ការប្រកួតបាល់ទាត់នៅលីគកំពូលអឺរ៉ុបបានត្រលប់មកវិញជាថ្មី ដូចកាលពីយប់មិញ បានផ្សាយបន្តផ្ទាល់ជំនួបពិសេសជាច្រើនគូ រង្គើទំព័រ CTS Sports ហើយយប់នេះក៏នឹងមានជិត ១០ គូផ្សេងទៀត តែ ៣ គូធំៗ បងប្អូនមិនគួររំលង ដូច Real Madrid-Real Valladolid, Newcastle ទល់ Manchester United និង PSG ទល់ Lyon ម្ល៉េះក៏កុំភ្លេចចុច Follow ផេកនេះម្នាក់មួយឲ្យហើយទៅ ដើម្បីទទួលបានការទស្សនាយ៉ាងឆាប់រហ័ស។
រំឭកទៅយប់មិញ នៅថ្ងៃទី Liverpool ខែ Man City ដល់តែមកថ្ងៃនេះ ជាថ្ងៃ Dortmund ខែ Bayern ហ្នឹងហើយ គឺកើតចំនួនគ្រាប់បាល់ ចំថ្ងៃបើកក្បាលទំព័រខែថ្មី ខែទី ៤ ប្រចាំឆ្នាំ ក៏នាំឲ្យកើតមានរឿងជជែក កើតជាភាពអស់សំណើចពាសពេញបណ្តាញសង្គម។ តស់យើងទៅសង្ខេបលទ្ធផលគួរឲ្យចាប់អារម្មណ៍មួយចំនួន ដែលមានលេខ ៤ គ្រប់កន្លែង ទូទាំងលីគកំពូលអឺរ៉ុប៖
+ក្របខ័ណ្ឌ Premier League
ចាប់អារម្មណ៍តាំងពីក្បាលល្ងាច ក្រោយបញ្ចប់ ៩០ នាទី ដែលម្ចាស់ដី Etihad បានយកឈ្នះចាស់ដៃទៅលើក្លឹបភ្ញៀវ Liverpool ៤-១ ដល់ហើយរំលងបន្ទាប់នោះ Arsenal មិនសុខចិត្ត ក៏បង្កើតលទ្ធផលដដែលដូចគ្នានឹង City ទៅលើក្លឹប Leeds United ជាគូប្រជែង។
បរាជ័យ ១-៤ ចំថ្ងៃទី ០១ ខែ ០៤ ដែលទំព័រធំៗជាច្រើន ហៅថ្ងៃនោះជាថ្ងៃរបស់ Liverpool និង Leeds តែក៏មិនអាចមើលរំលងបរាជ័យ Chelsea បានដែរ ក្រោយចាញ់ ០-២ ក្រោមថ្វីជើង Aston Villa រួចថ្ងៃនេះ ក៏ចូលថ្ងៃទី ០២ ចំល្អថែមទៀត។
ចំណាំ៖ ប្រាប់បងប្អូនយើងមួយសិនណា កុំបូកលទ្ធផល City-Liverpool និង Arsenal-Leeds ឲ្យសោះ ព្រោះបូកហើយ ប្រាកដនឹងនឹកដល់រឿងចាស់មិនខាន។
+ក្របខ័ណ្ឌ La Liga
មិនត្រឹមតែនៅលីគកំពូលអង់គ្លេស ធ្លាយមកដល់លីគប្រទេសអេស្ប៉ាញ ក៏កើតមាន ៤ គ្រាប់ចំបើកទំព័រខែមេសាផងដែរ។ នោះគឺការយកឈ្នះរបស់ Barcelona ៤-០ ទៅលើ Elche។ រំឭកឲ្យគ្នាយើងបានដឹង សម្រាប់អ្នកមានបុណ្យក្រោមការដឹកនាំរបស់អ្នកចាត់ការ Xavi Hernandez ក៏ត្រៀមនឹងចូលដល់ប្រកួតសំខាន់ ទល់ Real Madrid ជើងទី ២ វគ្គ ៤ ក្រុម ពានរង្វាន់ Copa del Rey បន្ទាប់ជើងមុនយកឈ្នះ ១-០។
+ក្របខ័ណ្ឌ Bundesliga
ក្រោមការដឹកនាំរបស់អ្នកចាត់ការថ្មី លោក Thomas Tuchel ក៏បានបង្កើតលទ្ធផលគួរឲ្យចាប់អារម្មណ៍ភ្លែត នៅប្រកួតដំបូងទល់អតីតក្លឹបចាស់ខ្លួនឯងគឺ Borussia Dortmund។ ម្ចាស់ដីយកឈ្នះភ្ញៀវ ៤-២ នាំឲ្យអ្នកគាំទ្រយកលទ្ធផលនោះ មករៀបជាកាលបរិច្ឆេទថ្ងៃនេះ ដោយហៅថា ថ្ងៃទី Dortmund ខែ Bayern Munich។
+ក្របខ័ណ្ឌ Eredivisie
នៅលីគកំពូលហូឡង់ឯណោះ គឺចំកាលបរិច្ឆេទផ្ទាល់តែម្តង បន្ទាប់តែចប់ការប្រកួតរវាង NEC Nijmegen ទល់ PSV Eindhoven ដោយខាង PSV បានយកឈ្នះ ៤-២ ទៅលើម្ចាស់ទឹកដី។ បញ្ចប់ ៩០ នាទីលើទីលាន វាក៏ចំកាលបរិច្ឆេទថ្ងៃទី ០២ ខែ ០៤ កើតជាភាពចៃដន្យដូចគ្នាថែមទៀត។
ចុះចាំមើលយប់នេះវិញ តើ Real Madrid, Man Utd, AC Milan និង PSG ជាដើម អាចបង្កើតលទ្ធផលគួរឲ្យភ្ញាក់ផ្អើលអ្វីដែរទេ ឬក៏ត្រូវខាងគូប្រជែងហូបចុកសម្រុកគ្រាប់បាល់វិញ?