មនុស្សរាល់គ្នាសុទ្ធតែមានក្តីស្រមៃ ទាំងខ្ញុំ ទាំងអ្នក ហើយដូចគ្នានឹងកីឡាករបាល់ទាត់ តែក៏មិនប្រាកដថាពួកគេសុទ្ធសឹងអាចសម្រេចវាបាននោះដែរ។ ខ្លះត្រូវទៅចូលរួមដើម្បីតែលុយ ខ្លះទៅដើម្បីតែមុខមាត់ ខុសពីកីឡាករ ៥ រូបនេះ ក្រៅតែពីទេពកោសល្យ សមិទ្ធផលសម្រេចបាន នៅទីបំផុតក៏អាចឈោងដល់ក្តីស្រមៃ ទៅចុះចូលនៅក្លឹបខ្លួនធ្លាប់ប៉ងទុកអស់កាលជាយូរ៖
៥) Phil Foden
លោកប៉ាវ័យក្មេង អាយុទើបតែ ២២ ឆ្នាំ តាំងបើកក្បាលអាជីពមកទល់សព្វថ្ងៃ នៅឈរជើងឲ្យក្លឹបតែមួយគត់ ក៏ជាក្លឹបក្នុងក្តីសុបិន្តតាំងពីតូច នោះគឺ Manchester City។ មានរូបភាពជាច្រើនសន្លឹកចែកចាយពាសពេញបណ្តាញសង្គម នៅគ្រាដែលយុវជនសញ្ជាតិអង់គ្លេស ធ្លាប់បានស្លៀកឈុតសំពៅមាស តាំងតែពីនៅកុមារភាព។
រៀបនឹងរះឡើងជាមួយក្លឹបនៅ Premier League ក៏ត្រូវបាន Foden និយាយ៖ “ខ្ញុំកំពុងឆ្លងកាត់ក្តីស្រមៃ ការដែលបានវិវត្តខ្លួនចេញពីឈុតថ្នាល មកកាន់ឈុតធំ ហើយបន្តឈរជើងនៅ City អស់កាលជាយូរ ខ្ញុំអត់គិតថា មានមនុស្សច្រើនទេ ដែលអាចសម្រេចវាបាន នេះជាកម្លាំងដ៏ពិសេស អមនឹងការដែលមានអ្នកគាំទ្រនៅពីក្រោយជានិច្ច”។
៤) Marcus Rashford
ឥតខុសពី Foden សម្រាប់កីឡាករវ័យ ២៥ ឆ្នាំ ក៏ស្ម័គ្រស្មោះតែក្លឹបអាជីពមួយគត់ តាំងពីដើមមក ហើយវាក៏ជាឈុតដែលគេតែងតែបំពាក់លើដងខ្លួន តាំងពីនៅអាយុល្បាក់ជាង ១០ ឆ្នាំ នោះគឺបិសាចក្រហម Manchester United។
Rashford ធ្លាប់បាននិយាយថា៖ “ខ្ញុំមានតែគោលដៅមួយគត់ក្នុងជីវិត គឺការដែលអាចក្លាយជាកីឡាករអាជីព ហើយសង្ឃឹមបានលេងនៅ Man Utd”។ ក្រឡេកមកទល់បច្ចុប្បន្ននេះ គឺគេសម្រេចវាបានហើយ ក៏ត្រៀមនឹងក្លាយជាកីឡាករស៊ីថ្លៃខ្ពស់បំផុតប្រចាំទឹកដី Old Trafford បន្ទាប់ក្លាយជាចំណែកឥតខ្វះបាន ក្រោមការដឹកនាំរបស់លោក Erik ten Hag។
៣) Raphinha
បដិសេធការផ្លាស់ទៅក្លឹបយក្ស Chelsea ហើយស៊ូមកលំបាក នៅគ្រាដែល Barcelona កំពុងមានវិបត្តិហិរញ្ញវត្ថុ នោះក៏ដោយសារតែចិត្តស្រលាញ់ និងការចង់ប៉ះក្តីស្រមៃក្នុងជីវិតតែមួយគត់។ ខ្សែប្រយុទ្ធស្លាបសញ្ជាតិប្រេស៊ីល ធ្លាប់រកបានគ្រាប់បាល់ទល់ Real Madrid កន្លងមក លើកឡើងថា៖ “មកលេងឲ្យ Barcelona ជាសុបិន្តតាំងពីនៅក្មេងវ័យ ក៏ជាការចង់បានរបស់គ្រួសារ របស់មិត្តភក្តិជាទីស្រលាញ់ ខ្ញុំប្តេជ្ញានឹងជួយក្លឹបវិលទៅរជ្ជកាលជោគជ័យសារជាថ្មី”។
២) Trent Alexander-Arnold
“ពេលខ្ញុំធំធាត់ឡើង តែងតែគិតថាចង់លេងឲ្យ Liverpool ឥឡូវនេះ ខ្ញុំកំពុងរស់នៅក្នុងក្តីស្រមៃ ហើយក៏មើលមិនឃើញពីការផ្លាស់ប្តូរនោះដែរ” – នេះជាលើកឡើងរបស់ខ្សែការពារស្លាប ពោរពេញដោយបច្ចេកទេសក្រុសបាល់ សញ្ជាតិអង់គ្លេស។ តែយ៉ាងណាមានរឿងមួយ ដែលគេមិនអាចសម្រេចបាន នោះគឺការរួមទីលានជាមួយវីរបុរស Steven Gerrard ដ្បិតសព្វថ្ងៃលោកបានក្លាយជាអ្នកចាត់ការបាត់ទៅហើយ។
១) Harry Kane
ធ្លាប់ឃើញ Kane ពាក់អាវ Arsenal កាលនៅតូច តែបន្ទាប់នោះ វាបានក្លាយជាក្លឹបដែល Kane ស្អប់បំផុតទៅវិញ ដ្បិតកាំភ្លើ.ងធំ បានបដិសេធមិនទទួលយកគេ ក្រោមហេតុផលលើសទម្ងន់។ ក្រោយៗមក កីឡាករអង់គ្លេសបានដាក់ចិត្តស្រលាញ់ក្លឹបនៅក្បែរផ្ទះបំផុត នោះគឺមាន់ខ្នាយមាស Tottenham Hotspur ហើយស្ម័គ្រស្មោះ ឈរជើងនៅក្លឹបជាង ១០ ឆ្នាំមកទល់សព្វថ្ងៃ បើទោះបីពុំទាន់បានឈ្នះពានរង្វាន់ណាមួយក៏ដោយ៕
ប្រភព៖ បរទេស
