទូរទស្សន៍ ឬការលេង PlayStation”៕
ប្រភព៖ បរទេស