តារាឆ្នើមរបស់ក្លឹប Paris Saint-Germain (PSG) Kylian Mbappe ថ្មីៗនេះបានបង្ហើបថាការឈ្នះពានរង្វាន់ UEFA Champions League គឺជាជំហានបន្ទាប់ក្នុងអាជីពរបស់គាត់។ ខណៈពេលដែល Mbappe បានឈានដល់វគ្គផ្តាច់ព្រ័ត្រ និងពាក់កណ្តាលផ្តាច់ព្រ័ត្រនៃការប្រកួត ប៉ុន្តែគាត់មិនដែលឈ្នះវាទេ។
ក្លឹបប៉ារីសក៏រងនឹងការធ្លាក់ចេញពីវគ្គ ១៦ក្រុមក្នុងរដូវកាលនេះដែរ។ ពួកគេត្រូវបានចាញ់ក្រោមថ្វីដៃក្រុម Bayern Munich ក្នុងការប្រកួតវគ្គ ១៦ក្រុមចុង ក្រោយដោយពិន្ទុសរុប ៣-០។ ដូច្នេះហើយទើបអាចយល់បានថាហេតុអ្វីបានជាកីឡាកររូបនេះចង់លើកពាននេះ។
និយាយទៅកាន់ France 3 Mbappe បាននិយាយថា៖
“ជំហានបន្ទាប់? ខ្ញុំគិតថាការឈ្នះ Champions League។ ខ្ញុំបានធ្វើការប្រកួតវគ្គផ្តាច់ព្រ័ត្រ វគ្គពាក់កណ្តាលផ្តាច់ព្រ័ត្រ វគ្គ ៨ក្រុមចុងក្រោយ វគ្គ ១៦ក្រុមរួចហើយ… ខ្ញុំបានធ្វើគ្រប់យ៉ាងលើកលែងតែឈ្នះវាប៉ុណ្ណោះ។ ខ្ញុំគ្រាន់តែខកខានរឿងនោះ។ ខ្ញុំសង្ឃឹមថា វានឹងឆាប់តាមដែលអាចធ្វើទៅបានក្នុងការឈ្នះវា”។
Kylian Mbappe បានក្លាយជាកីឡាករសំខាន់ម្តងទៀតសម្រាប់ក្លឹប PSG ក្នុងរដូវកាលនេះ។ គាត់គឺជាខ្សែប្រយុទ្ធនាំមុខគេរបស់ក្រុម ដោយស៊ុតបញ្ចូលទីបាន ៣១គ្រាប់ និងបញ្ជូនបាល់ឱ្យមិត្តរួមក្រុមចំនួន ៨ដងក្នុង៣៥ប្រកួតគ្រប់កម្មវិធី៕