លោក Rudi Garcia អ្នកចាត់ការទូទៅរបស់ Al Nassr ត្រូវបានគេរាយការណ៍មកថាកំពុងស្ថិតក្នុងដំណាក់កាលនៃការបញ្ចប់តំណែងពីសំណាក់ក្លឹបចំ ពេលមានសេចក្តីរាយការណ៍អំពីការបែកបាក់ទំនាក់ទំនងជាមួយ Cristiano Ronaldo និងទំនាក់ទំនងមិនល្អជាមួយកូនក្រុមរបស់គាត់។
អតីតគ្រូបង្វឹក Roma, Marseille និង Lyon ត្រូវបានផ្លាស់ទៅដឹកនាំក្រុម Saudi Pro League ក្នុងខែមិថុនា ប៉ុន្តែគ្រោងនឹងចាកចេញពីតំណែងរបស់គាត់ បន្ទាប់ពីដឹកនាំបានតិចជាងមួយឆ្នាំ។
Al Nassr នៅតែមានតែបីពិន្ទុតាមពីក្រោយក្រុមកំពូលតារាងលីគ Al Ittihad ប៉ុន្តែការប្រកួតចុងក្រោយរបស់ពួកគេគឺស្មើ ០-០ ជាមួយ Al Feiha ដែលនាំឱ្យ Garcia ត្រូវបានគេរាយការណ៍ថាបានស្តីបន្ទោសកីឡាកររបស់គាត់នៅក្នុងបន្ទប់ផ្លាស់សំលៀកបំពាក់ នេះបើយោងតាម MARCA។
គាត់បានប្រាប់សារព័ត៌មានថា គាត់មិនពេញចិត្តនឹងទម្រង់លេងរបស់ក្រុមរបស់គាត់ទេ ដោយគាត់បញ្ចេញមតិថា៖
“លទ្ធផលពិតជាអាក្រក់ ហើយពួកយើងមិនសប្បាយចិត្ត ខ្ញុំមិនពេញចិត្តនឹងការលេងរបស់កីឡាករនោះទេ។ ខ្ញុំបានសុំឱ្យពួកគេលេងនៅ កម្រិតដូចគ្នានឹងការប្រកួតចុងក្រោយ ប៉ុន្តែវាមិនបានកើតឡើងទេ”។
ប៉ុន្តែក្លឹបត្រូវបានគេជឿថានឹងមានអារម្មណ៍ដូចគ្នាចំពោះការដឹកនាំរបស់ Garcia ចាប់តាំងពីគាត់បានជំនួសកន្លែង Miguel Angel Russo។ ដំណឹងនេះមិនទាន់ត្រូវបានក្លឹបប្រកាសជាផ្លូវការទេ ប៉ុន្តែសារព័ត៌មានជាច្រើនកំពុងរាយការណ៍ថា Garcia ត្រូវបានគេជូនដំណឹងនេះរួចហើយ៕
