ថាប្តូរគ្រូថ្មី ដើម្បីក្តោបក្តីស្រមៃសេសសល់ ការឈ្នះពាន ៣ នៅរដូវកាលទោល ដល់តែឥឡូវត្រឹមតែមួយរំពេច Bayern ប្រុងរបូតពាន ២ បាត់ទៅហើយ ដូច DFB-Pokal ធ្លាក់ត្រឹមវគ្គ ៨ ក្រុម ក្រោមថ្វីជើង SC Freiburg ដល់តែយប់មិញនាវគ្គដដែល តែជាមួយពាន UEFA Champions League ក៏ប្រឈមនឹងការធ្លាក់ចេញដូចគ្នា បន្ទាប់ក្លឹបដឹកនាំដោយអ្នកចាត់ការ លោក Thomas Tuchel រងបរាជ័យស្ពឹកមុខ ០-៣ ក្រោមថ្វីជើងសំពៅមាស Manchester City។
គ្រាប់បាល់ក្នុងទឹកដី Etihad ធ្វើបានដោយ Rodri, Bernardo Silva និង Erling Haaland ដែលមានន័យថា បកទៅជើងទី ២ នៅដីអាល្លឺម៉ង់ ចាំបាច់ Bayern ត្រូវយកឈ្នះ ៣-០ វិញ ដើម្បីបន្តទៅការថែមម៉ោង ឬយកឈ្នះ ៤-០ ដាច់ ទើបអាច ឡើងទៅកាន់វគ្គបន្ទាប់។ លទ្ធផលសម្រេចជើងទី ២ គូនេះបែបណា ក៏កុំភ្លេច Follow ផេក CTS SPORT ម្នាក់មួយ ទុកចាំអ៊ុតមើលនាថ្ងៃទី ២០ មេសាជុំគ្នា។
តើអ្នកដឹងទេថា ទាំងមនុស្សយន្ត Erling Haaland និងក្លឹបស្ថិតក្នុងទីក្រុង Manchester បានចារកំណត់ត្រាជាហូរហែ ក្រោយប្រែលទ្ធផលមិនគួរឲ្យជឿនៅយប់មិញ? ជាក់ស្តែងដូចយុវជនសញ្ជាតិន័រវេស តាំងពីនៅឈរជើងឲ្យក្លឹប Borussia Dortmund ឥតស្គាល់សោះឡើយ ជ័យជម្នះទល់ក្លឹបក្នុងទីក្រុង Munich ដល់ឥឡូវ គេចមកលេងឲ្យ City ប៉ះគ្នានៅជំនួបទី ៨ ស្គាល់ជ័យជម្នះភ្លែត ជាមួយស្ថិតិការរកបាន ១ គ្រាប់និង Assist ១។
ជាងនេះយុវជនវ័យ ២២ ឆ្នាំ បានកត់ឈ្មោះនៅកំណត់ត្រាថ្មីសន្លាង គឺជាកីឡាករ Premier League រកបានគ្រាប់បាល់ច្រើនបំផុតនៅគ្រប់ក្របខ័ណ្ឌទាំងអស់នារដូវកាលទោល ពោលធ្វើបាន ៤៥ គ្រាប់ ដ្បិតការប្រកួតសេសសល់ ១១ ជុំ យកឈ្នះលើម្ចាស់កំណត់ត្រាចាស់ Mohamed Salah និង Ruud van Nistelrooy។
ទន្ទឹមនឹងសមិទ្ធផលកំពុងសម្រេច ក៏ត្រូវបានអ្នកវិភាគ លោក Joe Cole លើកឡើងយ៉ាងដូច្នោះថា៖ “Haaland គេកាន់តែល្អឡើងពីមួយកម្រិតទៅមួយកម្រិត កាន់តែពេញលក្ខណៈខ្លាំងឡើង ខ្ញុំនិយាយទៅ Ferdinand ថាចាំមើលចុះ ក្មេងប្រុសម្នាក់នេះ នឹងអាចរកបាន ១០០០ គ្រាប់ក្នុងអាជីព គាត់លឺហើយសើច តែខ្ញុំនៅតែថា វាអាចទៅរួច បើ Haaland គេបន្តឈរជើងដល់អាយុ ៣០ ក្រាស់ ហើយអត់ជួបរបួសញាំញី”។
ឥឡូវយើងងាកទៅមើល City ឯណោះវិញ នេះ ១០ ប្រកួតក្នុងដីខ្លួនឯងទល់ក្លឹបមកពីអាល្លឺម៉ង់ ឈ្នះទាំងអស់ ឥតស្គាល់ ចាញ់ ជាមួយការរកបានសរុប ៤០ គ្រាប់ របូត ១០ គ្រាប់ ក្នុងចំណោមការតតាំងទល់ Bayern Munich, RB Leipzig, Borussia Dortmund, FC Schalke 04, Hoffenheim និង Borussia Monchengladbach។
បន្តកំណត់ត្រាគួរឲ្យចាប់អារម្មណ៍មួយទៀត Pep Guardiola បានដឹកនាំ City ឲ្យក្លាយឈ្មោះជាក្លឹប Premier League តែមួយគត់ មិនស្គាល់ពាក្យថា ចាញ់ ក្នុងដី ច្រើនប្រកួតបំផុតនៅ UCL នេះ ២៥ ប្រកួត ឈ្នះ ២៣ ស្មើ ២។
ចុងក្រោយអំពីស្ថានភាព Joao Cancelo សមាជិកស្ថិតក្រោមការគ្រប់គ្រងរបស់ក្លឹបអាណាព្យាបាល City តែកំពុងខ្ចីជើងឈរនៅ Bayern ប្រសិនណាជាក្លឹបអាល្លឺម៉ង់ធ្លាក់ ហើយក្លឹបអង់គ្លេសឡើង បន្តទៅដល់វគ្គផ្តាច់ព្រ័ត្រ រួចឈ្នះពានរង្វាន់ នោះឈ្មោះរបស់គេ ក៏មានចំណែកជាម្ចាស់ពាន Champions League រដូវកាល ២០២២/២៣ ផងដែរ ក្នុងចំណោមមេដាយសម្រាប់សមាជិកទាំង ៤០ ដែល UEFA ផ្តល់ជូន ព្រោះនាវគ្គចែកពូល ក៏ Cancelo បានចូលរួមចំណែកឈរជើង និង Assist ដល់ ៤ គ្រាប់ ផ្គាប់ចិត្តមេឃខៀវ៕
ប្រភព៖ បរទេស