ជាអ្នកចាត់ការកំពូលដែលមានវ័យក្មេងបង្អស់ ចុះឡើងបែរកើតដំណឹងភ្ញាក់ផ្អើល បន្ទាប់តែក្លឹប Bayern Munich ប្រកាសដកតំណែង ឥតមានការគ្រោងទុកកាលពីថ្ងៃទី ២៤ មិនា ឆ្នាំ ២០២៣ កំឡុង International Break ជាពេលវេលាដែលក្លឹបបាល់ទាត់ត្រូវដកឃ្លាពីការប្រកួតលើទីលាន។
នេះក៏បន្ទាប់តែលទ្ធផលចាប់ឆ្នោតវគ្គ ៨ ក្រុមចុងក្រោយ Champions League ទើបប្រកាសផ្លូវការមុននោះប៉ុន្មានថ្ងៃ កំណត់ហើយស្រេចថាត្រូវប៉ះ Man City នាពាក់កណ្តាលខែក្រោយ តែឥឡូវបែរត្រូវអស់តំណែង ដ្បិតបើស្ថិតិដឹកនាំក្លឹបនៅពានអឺរ៉ុប រដូវកាលនេះ មានអត្រាឈ្នះ ១០០ ភាគរយក៏ពិតមែន។
ចាប់តាំងពីវគ្គចែកពូល មកទល់វគ្គ ១៦ ក្រុម ឆ្លងផុតអស់ហើយ មិនថាតែគីឡូធ្ងន់ Barcelona, Inter Milan ឬសូម្បីតែក្លឹបសេដ្ឋី Paris Saint-Germain សរុប ៨ ប្រកួត ក្រោមការដឹកនាំរបស់ Nagelsmann បានឈ្នះទាំង ៨ ប្រកួត។ ចុះសួរថា ហេតុអ្វីបានជាសុខៗក្លឹបស្ថិតក្នុងទីក្រុង Munich ប្រកាសដកតំណែងគ្រូវ័យ ៣៥ ឆ្នាំ ផុយៗដូចដកស្ពៃយ៉ាងដូច្នោះ?
បើតាមការឲ្យដឹងពីកាសែត Sky Sports នៅឯប្រទេសអាល្លឺម៉ង់ ចុះផ្សាយថា Nagelsmann បានដើរខុសគោលការណ៍ ៣ ចំណុច ទើបជាហេតុនាំឲ្យថ្នាក់ដឹកនាំក្លឹប Bayern ឈានដល់ការសម្រេចចិត្តបញ្ចប់កុងត្រាមុនកាលកំណត់។
ទី ១) គឺការធ្លាក់ចុះទម្រង់លេងនៅក្របខ័ណ្ឌ Bundesliga ដោយជាការពិត យើងពុំបានមើលឃើញចំណុចវិជ្ជមានកើតឡើងនោះទេ ផ្ទុយទៅវិញ មានតែការថមថយចាប់តាំងចប់ការប្រកួត World Cup។ ជាក់ស្តែងមកទល់ជុំទី ២៥ នៅក្របខ័ណ្ឌកំពូលអាល្លឺម៉ង់ Bayern បែរជាភ្លាត់ ដល់ធ្លាក់មកឈរចំណាត់ថ្នាក់ទី ២ ចាញ់ Borussia Dortmund ចំនួន ១ ពិន្ទុ នេះវាខុសពីរដូវកាលៗមុន ត្រឹមជុំប៉ុណ្ណេះ ក្លឹបនាំមុខដាច់ពិន្ទុបាត់ទៅហើយ។
ទី ២) គឺកង្វះខាតភាពជាអ្នកដឹកនាំ ខ្វះយុទ្ធវិធីលើការចរចានាំចូលកីឡាករកំពូល។ យើងបានមើលឃើញហើយ Bayern ពេលចុងក្រោយ ហាក់ខ្វះកីឡាករមានទេពកោសល្យ រួចគុណភាពកីឡាករដែលមានស្រាប់ មើលទៅក៏មិនមានអ្វីដែលល្អប្រសើរឡើងនោះដែរ។ ធំបំផុតជុំវិញស្ថានភាពលើទីផ្សារដោះដូរ ក្រោមការដឹកនាំរបស់ Nagelsmann កន្លងមក ហាក់មិនបានសាយភាយឥទ្ធិពលអូសទាញចិត្ត កីឡាករគោលដៅកំពូលណាមួយបាន។
ទី ៣) គឺការខ្វះឆន្ទៈ ស្រោចស្រង់ស្ថានការណ៍ត្រលប់មកវិញ។ នេះជាហេតុផលធំបំផុត ជាក់ស្តែងដូចបរាជ័យក្រោមថ្វីជើង Bayer Leverkusen ២-១ នាថ្ងៃទី ១៩ មិនា ស្រាប់តែរំលងទៅថ្ងៃបន្ទាប់ គ្រូវ័យក្មេងខាងលើ បែរយកពេលទៅលំហែកាយ ជិះស្គីទឹកកកនៅប្រទេសអូទ្រីសទៅវិញ ដោយវាខុសពីការចង់បានរបស់ក្លឹប គឺទាមទារអ្នកចាត់ការដែលមានឆន្ទៈ មានច្បាប់វិន័យ ហើយតាមស្ថានការណ៍ជួបប្រទះ គួរណាតែមករិះរកវិធីពង្រឹងក្រុម ជួបប្រជុំជាមួយកីឡាករដើម្បីរកចន្លោះប្រហោង មិនគួរធ្វើមិនអើពើបែបហ្នឹងឡើយ។
រំឭកឲ្យបងប្អូនយើងបានដឹងបន្តិច ជុំវិញការចំណាយលើប្រាក់ផ្តាច់កុងត្រា Nagelsmann មុនកាលកំណត់ គឺក្លឹបបានចេញលុយពីហោប៉ៅ ទូទាត់លើប្រាក់ឈ្នួលសេសសល់រយៈពេល ២ ឆ្នាំកន្លះពេញថ្លៃ ដ្បិតអីតាមសុពលភាពត្រូវផុតនៅឆ្នាំ ២០២៦ ឯណោះ។ មួយឆ្នាំក្លឹបត្រូវចាយ ៨ លានអឺរ៉ូ មានន័យថា សល់ ២ ឆ្នាំកន្លះ ទោះមិនបានប្រើប្រាស់ Nagelsmann ក៏តម្រូវឲ្យចាយពេញថ្លៃ ចូលល្បាក់ ២០ លានអឺរ៉ូ រួចបើសរុបទាំងគ្រាថ្ពក់ចេញពី RB Leipzig ផង គឺចូល ៦៥ លានអឺរ៉ូ បូកទាំងប្រាក់ឈ្នួល៕
ប្រភព៖ បរទេស