ទន្ទឹមនឹងការបង្ហាញទម្រង់លេងល្អ ក៏ស្រាប់តែមានជម្រើសជាតិកំពូលលំដាប់សកលលោកដូចជាអេស្ប៉ាញ បារាំង និងអង់គ្លេសជាដើម ផ្តល់ឱកាសឲ្យ ហៅចូលសញ្ជាតិ តំណាងឲ្យប្រទេសមួយនោះ។
តាមរយៈសំណើនេះ សម្រាប់កីឡាករមួយចំនួន អាចថាជាក្តីរំភើប ពេញចិត្តមួយទំហឹងនឹងទទួលយក តែខុសពីកីឡាករបេះដូងធំទាំង ៤ បែរបានបដិសេធ ហើយស៊ូចាយពេល លះបង់កម្លាំងកាយចិត្តស្មោះតែប្រទេសកំណើតខ្លួន ដ្បិតជាជម្រើសជាតិតូចតាចនៅចំណាត់ថ្នាក់ FIFA Ranking៖
៤) Achraf Hakimi បដិសេធអេស្ប៉ាញ
ខ្សែការពារស្លាប ដែលចាប់កំណើតនិងធំធាត់ឡើងក្នុងប្រទេសអេស្ប៉ាញ ចុងក្រោយបែរជាមិនជ្រើសទៅចូលរួមតំណាងឲ្យជម្រើសជាតិគោជល់នៅតំបន់អឺរ៉ុប ផ្ទុយទៅវិញ បានចូលរួមជាមួយជម្រើសជាតិនៅប៉ែកអាហ្វ្រិក គឺម៉ារ៉ុក ជាទីកំណើតនៃម្តាយឪពុកខ្លួន។
អតីតយុវជនថ្នាល អភិវឌ្ឍខ្លួននៅ Castilla របស់ Real Madrid អស់កាលជាយូរ ធ្លាប់បានលើកឡើង៖ “ខ្ញុំអត់ដែលទទួលអារម្មណ៍ថា អេស្ប៉ាញជាកន្លែងរស់នៅដ៏សមស្រប ឬមានអារម្មណ៍ថាទីនេះជាផ្ទះនោះទេ”។ ការលះបង់របស់ Hakimi គឺបានផល កាលនៅកាតារឆ្នាំ ២០២២ បន្ទាប់ជម្រើសជាតិម៉ារ៉ុក អាចឡើងដល់វគ្គ ៤ ក្រុមចុងក្រោយ World Cup ជាលើកដំបូង។
៣) Pierre-Emerick Aubameyang បដិសេធបារាំង
បើទោះបីទទួលបានឱកាស ទៅចូលរួមជាមួយជម្រើសជាតិបារាំង និងសង្ឃឹមខ្ពស់អាចកាន់ពាន World Cup ក៏ចុងក្រោយខ្សែប្រយុទ្ធជំនាញជើងស្តាំ នៅតែបដិសេធ ហើយជ្រើសទៅតំណាងឲ្យប្រទេសកំណើតហ្គាបុង មកទល់សព្វថ្ងៃ។
Aubameyang ធ្លាប់បានលើកឡើង៖ “ដោយសារខ្ញុំចង់ដើរតាមគន្លងឪពុក គាត់ធ្លាប់ជាអតីតសមាជិកជម្រើសជាតិហ្គាប៊ុង ហើយខ្ញុំអង្គុយមើលគាត់ប្រកួតក្នុងកីឡដ្ឋាន តាំងតែអាយុ ៣ ឆ្នាំ ទោះបីខ្ញុំចាយពេលរាប់ឆ្នាំ រស់នៅក្នុងប្រទេសបារាំង ក៏ក្នុងបេះដូងនៅតែគិតថា ហ្គាបុងជាកន្លែងដែលខ្ញុំកើត”។
២) Erling Haaland បដិសេធអង់គ្លេស
បើ Haaland ជ្រើសចុះចូលនៅជម្រើសជាតិតោកំណាច ម្ល៉េះពេលនេះ Gareth Southgate ជាអ្នកចាត់ការបែបពិបាកនឹងសម្រេចចិត្ត ក្នុងការប្រើប្រាស់ប្រយុទ្ធប្រអប់រវាងម៉ាស៊ីនស៊ុតខាងលើ ឬត្រូវប្រើ Harry Kane។
តាមពិតទៅអតីតសមាជិកក្លឹប Dortmund ក៏មានឱកាសអាចទៅចូលរួមនៅទីនោះដែរ តែដោយសាររបៀបរបប ទម្លាប់រស់នៅរបស់គេ បានដាក់ចិត្តដាក់កាយអស់រាប់ឆ្នាំ នៅដីកំណើតន័រវេស ក៏ដល់ពេលបានជ្រើសយក ជម្រើសជាតិឈរលេខ ៤៤ ដោយមិនស្ទាក់ស្ទើរ។ Haaland និយាយ៖ “វាជាអារម្មណ៍ធម្មជាតិជំរុញឲ្យខ្ញុំជ្រើសយកន័រវេស ខ្ញុំមានមោទនភាព នឹងការសម្រេចចិត្តនេះ”។
១) Keylor Navas បដិសេធអេស្ប៉ាញ
ឈរជើងឲ្យជម្រើសជាតិកូស្តារីកា អស់រយៈពេល ១៥ ឆ្នាំ កៀកនឹងចូលនិវត្តទៅហើយ តែអ្នកចាំទីដៃឯកខាងលើ មិនទាន់ស្គាល់ជាតិលើកពានរង្វាន់មួយនៅឡើយ។ ទោះជាយ៉ាងណា Navas មិនសោកស្តាយនោះទេ ដែលមកចូលរួមឲ្យប្រទេសនៅប៉ែកអាមេរិកកណ្តាល ជាជាងទៅឈោងឱកាសលើកពានធូរៗ ជាមួយក្រុមគោជល់អេស្ប៉ាញ។
បញ្ជាក់ថា Navas ធ្លាប់បានជាចំណែកជួយប្រទេសតូចតាចមួយនេះ ឡើងដល់វគ្គ ៨ ក្រុម World Cup ជាលើកដំបូងក្នុងប្រវត្តិសាស្រ្ត កាលប្រេស៊ីលធ្វើជាម្ចាស់ផ្ទះ នៅឆ្នាំ ២០១៤៕
ប្រភព៖ បរទេស
