ខ្សែប្រយុទ្ធ Cristiano Ronaldo បានបង្ហាញឡានទំនើបចុងក្រោយបំផុតរបស់ខ្លួន Bugatti Centodieci ហើយកាលពីយប់មិញនេះ ដែលជាឡានតម្លៃ១១លានដុល្លារ និងមានតែ១០គ្រឿងគត់នៅលើលោកនេះ។
Ronaldo កំពុងស្ថិតនៅក្រុងម៉ាឌ្រីតប្រទេសអេស្ប៉ាញ ជាមួយមិត្តស្រីរបស់ខ្លួន Georgina Rodríguez ។ ការទៅញ៉ាំអាហារពេលល្ងាចនោះដែរ រូបគេក៏បានជិះឡានទំនើបទើបនឹងនាំចូលបាន Bugatti Centodieci ដែលធ្វើឱ្យអ្នកគាំទ្រចាប់អារម្មណ៍គ្រប់គ្នា។ នេះជាឡានកម្រ និងផលិតត្រឹមតែ១០គ្រឿងប៉ុណ្ណោះលើលោកនេះ ជាមួយការកុម្មង់ទិញមុនជាច្រើនឆ្នាំមកហើយ។ តម្លៃរបស់ឡាន Bugatti Centodieci នេះ គឺប្រមាណជា១១លានដុល្លារក្នុងមួយគ្រឿង។ Ronaldo បានកុម្មង់វា២ឆ្នាំមកហើយ ទើបតែគេផលិតបាននិងយកមកឱ្យប៉ុណ្ណោះ។
កីឡាករវ័យ៣៨ឆ្នាំនេះខាងលើគឺជាហ្វេនរបស់ Bugatti តែម្ដង។ នាពេលនេះ Ronaldo មានឡាន Bugatti រហូតដល់ទៅ៣គ្រឿងទៅហើយ ដោយក្នុងមួយគ្រឿងមានតម្លៃ ១,៥លានដុល្លារ ២លានដុល្លារ និងចុងក្រោយនេះ១១លានដុល្លារ។ សរុបឡានទាំងអស់របស់ម្ចាស់ពាន Ballon dÓr ៥សម័យកាលនេះ ចាយប្រាក់មិនក្រោម២០លានដុល្លារនោះទេ៕
