បញ្ហារបួសកើតមានជាញឹកញាប់ បានធ្វើឱ្យខ្សែបម្រើ Mesut Ozil សម្រេចចិត្តប្រកាសពីការចូលនិវត្តន៍របស់ខ្លួនហើយពីវិស័យបាល់ទាត់ ក្រោយចំណាយពេល១៧ឆ្នាំនៅលើទីលាន។
Ozil ល្បីឈ្មោះខ្លាំង អំឡុងពេលគេលេងឱ្យក្រុម Real Madrid និងបានជួយជម្រើសជាតិអាល្លឺម៉ង់លើកពាន FIFA World Cup 2014 នៅប្រទេសប្រេស៊ីល។ គេបានឈ្នះពានជាច្រើននៅក្លឹបអាជីព និងបានបង្ហាញខ្លួនឱ្យជម្រើសជាតិអាល្លឺម៉ង់បានដល់ទៅ៩២ដង។ ត្បិតតែមានការរិះគន់ និងមើលងាយមកលើរូបគេខ្លះនៅពេលចុងក្រោយនេះ ប៉ុន្តែកីឡាករវ័យ៣៤ឆ្នាំនៅតែត្រូវបានគេទទួលស្គាល់ពីសមត្ថភាពជាខ្សែបម្រើកម្រិតកំពូលដដែល។
Ozil បានប្រកាសពីការចូលនិវត្តន៍របស់ខ្លួនថា៖ “ខ្ញុំពិតជាមានកិត្តិយសដែលទទួលបានឱកាសលេងជាកីឡាករអាជីព១៧ឆ្នាំមកនេះ។ ខ្ញុំពិតជាអរគុណដល់ឱកាសដ៏ល្អមួយនេះណាស់។ ប៉ុន្តែនៅមួយរយៈចុងក្រោយនេះ បញ្ហារបួសតែងតែកើតមានឡើងជានិច្ចសម្រាប់ខ្ញុំ ដែលវាបានបង្ហាញឱ្យខ្ញុំដឹងថាពេលវេលាមកដល់ហើយក្នុងការបញ្ចប់អាជីពបាល់ទាត់នេះ”៕