ម្ចាស់ពាន UEFA Champions League រដូវកាល ២០២២/២៣ កាន់តែកៀកនឹងរកឃើញ ក្រោយតែសម្រេចយកបានក្លឹប ៤ ឆ្ពោះទៅវគ្គបន្ទាប់ កំណត់ឲ្យ Real Madrid ត្រូវជួប Manchester City ចំណែកឯត្រកូល Milan ទាំងពីរ ក៏ត្រូវជួបគ្នា តែមានមួយនឹងត្រូវធ្លាក់ឥតប្រកែកបាន។
យ៉ាងណាងាកទៅប្រកួតយប់មិញមានផ្សាយបន្តផ្ទាល់លើទំព័រ CTS Sports នូវជំនួបពិសេស Bayern Munich ទល់ City ក៏កើតរឿងរ៉ាវគួរឲ្យចាប់អារម្មណ៍ច្រើនផងដែរ ដ្បិតបើបញ្ចប់ ៩០ នាទីស្មើ ១-១ តែបូកគ្រាប់បាល់ពីរជើង សម្រេចថា ក្លឹបអាល្លឺម៉ង់ធ្លាក់ ក្លឹបអង់គ្លេសឡើង។ ងាកទៅម្ចាស់អាវលេខ ២ Dayot Upamecano ជាខ្សែការពារកណ្តាលថ្លៃបំផុតលំដាប់ទីបីរបស់ Bayern បានរងការរិះគន់ឥតសំចៃមាត់ បន្ទាប់តែបង្កកំហុសម្តងជាពីរលើក ដល់ឲ្យមនុស្សយន្ត Erling Haaland រើបម្រាស់ខ្លួន ឆ្ពោះទៅការបញ្ចប់ទីបានសម្រេច។
រំឭកទៅនាទីទី ២០ កំឡុងពេល Haaland ទទួលបានឱកាសបាល់ដាច់មាត់ ព្យាយាមអូសទៅក្បែរប្រអប់ទី ស្រាប់តែមានការមករារាំងពីក្រោយមួយទំហឹង ពីសំណាក់ខ្សែការពារសញ្ជាតិបារាំង នាំឲ្យអាជ្ញាកណ្តាលមិនសម្រេចចិត្តយូរ ក៏រត់មកលើកកាតក្រហម ទាំងដើមតង់ភ្លែត។ យ៉ាងណាក្រោយពិនិត្យ VAR ឃើញថា សាច់បាល់ត្រង់នោះគឺ Offside នាំឲ្យ Bayern មានទឹកមាត់លេបបន្ត។
ថានេះជាសំណាងទៅចុះ ផ្លោះដល់តែ ១៥ នាទីបន្ទាប់ ក៏ Upamecano ដដែល បានសាងកំហុសជាថ្មី ដោយបន្ទាប់តែ Ilkay Gundogan ព្យាយាមស៊ុតបាល់សំដៅមកប្រអប់ ក៏ស្រាប់តែកីឡាករវ័យ ២២ ឆ្នាំ រារាំងមិនបានល្អ នាំឲ្យបាល់ប៉ះដៃ ហើយអាជ្ញាកណ្តាលសម្រេចលើកកាតលឿង និងផ្តល់បាល់ពិន័យ ១១ ម៉ែត្រទៅឲ្យម្ចាស់ផ្ទះ City។
ល្អដែរ សំណាងរបស់ Bayern បានកើតមានម្តងទៀតហើយ សារនេះនាទី ៣៧ វាជាលើកដំបូងក្នុងអាជីពរបស់មនុស្សយន្តសញ្ជាតិន័រវេស ដែលមិនដឹងបារមីមកពីខាងណា នាំឲ្យកីឡាករបែរស៊ុតបាល់នោះហៅទៅលើ ឥតចំគោលដៅ បើទោះបីអ្នកចាំទី Yann Sommer លោតទៅខុសខ្យល់បាល់។
ការប្រកួតបានបន្តចូលដល់តង់ទី ២ ខណៈឱកាសរបស់យុវជនប៉ូវទឹកដោះនៅតែមាន ហើយដល់នាទី ៥៧ ការប្រជែងរវាង Haaland និង Upamecano សារនេះ គឺសំណាងបានកើតមានដល់ខាង City វិញម្តង ត្រង់ជញ្ជាំងការពារបារាំង រត់មករាងអស់ជំហរក៏រអិលជើងដួល សល់ចន្លោះសម្រាប់ខ្សែប្រយុទ្ធសញ្ជាតិន័រវេស ចេញក្បាច់ទាញបាល់ដូច Messi អូសមកបញ្ចប់ទីយ៉ាងលឿនផុតទាំងជើងខ្សែការពារ Matthijs de Ligt និងដៃអ្នកចាំទីរបស់ Bayern។
សរុបកំហុសម្តងហើយម្តងទៀតនេះ ក៏នាំឲ្យអ្នកអធិប្បាយលើប៉ុស្តិ៍ទូរទស្សន៍ beIN Sports បានស្រែកចំអកដល់ Upamecano អស់ពីចិត្តថាជា “UpaMaguire” ពោលប្រដូចទម្រង់លេងកីឡាករវ័យក្មេង Bayern ទៅនឹងប្រធានក្រុមបិសាចក្រហម Manchester United គឺ Harry Maguire ដែលធំតែមាឌ ធ្វើមិនបានល្អ និងរមែងសាងកំហុសជារឿយៗ។
គួរឲ្យដឹងថា ក្លឹបស្ថិតក្នុងទីក្រុង Munich សេសសល់ឱកាសប្រជែងពាន Bundesliga មួយគត់ ដ្បិតឱកាសកាន់ពាន ៤ ក្នុងមួយរដូវកាល កន្លងមកសម្រេចបានតែមួយគត់ នាពេលវេលាបើកឆាក ជាមួយពាន DFL-Supercup តែធ្លាក់នៅ DFB-Pokal និង Champions League ក្រោមថ្វីដៃដឹកនាំរបស់អ្នកចាត់ការថ្មី លោក Thomas Tuchel៕
ប្រភព៖ បរទេស