នាបេសកកម្មរដូវកាល ២០២២/២៣ ក្លឹបបិសាចក្រហម Manchester United នៅសេសសល់ត្រឹម ៥ ប្រកួតទៀតប៉ុណ្ណោះ ដោយមាន ៤ ក្នុងក្របខ័ណ្ឌ Premier League និង ១ ចុងប៉ូចដណ្តើមពាន FA Cup។ យ៉ាងណាងាកទៅសមិទ្ធផលសម្រេចបានកន្លងមកគឺពាន Carabao រាប់ជាជោគជ័យធំ ដ្បិតអីនៅ Europa ក៏បានធ្លាក់បាត់ទៅហើយ ខណៈចំណាត់ថ្នាក់ PL គោលដៅធំ ត្រឹមរក្សាតំណែង Top 4 ក៏រាប់ថាល្អបំផុត។
កៀកនឹងរដូវកាលជិតបញ្ចប់ បត់ដល់ពេលវេលាចរចាលើទីផ្សារដោះដូរ សម្រាប់ក្លឹបម្ចាស់ដី Old Trafford មើលទៅក៏ទំនងជាសកម្មណាស់ដែរ ដ្បិតសព្វថ្ងៃល្ហៀងៗដាក់គោលដៅធំ សម្លឹងចង់បំបែកកំណត់ត្រាតម្លៃផ្ទេរចូលកីឡាករ ២ រូប នៅតំបន់ការពារ និងប្រយុទ្ធ។
១) Man Utd ចង់បាន Goncalo Ramos
ក្លឹបដឹកនាំដោយអ្នកចាត់ការលោក Erik ten Hag ពិតជាចង់ពង្រឹងបន្ថែមនៅប្រអប់បញ្ចប់ទីកណ្តាល បើទោះបីសព្វថ្ងៃមានវត្តមាន Anthony Martial និង Wout Weghorst។ ភាពមិនល្អគ្រប់គ្រាន់ ក៏ជំរុញឲ្យ United សម្លឹងចង់បានកីឡាករព័រទុយហ្គាល់ពោរពេញដោយទេពកោសល្យ Goncalo Ramos របស់ក្លឹប Benfica។
តាមសារព័ត៌មាន The Mirror ចុះផ្សាយ ក្លឹបស្ថិតក្នុងទីក្រុង Manchester គិតចង់ចាយលុយបំបែកកំណត់ត្រាផ្ទេរចូលខ្ពស់បំផុតក្នុងប្រវត្តិសាស្រ្តក្លឹប ដោយកិច្ចព្រមព្រៀងនាំយកកីឡាករវ័យ ២១ ឆ្នាំ អាចថ្លៃល្បាក់ពី ៧០ ទៅ ១០០ លានផោន។ នេះបើចរចាសម្រេចទៅបាន ពួកគេក៏នឹងចារកំណត់ត្រាថ្មី លើតួលេខចាស់របស់ Paul Pogba គ្រាផ្ទេរចេញពី Juventus នៅតម្លៃ ៨៩,៣ លានផោន កាលឆ្នាំ ២០១៦។
គួរឲ្យដឹងថា ខ្សែប្រយុទ្ធជំនាញជើងស្តាំ ចាប់មានកេរ្តិ៍ឈ្មោះល្បីល្បាញខ្លាំង នៅកំឡុង World Cup 2022 តំណាងឲ្យបញ្ចខែលព័រទុយហ្គាល់ អាចរកបានបីគ្រាប់ Hat-trick និង Assist ១ នៅប្រកួតទោល ទល់ជម្រើសជាតិស្វីស យកឈ្នះក្នុងវគ្គ ៨ ក្រុមចុងក្រោយ មុនធ្លាក់ក្រោមថ្វីជើងម៉ារ៉ុកនាវគ្គបន្ទាប់។ដោយឡែកនៅកម្រិតក្លឹប ក៏គេធ្វើបានល្អផងដែរ ជាក់ស្តែងដូច ៤៤ ប្រកួត អាចរកបានដល់ទៅ ២៥ គ្រាប់និង Assist ១១ លើក។
២) Man Utd ចង់បាន Kim Min-jae
បរាជ័យលើ Harry Maguire ដល់កីឡាករអង់គ្លេសកៀកឈានដល់ផ្លូវចាកចេញ ងាកមកក្លឹបអាណាព្យាបាលក៏មិនបង្អង់យូរនោះដែរ ហើយដាក់ផែនការណ៍ត្រៀមគាស់ចូលគីឡូថ្មី ជាខ្សែការពារអាស៊ី មានតម្លៃថ្លៃបំផុតក្នុងលោក គឺ Kim Min-jae របស់ក្លឹប Napoli។
តាមសារព័ត៌មាន Corriere dello Sport ចុះផ្សាយថា ក្លឹបអង់គ្លេសកំពុងរៀបចំទិញផ្តាច់កុងត្រាកីឡាករកូរ៉េខាងត្បូង នៅតម្លៃប្រហែល ៦០ លានអឺរ៉ូ នេះក៏នឹងយកឈ្នះលើកំណត់ត្រាចាស់ Shoya Nakajima ផ្ទេរទៅ Al-Duhail ថ្លៃ ៣៥ លាន បន្ទាប់មកគឺ Son Heung-min ផ្ទេរទៅ Spurs ថ្លៃ ៣០ លានអឺរ៉ូ។
រំឭកឲ្យដឹងថា Min-jae ពេលចុងក្រោយត្រូវបានអ្នកគាំទ្រជាច្រើនកោតសរសើរអំពីភាពរឹងមាំក្នុងការការពារ និងតាក់តិកការរកគ្រាប់បាល់ ការបង្កើតឱកាសជាដើម ពោលល្អជាងទាំងជំនាន់ Kalidou Koulibaly នៅឈរជើងទៅទៀត៕
ប្រភព៖ បរទេស
