បងប្អូនយើងអ្នកនិយមស្នេហាកីឡាបាល់ទាត់ តាមបណ្តាតារាងធំតូច សង្កេតឃើញមួយផ្នែកក្រោយចប់ការប្រកួត ច្រើនជុំគ្នាដាក់មួយយួរពីយួរ ខ្លះក៏បបួលគ្នាទៅហូបសាច់អាំង ឬអាហារទៅតាមចំណង់ដែលចូលចិត្ត។
អ្នកធ្លាប់ឆ្ងល់ដែរទេ ចុះសម្រាប់កីឡាករអាជីពកំពូលៗនៅតំបន់អឺរ៉ុបវិញ ដែលជាមធ្យមយ៉ាងហោចណាស់ក៏ ១ ប្រកួតក្នុងមួយសប្តាហ៍ ខ្លះលោតដល់ ២ ទៅ ៣ តើបន្ទាប់ចប់ភារកិច្ចលើទីលាន ពួកគេនិយមទទួលទានអ្វីទៅ ហើយជារបស់ប៉ូវដល់កម្រិតណាដែរ? ក្នុងអត្ថបទនេះ CTS Sports សូមច្បិចលើកមកបង្ហាញនូវទម្លាប់របស់តារាឆ្នើមសញ្ជាតិអង់គ្លេស និងព័រទុយហ្គាល់៖
១) របបអាហារក្រោយចប់ការប្រកួតរបស់ Jack Grealish
សព្វថ្ងៃនៅបន្តជាប់ឈ្មោះជាកីឡាករអង់គ្លេសមានតម្លៃផ្ទេរខ្ពស់បំផុត មិនទាន់មាននរណាបំបែកបាន ហើយកំពុងសម្ងំកើបប្រាក់រាប់សិបលាន ទាំងប្រាក់ឈ្នួលទទួលបានពីក្លឹប ក៏ដូចជាប្រាក់ឧបត្ថម្ភពី Sponsor នានា។
ថ្មីៗកន្លងទៅនេះ ខ្សែប្រយុទ្ធស្លាបរបស់ក្លឹប Man City ក៏បានទម្លាយតាមរយៈវីដេអូបង្ហោះចែកចាយលើ TikTok ថាគេជាអ្នកដែលនិយមទទួលទានអាហារបែបចិន ហើយតែងទម្លាប់ទៅកុម្ម៉ង់យកមកបរិភោគជាប្រចាំ បន្ទាប់ចប់ការងារលើទីលាន។
Grealish រៀបរាប់ថា៖ “ខ្ញុំចូលចិត្តអាហារបែបចិន ហើយតែងតែទទួលទានវាក្រោយចប់ការប្រកួតនីមួយៗ ដោយខ្ញុំតែងទៅកុម្ម៉ង់នៅអាហារដ្ឋាន Wings’ ក្នុងទីក្រុង Manchester ដោយមានដូចជាមីឆាសិង្ហបុរី បាយឆាពងទា ដំឡូងបំពងហិលប្រៃ បង្គាអំបិលម្រេច រួចមកស្រោចទឹកជ្រលក់ការី”។
បើតាមការចុះផ្សាយរបស់សារព័ត៌មាន SportBible បានវាយតម្លៃខ្ទង់ចំណាយលើអាហារអស់នោះ ដែលចូលប្រហែលជិត ៦៩ ដុល្លារ ឬជាង ២៨០ ០០០ រៀល តែវាមិនជាបញ្ហាចោទសម្រាប់ Grealish ឡើយ ដ្បិតប្រាក់ឈ្នួលរកបានពី City មួយសប្តាហ៍ចូលជិត ៣៧ មុឺនដុល្លារឯណោះ។
២) របបអាហារក្រោយចប់ការប្រកួតរបស់ Cristiano Ronaldo
ដោយឡែកសម្រាប់ CR7 ជាអត្តពលិកមានកាយសម្បទារឹងមាំ រាងកាយក្មេងមិនសមអាយុចាស់ ក្រឡេកទៅចំណង់លើអាហារហូបចុកក្រោយចប់ការប្រកួត មើលទៅរាងល្អជាង Grealish បន្តិច ដ្បិតមានដូចជាភីហ្សាមួយចំណិត ផ្លែឈើមួយផ្នែកធំ និងអាហារសម្រន់ផ្សេងទៀត ដែលសម្បូរទៅដោយកាបូអ៊ីដ្រាត។ នេះបើតាមសារព័ត៌មាន AS បានចុះផ្សាយ។
ប្រភពបានឲ្យដឹងថា ចំពោះភីហ្សាដែល Ronaldo ទទួលទាន គឺវាមិនជាប៉ះពាល់អ្វីខ្លាំងនោះទេ ផ្ទុយទៅវិញ គឺរាប់ជាអាហារដែលងាយនឹងផ្តល់ថាមពល ប្រូតេអ៊ីនត្រលប់មករាងកាយវិញ ចំណែកឯអាហារសម្រន់សម្បូរទៅដោយកាបូអ៊ីដ្រាត រួមមានទឹកដោះគោជូរ ម្សៅស្រូវសាលី និងនំចំណីតូចៗ មានផ្ទុកជាតិសរសៃ ប្រូតេអ៊ីន និងសារធាតុចិញ្ចឹមជាដើម៕
ប្រភព៖ បរទេស
