មិនបាននៅក្បែរ idol តែក៏មានឱកាសអាចរស់នៅក្នុងភូមិគ្រឹះដែល Cristiano Ronaldo ធ្លាប់ស្នាក់អាស្រ័យ ប្រសិនជាអ្នកហ៊ានចំណាយលុយល្បាក់មុឺនដុល្លារ លើការជួលកន្លែងរស់នៅ ដែលមានទីតាំងស្ថិតក្នុងទីក្រុង Madrid ប្រទេសអេស្ប៉ាញ។
តារាឆ្នើមចាស់វស្សា កម្លាំងបានខាងលើ ជាការពិតមានផ្ទះតូចធំ ជាច្រើនកន្លែងនៅទូទាំងសកលលោក ជាពិសេសគឺនៅទ្វីបអឺរ៉ុប តួយ៉ាងដូចនៅប្រទេសអេស្ប៉ាញ អង់គ្លេស អ៊ីតាលី ព័រទុយហ្គាល់ និងចុងក្រោយនេះ ទើបតែផ្លាស់មករស់នៅក្នុងប៉ែកមជ្ឈិមបូព៌ា នៃប្រទេសអារ៉ាប៊ីសាអូឌីត បន្ទាប់ការចុះហត្ថលេខាផ្លាស់មកក្លឹប Al Nassr។
យ៉ាងណាថ្មីៗកន្លងទៅ តារាឆ្នើមវ័យ ៣៨ ឆ្នាំ បានចាត់ចែងដាក់ជួលភូមិគ្រឹះលោកធ្លាប់ចាយពេលរស់នៅអស់ជាង ៩ ឆ្នាំ ក្នុងតំបន់ La Finca នៃរាជធានី Madrid ដែលផ្ទះដ៏ធំនោះ គ្រាសាងសង់សរុបចាយលុយអស់ប្រមាណជិត ៦ លានដុល្លារ រចនាដោយស្ថាបត្យករល្បីឈ្មោះលោក Joaquin Torres។
ដល់តែឥឡូវនេះ អតីតសមាជិកស្តេចស គិតចង់បង្កើតចំណូល ជាជាងទុកផ្ទះនោះចោល ប៉ុន្តែមិនសម្រេចលក់ចេញទៅវិញទេ បែរដាក់ឲ្យជួល យកលុយចាយប្រចាំខែ ដោយតម្លៃជួលក្នុងមួយខែ មានតម្លៃជាង ១០ ៩៤០ ដុល្លារ ស្មើនឹងទំហំទឹកប្រាក់ ដែលអាចទិញបានរថយន្ត Toyota Prius សេរ៊ីឆ្នាំ ២០០៥ មួយគ្រឿង ហើយនេះរាប់ទាំងការផ្តល់ជូនឲ្យប្រើប្រាស់នូវសម្ភារៈទាំងអស់ដែលមាននៅខាងក្នុងផ្ទះ។
ទីតាំងរស់នៅដ៏ស្កឹមស្កៃនោះ មានទ្វារចូលរចនាពិសេស អមដោយស្លាកសញ្ញា CR មានបន្ទប់គេង ៧ បន្ទប់ទឹក ៩ មានអាងហែលទឹកទាំងក្នុងនិងក្រៅផ្ទះ អមដោយបន្ទប់ហាត់ប្រាណ ហើយបរិវេណធំទូលាយនៅខាងក្រៅក៏មានទីលានបាល់ទាត់ឯកជន លើក្រឡាផ្ទៃដីទំហំ ៤ ០០០ ម៉ែត្រការ៉េ។
គួរឲ្យដឹងថា ភូមិគ្រឹះរបស់ស្តេចបាល់ទាត់ព័រទុយហ្គាល់ខាងលើ ដំបូងឡើយពេលមិត្តស្រី Georgina Rodriguez ទើបងើបចេញពីជីវភាពកម្រិតមធ្យម ត្រឹមជាបុគ្គលិកនៅហាងលក់ Gucci ពេលមករស់នៅទីនោះថ្មីថ្មោង ដល់ថ្នាក់នាងដើរវង្វេង ចង់ទៅផ្ទះបាយរកទឹក យកមកទទួលទានក៏មិនឃើញផង។
ផ្អែកតាមសម្រង់សម្តីរបស់តារាម៉ូដែលស្រីកូនកាត់អាហ្សង់ទីន-អេស្ប៉ាញធ្លាប់បានលើកឡើង៖ “លើកទីមួយខ្ញុំមកផ្ទះរបស់ Cristiano Ronaldo ជាការពិតគឺខ្ញុំបានវង្វេង ខ្ញុំចង់ដើរសំដៅទៅផ្ទះបាយដើម្បីញុាំទឹក ក៏អត់ដឹងថាត្រូវដើរទៅខាងណា ពេលខ្លះទៅខ្ញុំត្រូវចំណាយពេលកន្លះម៉ោង ដើម្បីគិតរកឃើញបន្ទប់ទទួលភ្ញៀវ ដោយសារខ្ញុំអត់ចាំផ្លូវទៅ ហើយផ្លូវត្រលប់មកវិញទេ”។
នាងបន្តថា៖ “ផ្ទះនោះវាធំខ្លាំងណាស់ តាំងពីក្មេងមក ខ្ញុំទម្លាប់តែរស់នៅក្នុងបន្ទប់ Apartment តូចៗ ដល់តែមករស់នៅទីនេះ ខ្ញុំសុំអស់យោបល់ ជារួមប្រហែលកន្លះឆ្នាំ ទើបខ្ញុំអាចដឹងក្រឡុកក្រលៀតទាំងអស់ក្នុងផ្ទះនោះ”៕
ប្រភព៖ បរទេស