បាល់ទាត់នៅលីគកំពូលអឺរ៉ុបត្រៀមចូលកងវិញហើយ បន្ទាប់តែស្បើយកម្លាំងដល់កីឡាករមួយចំនួន ដែលមិនជាប់ភារកិច្ចនៅជម្រើសជាតិ នាកំឡុង International Break រយៈពេលជាង ២ សប្ដាហ៍។
យ៉ាងណាបើយើងងាកទៅចំណែកសកម្ម ឥតខ្វះបានរបស់ជម្រើសជាតិធំៗ ដូចព័រទុយហ្គាល់ អាហ្សង់ទីន អេស្ប៉ាញ និងអង់គ្លេសជាដើម ក៏កីឡាករពុំមានពេលសម្រាកនោះដែរ តែបែរត្រូវមកជួយក្រុម ដល់កើតកំណត់ត្រាជាហូរហែ ជាក់ស្តែងដូច GOAT ចាស់វស្សាទាំងពីរ មាន Lionel Messi និង Cristiano Ronaldo។
CTS Sports ធ្វើការចែករំលែកឲ្យដឹងនូវកំណត់ត្រាថ្មីៗរបស់កីឡាករវ័យចំណាស់នៅប៉ែកអឺរ៉ុប និងអាមេរិកឡាទីន ដែលទើបតែសម្រេចបាន មុនការវិលត្រលប់ទៅក្លឹបនៅដើមខែមេសាខាងមុខ៖
ជាការពិតក្រោមការដឹកនាំរបស់អ្នកចាត់ការថ្មី លោក Roberto Martinez សម្រាប់ខ្សែប្រយុទ្ធវ័យ ៣៨ ឆ្នាំ នៅតែទទួលបានឱកាសដដែល ហើយ ២ ប្រកួតកន្លងទៅ ទល់ជម្រើសជាតិលិចតិនស្តាញ និងលុចហ្សំបួរ សុទ្ធសឹងបានជាប់ជម្រើសដំបូង ហើយក៏រកបានគ្រាប់បាល់ផងដែរ។
កីឡាកររបស់ក្លឹប Al Nassr រកបាន ២ គ្រាប់ស្មើគ្នា នៅប្រកួតទាំងពីរខាងលើ រាប់ជាចំណែកធំ ជួយបញ្ចខែលក្រហមព័រទុយហ្គាល់យកបាន ៦ ពិន្ទុពេញ នៅវគ្គជម្រុះបឋម Euro 2024។ បើរាប់គ្រាប់បាល់ គឺ CR7 បានបំបែកកំណត់ត្រាខ្លួនឯងជាបន្តបន្ទាប់ តែនិយាយដល់កំណត់ត្រាថ្មីសន្លាង នោះគឺក្លាយជាកីឡាករបង្ហាញខ្លួនច្រើនបំផុតឲ្យជម្រើសជាតិ បំបែកតួលេខចាស់ ១៩៦ ប្រកួត របស់កីឡាករគុយវ៉ែត Bader Al-Mutawa ដ្បិតពេលនេះ កីឡាករព័រទុយហ្គាល់ ឈានដល់តួលេខទី ១៩៨។
ជាងនេះ Ronaldo ក៏បានក្លាយជាកីឡាករ តំណាងឲ្យជម្រើសជាតិដំបូង អាចរកបានគ្រាប់បាល់ក្នុងរយៈពេល ២០ ឆ្នាំជាប់ៗគ្នា ពោលរាប់តាំង ២០០៤ កាលនោះគ្រាប់បាល់បើកឆាក ទល់ក្រិច តែក្រុមទទួលរងបរាជ័យ។
និយាយអំពី Messi វិញ ក៏ឆ្លងកាត់ ២ ប្រកួត ជាមួយជម្រើសជាតិផងដែរ នៅកំឡុង International Break តែវាជាប្រកួតមិត្តភាព ដ្បិត Copa America 2024 ពុំមានវគ្គជម្រុះបឋម ដូចព្រឹត្តិការណ៍ Euro។ ឥតខុសពី Ronaldo ក្រៅតែរកបានគ្រាប់បាល់ Free-Kick ដូចគ្នា បើបូកជារួមក៏ធ្វើបានចំនួន ៤ គ្រាប់ នៅ ២ ប្រកួតទល់ប៉ាណាម៉ា និងគូរ៉ាកាវផងដែរ។ តែអ្វីដែលគួរឲ្យចាប់អារម្មណ៍ គឺលទ្ធផល ៧-០ ដែលទើបកើតឡើងនៅព្រឹកមិញនេះ ហាក់កំពុងធ្វើឲ្យអ្នកគាំទ្របាល់ទាត់នៅ Premier League នឹកដល់រឿងចាស់ជាក់ជាមិនខាន។
កំណត់ត្រាគួរឲ្យចាប់អារម្មណ៍តែមួយគត់ សម្រាប់សមាជិកក្លឹប PSG ដែលទើបបំបែកបាននៅព្រឹកនេះ គឺការចារតួលេខថ្មី គ្រាប់បាល់ទី ១០០ នៅជម្រើសជាតិអាហ្សង់ទីន បន្ទាប់ការស៊ុតមួយគ្រាប់ដំបូងទល់គូរ៉ាកាវ។ តែដល់ចប់ ៩០ នាទី គឺសរុបចូលដល់គ្រាប់បាល់ទី ១០២ និង Assist ៥៦ នៅ ១៧៤ ប្រកួតសរុប។
រំឭកអំពីកាលបរិច្ឆេទវិលត្រលប់ទៅក្លឹបរបស់ GOAT ទាំងពីរ សម្រាប់ Ronaldo មានការប្រកួតនៅ Saudi Pro League រវាង Al-Adalah ទល់ Al -Nassr នាវេលាម៉ោង ០២:០០ នាទីទាបភ្លឺ ថ្ងៃទី ០៥ មេសា ខណៈ Messi វិលទៅមុននោះ ដោយ PSG ត្រូវបើកកីឡដ្ឋានស្វាគមន៍ក្លឹប Lyon នាវេលាម៉ោង ០១:៤៥ នាទីទាបភ្លឺ ថ្ងៃទី ០៣ មេសា សុទ្ធសឹងមានការផ្សាយបន្តផ្ទាល់លើទំព័រ CTS Sports៕
ប្រភព៖ បរទេស
