នៅវេលាព្រឹកថ្ងៃទី ២១ ខែមីនា ឆ្នាំ ២០២៣ ព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ព្រះអង្គសព្វព្រះរាជហឫទ័យស្តេចយាងជាព្រះរាជាធិបតីដ៏ខ្ពង់ខ្ពស់បំផុត ក្នុងព្រះរាជពិធីប្រោសព្រះរាជទានព្រះអគ្គិជ័យកីឡា និងពិធីរត់ភ្លើងគប់កីឡា សម្រាប់ព្រឹត្តិការណ៍ប្រកួតកីឡាអាស៊ីអាគ្នេយ៍លើកទី៣២ និងកីឡាអាស៊ានប៉ារ៉ាហ្គេមលើកទី១២ ឆ្នាំ២០២៣ នៅប្រាសាទអង្គរវត្ត ខេត្តសៀមរាប។
ឯកឧត្តម វ៉ាត់ ចំរើន អគ្គលេខាធិការនៃគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ (CAMSOC) និងជាអគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) ក៏បានបកស្រាយខ្លះៗទាក់ទងទៅនឹងព្រះអគ្គិជ័យកីឡាដែលនឹងត្រូវដង្ហែរទៅកាន់បណ្ដាប្រទេសនៅតំបន់អាស៊ានផងដែរ។ ឯកឧត្តម បន្ដថាព្រះអគ្គិកីឡាជានិមិត្តរូប នៃការប្រកួតកីឡាជាអន្ដរជាតិ ដែលមានប្រវត្តិតាំងពីអូឡាំពិកសម័យបុរាណ នៅប្រទេសក្រិក ទាំងអូឡាំពិកសម័យបុរាណ ២០០០ឆ្នាំមុនគ្រិស្ដសករាជ និងការប្រកួតអូឡាំពិកសម័យទំនើប។ ការរៀបចំសុំភ្លើងអាទិទេពកីឡា ដើម្បីជានិមិត្តរូប នៃសេចក្ដីសុខ សេចក្ដីចំរើន និងជានិមិត្តរូបនៃថាមពលរបស់ជីវិតមនុស្ស នៅលើភពផែនដី ហើយក៏ដើម្បីគោលការណ៍ នៃចលនារួមក្នុងវិស័យកីឡា អូឡាំពិកផងដែរ។
អគ្គលេខាធិការនៃគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ (CAMSOC) បន្ថែមថា៖ “ភ្លើង ជានិមិត្តរូបមួយ ដែលបញ្ជាក់ថា ប្រជាជនមានថាមពល សក្ដានុពលកីឡា ឬគុណតម្លៃ អូឡាំពិក។ ភ្លើង ជានិមិត្តរូប នៃមិត្តភាព សាមគ្គីភាព និងនិមិត្តរូប នៃសុខសន្ដិភាព និងនិមិត្តរូបនៃសុភមង្គល របស់ប្រជាជន នៅលើភពផែនដីនេះ។ ដូច្នេះ គេ តែងយកភ្លើងទៅបើកក្នុងការប្រកួតព្រឹត្តិការណ៍ កីឡាធំៗ រហូត ទៅដល់ពិធីបិទ ទើបអាចភ្លើងនេះរលត់បាន”៕