Manchester United កំពុងមានការព្រួយបារម្ភ Raphael Varane អាចនឹងអវត្តមានក្នុងរហូតដល់ចប់រដូវកាលនេះដោយមានរបួសកជើង។
ខ្សែការពារសំខាន់រូបនេះត្រូវបានប្តូរចេញនៅពាក់កណ្តាលតង់ក្នុងការប្រកួត Europa League វគ្គ ៨ក្រុមចុងក្រោយជើងទីមួយរបស់ពួកគេជាមួយនឹងក្រុម Sevilla នៅ Old Trafford កាលពីសប្តាហ៍មុន។
Man Utd បានយកឈ្នះ ២-០ ក្នុងការប្រកួតនោះ ប៉ុន្តែបានរបូតគ្រាប់បាល់ពីរគ្រាប់ចុងម៉ោង ដោយបញ្ចប់លទ្ធផលស្មើ ២-២ មុនពេលត្រូវបានយកឈ្នះ យ៉ាងចាស់ដៃក្នុងលទ្ធផល ៣-០ ក្នុងជើងទីពីរក្នុងប្រទេសអេស្ប៉ាញ ដោយបញ្ចប់ក្នុងលទ្ធផល ៥-២។
Varane បានខកខានការប្រកួតនោះ ហើយនឹងអវត្តមានសម្រាប់ការប្រកួត FA Cup វគ្គពាក់កណ្តាលផ្តាច់ព្រ័ត្ររបស់ក្លឹបជាមួយ Brighton ថ្ងៃអាទិត្យ។
កីឡាករសញ្ជាតិបារាំងរូបនេះបានគេស្កែនកជើងរបស់គាត់ បន្ទាប់ពីហើមដំបូង ហើយយោងទៅតាម Mirror លទ្ធផលគឺគាត់អាចខកខានរហូតដល់ ៦សប្តាហ៍។
ប្រសិនបើគាត់ខកខានរយៈពេល ៦សប្តាហ៍ គាត់ស្ទើរតែនឹងមិនបានលេងឲ្យ United សម្រាប់ការប្រកួតដែលនៅសេសសល់នៅរដូវកាលនេះ។
ដំណឹងនេះនឹងក្លាយជាការរំខានដល់អ្នកចាត់ការ Erik ten Hag ដែលក្រុមរបស់លោកនៅតែប្រយុទ្ធដើម្បីដណ្តើមពាន FA Cup និងដើម្បីបញ្ចប់ក្នុងចំណាត់ថ្នាក់កំពូលទាំងបួន និងធានាបាននូវការប្រកួតបាល់ទាត់ Champions League សម្រាប់រដូវកាលក្រោយ៕