ការប្រកួតវគ្គជម្រុះបឋមនៃពានរង្វាន់ Euro 2024 នឹងចាប់ផ្ដើមហើយនៅរាត្រីនេះ គូពិសសគឺអង់គ្លេស នឹងធ្វើដំណើរទៅអ៊ីតាលីនៅវេលាម៉ោង២:៤៥នាទីរំលងអាធ្រាត្រ។
នេះជាការប្រកួតដំបូងរបស់អង់គ្លេសផងដែរ ចាប់តាំងពីពួកគេបញ្ចប់បេសកកម្មនៅពានរង្វាន់ FIFA World Cup 2022 ត្រឹមវគ្គ៨ក្រុមចុងក្រោយ ដោយចាញ់បារាំង។ មួយវិញទៀត ការប៉ះអ៊ីតាលីនេះដែរ ក៏អាចនិយាយថាជាជំនួបសងសឹកវិញផងដែរ ព្រោះអ៊ីតាលីនេះហើយដែលយកឈ្នះអង់គ្លេសនៅវគ្គផ្ដាច់ព្រ័ត្រពានរង្វាន់ Euro 2020 កន្លងទៅដោយការទាត់ប៉េណាល់ទី។ ប្រសិនបើអង់គ្លេសធ្វើបានល្អនៅរាត្រីនេះ អាចយកឈ្នះអ៊ីតាលីបាន នោះវាជាលើកដំបូងសម្រាប់តោកំណាចមួយនេះហើយដែលឈ្នះនៅទឹកដីអ៊ីតាលីតាំងពីឆ្នាំ១៩៦១មក។
លោក Gareth Southgate បាននិយាយថា៖ “យើងមិនដែលឈ្នះទេនៅអ៊ីតាលីតាំងពីឆ្នាំ១៩៦១មក ហើយនៅមានកំណត់ត្រាប្រវត្តិសាស្ត្រផ្សេងៗដែលយើងត្រូវតែបំបែកផងដែរ។ យើងមិនត្រូវការអ្វីមកបញ្ជាក់នោះទេ ព្រោះកីឡាកររបស់យើងសុទ្ធតែមានបទពិសោធក្នុងការប្រកួតធំៗជាច្រើន។ ពួកគេដឹងច្បាស់ថាពួកគេនឹងត្រូវប្រកួតក្នុងកម្រិតខ្ពស់បំផុតមួយ”៕