សហព័ន្ធបាល់ទាត់ FIFA បានប្រកាសជាផ្លូវការដកសិទ្ធិប្រទេសឥណ្ឌូណេស៊ី មិនឱ្យធ្វើម្ចាស់ផ្ទះព្រឹត្តិការណ៍ FIFA U20 World Cup នៅឆ្នាំ២០២៣នេះនោះទេ។
មានរឿងរ៉ាវមួយចំនួនបានកើតឡើងនៅប្រទេសឥណ្ឌូណេស៊ីទាក់ទងនឹងការធ្វើម្ចាស់ផ្ទះ FIFA U20 World Cup នេះ។ ជាក់ស្ដែងកោះបាលី បានបដិសេធមិនព្រមទទួលក្រុមភ្ញៀវអ៊ីស្រាអែលនោះទេក្នុងការប្រកួតនេះ ហើយរឿងនេះកើតចេញពីបញ្ហាសាសនាផងដែរ។ ការប្រកែកមិនព្រមនេះហើយ ទើបបានជាមានរឿងកើតឡើង រហូតដល់ FIFA ដកសិទ្ធិជាម្ចាស់ផ្ទះចេញ ហើយអាចនឹងបន្ថែមការពិន័យទៅទៀតចំពោះប្រទេសឥណ្ឌូណេស៊ីនេះ។
ក្នុងលិខិតដែល FIFA ចេញ បញ្ជាក់ច្បាស់ថា៖ “FIFA បានសម្រេចចិត្ត ដើម្បីដកប្រទេសឥណ្ឌូណេស៊ីធ្វើជាម្ចាស់ផ្ទះនៃការប្រកួត U-20 World Cup 2023។ ម្ចាស់ផ្ទះថ្មីនឹងត្រូវបានប្រកាសឱ្យបានឆាប់តាមដែលអាចធ្វើទៅបាន ដោយកាលបរិច្ឆេទនៃការប្រកួតបច្ចុប្បន្ននៅមិនផ្លាស់ប្តូរ។ ការដាក់ទណ្ឌកម្មក៏អាចត្រូវបានសម្រេចនៅដំណាក់កាលក្រោយ”។
រំលឹកថា FIFA U20 World Cup 2023 នឹងត្រូវចាប់ផ្ដើមប្រកួតនៅខែឧសភាឆ្នាំ២០២៣ខាងមុខនេះហើយ។ ក្រុមដែលនឹងចូលរួមមានចំនួន២៤ប្រទេស ចេញពី៦ទ្វីបផ្សេងគ្នា ធ្វើការប្រកួតពីថ្ងៃទី ២០ខែឧសភា រហូតដល់ថ្ងៃទី១១ខែមិថុនាឆ្នាំ២០២៣៕