ក្តីសង្ឃឹមរបស់ Bayern ក្នុងការឈានទៅវគ្គពាក់កណ្តាលផ្តាច់ព្រ័ត្រនៃក្របខ័ណ្ឌ Champions League មើលទៅហាក់បីដូចជាធ្លាក់ចុះ បន្ទាប់ពីរងបរាជ័យក្រោមថ្វីដៃ Man City ជើងទី១ វគ្គ ៨ក្រុមចុងក្រោយ នៅទឹកដី Etihad ដោយលទ្ធផល ៣ ទល់នឹង ០។
ប៉ុន្តែក្លឹបយក្ស Bundesliga មួយនេះបានគ្រប់គ្រងបាល់ ៥៦% ខណៈដែល Man City ត្រូវបានបង្ខំឱ្យលេងដោយគ្មានបាល់។ មានតែបួនដងប៉ុណ្ណោះក្រោមការដឹកនាំរបស់លោក Pep Guardiola ដែលពួកគេបានឃើញការលេងតិចបែបនេះ។
លោក Tuchel បានប្រាប់ Prime Video ក្រោយចប់ការប្រកួតថា៖
“ខ្ញុំមិនយល់ស្របនឹងលទ្ធផលទាល់តែសោះ។ យើងត្រូវបានគេយកឈ្នះក្នុងដំណាក់កាលដែលយើងជាក្រុមល្អជាង។ យើងត្រូវបានគេយកឈ្នះយ៉ាងព្រៃផ្សៃនៅថ្ងៃនេះ។
ខ្ញុំគិតថាការប្រកួតរបស់យើងល្អខ្លាំងរហូតដល់លទ្ធផល ២-០ ខ្ញុំមិនចង់និយាយមើលងាយលទ្ធផលទេ ខ្ញុំបានឃើញទម្រង់លេងល្អណាស់រហូតដល់នាទីទី៧០។
ខ្ញុំគិតថាយើងសមនឹងទទួលបានយ៉ាងហោចណាស់មួយគ្រាប់។ ខ្ញុំគិតថាកីឡាកររបស់យើងខ្វះទំនុកចិត្ត និងទម្រង់លេងបន្តិច។ ពិតណាស់លទ្ធផលគឺជូរចត់សម្រាប់យើង។
ខ្ញុំបានលង់ស្នេហ៍ជាមួយក្រុមរបស់ខ្ញុំបន្តិចនៅថ្ងៃនេះ ពីរបៀបដែលពួកគេលេង។ បើទោះបីជាស្តាប់ទៅដូចជាចម្លែកក៏ដោយ វាពិតជារីករាយណាស់”៕
*[FotMob]
