អ្នកអត់គូ អ្នកគេងផ្ទះ ក៏ពុំមានអ្វីត្រូវរអ៊ូច្រើនដែរ ដ្បិតឆ្នាំនេះ ចូលឆ្នាំប៉ះចុងសប្តាហ៍ អត់បានទៅដើរលេងឯណា ក៏អាចនៅផ្ទះគេងមើលបាល់ កម្សាន្តជាមួយទំព័រ CTS Sports។ ជាក់ស្ដែងដូចយប់មិញបានបញ្ចប់ទៅនូវជំនួបគូពិសេសជាច្រើន រួចឡើងមកយប់ថ្ងៃអាទិត្យនេះ ក៏គីឡូធ្ងន់ Arsenal, Barcelona និង Man Utd ជាដើម ដល់កាលវិភាគត្រូវចូលទីលាន លាងភាពអផ្សុក កំដរអារម្មណ៍បងប្អូនអ្នកស្នេហាវិស័យបាល់ទាត់។
នៅដីបារាំង ដីអង់គ្លេស ក្រៅតែក្លឹបធំ យក ៣ ពិន្ទុកើតជ័យជម្នះ ទៀតសោតងាកទៅកីឡាករឯណោះ ក៏បានជីកកំណត់ត្រាជាហូរហែ កែឈ្មោះខ្លួនឯងឲ្យទៅចំណុចកំពូលត្រឹមតែរយៈពេលខ្លី។ នៅជោគជ័យ ៣-១ របស់ PSG យកឈ្នះទៅលើ Lens តារាឆ្នើមវ័យ ២៤ ឆ្នាំ Kylian Mbappe បានទាំងគ្រាប់បាល់ បានទាំង Assist រួចបើងាកទៅ Man City បានយកឈ្នះ Leicester ក៏មនុស្សយន្ត Erling Haaland ដែលទើបតែប៉ូវទឹកដោះ គាស់ដល់ ២ គ្រាប់ មុនប្តូរចេញនៅបញ្ចប់តង់ទីមួយ។
យើងទៅមើលស្ថិតិកីឡាករបារាំង ដែលរកបាន ៣២ គ្រាប់ Assist ៩ លើក នៅ ៣៦ ប្រកួតឲ្យ PSG ជុំវិញគ្រាប់បាល់កាលពីយប់មិញ គឺបានរុញឈ្មោះរបស់គេ ឲ្យក្លាយទៅជា Top Scorer ឬអ្នករកបានគ្រាប់បាល់ច្រើនបង្អស់ ប្រចាំប្រវត្តិសាស្រ្តក្លឹប មានអាយុកាល ៥២ ឆ្នាំ។
កូនអណ្តើកល្បឿនលឿនខាងលើ បានឈានមកដល់តួលេខគ្រាប់បាល់ទី ១៣៩ នៅ ១៦៩ ប្រកួត យកឈ្នះលើកំណត់ត្រាចាស់គ្រងច្រើនឆ្នាំ ដោយខ្សែប្រយុទ្ធអ៊ុយរុយហ្គាយ Edinson Cavani ធ្វើបាន ១៣៨ គ្រាប់ នៅ ២០០ ប្រកួត និងអ្នកបន្ទាប់គឺ Zlatan Ibrahimovic ធ្វើបាន ១១៣ គ្រាប់ នៅ ១២២ ប្រកួត។
នេះមានន័យថា បំណងធំរបស់ខ្សែប្រយុទ្ធជំនាញជើងស្តាំ គឺអាចសម្រេចបានហើយ នៅឡើយតែការឈ្នះពាន Champions League មួយទៀត ដែលចន្លោះនៅមិនទាន់សម្រេច ទំនងប្រហែលទាមទារការចាកចេញ ផ្លាស់ទៅក្លឹប Real Madrid ទើបជាដំណោះស្រាយ។
និយាយដល់ឈ្មោះមនុស្សយន្តនៅប៉ូវទឹកដោះ Erling Haaland កំណត់ត្រាថ្មីបានកើតឡើងសឹងគ្រប់ការប្រកួត បើទោះបីនេះជារដូវកាលដំបូង ជាមួយក្លឹបនៅទឹកដីអង់គ្លេស។ សម្រាប់យុវជនសញ្ជាតិន័រវេស ឈានដល់តួលេខគ្រាប់បាល់ទី ៣២ ក្នុងក្របខ័ណ្ឌ Premier League បន្ទាប់ការបញ្ចប់ទីពីរគ្រាប់បន្ថែម ទល់ក្លឹប Leicester នៅយប់ថ្ងៃសៅរ៍។
ហៅកំណត់ត្រាស្មើតួលេខ Mohamed Salah តែ Haaland ត្រូវការ ២ គ្រាប់ទៀត ដើម្បីតាមស្មើ ឬ ៣ គ្រាប់ដើម្បីបំបែក កើតជាស្តេចគ្រាប់បាល់នៅ Premier League នាំមុខលើកំណត់ត្រាលំដាប់កំពូល ជើងចាស់ Alan Shearer ធ្វើបាន ៣៤ គ្រាប់ នៅរដូវកាល ១៩៩៤/៩៥ ឲ្យកុលាបក្រហម Blackburn Rovers និង Andy Cole នៅរដូវកាល ១៩៩៣/៩៤ ឲ្យសេះសមុទ្រ Newcastle United។
បញ្ជាក់ឲ្យដឹង City នៅសេសសល់ ៨ ប្រកួតទៀត មុនបញ្ចប់រដូវកាល Premier League តួយ៉ាងគឺការប៉ះ Arsenal, Fulham, West Ham, Leeds United, Everton, Chelsea, Brentford និង Brighton ខណៈការប្រជែងចំណាត់ថ្នាក់កំពូលតារាង គឺនៅចាញ់កាំភ្លើងធំ ៣ ពិន្ទុ៕
ប្រភព៖ បរទេស