លោក Patrick Vieira ត្រូវបានក្លឹប Crystal Palace បណ្ដេញចេញពីតំណែងអ្នកចាត់ការក្រុមហើយ បន្ទាប់ពីលោកដឹននាំក្រុមមិនទទួលបានលទ្ធផលល្អទាល់តែសោះ។
Crystal ទើបតែងតាំងលោក Vieira បាន១៨ខែប៉ុណ្ណោះ។ ដោយលោកចូលដឹកនាំក្រុមដំបូងឃើញថាទទួលបានលទ្ធផលល្អ តែក្រោយមកទៀតក៏កាន់តែយ៉ាប់ទៅៗតែម្ដង។ នៅឆ្នាំថ្មី ២០២៣នេះ ១២ប្រកួតចុងក្រោយរបស់ Crystal Palace មិនបានស្គាល់ពាក្យឈ្នះម្ដងនោះទេ។ តាមលទ្ធផលនេះដែរ ក្លឹបមួយនេះក៏ស្ថិតនៅលេខ១២ក្នុងតារាង Premier League ប៉ុន្តែបើតាមពិន្ទុវិញ ពួកគេផុតតំបន់កាត់ចោលត្រឹមតែ៣ពិន្ទុប៉ុណ្ណោះ ហើយលើសគេ១ប្រកួតទៀត។ ដោយសារតែកត្ដាប្រឈមធ្លាក់ទៅតំបន់កាត់ចោលនេះហើយ ទើបបានជាថ្នាក់ដឹកនាំក្លឹបសម្រេចចិត្តដកលោកចោលតែម្ដង។
Paddy McCarthy ដែលជាអតីតប្រធានក្រុម Crystal Palace នឹងចូលខ្លួនមកដឹកនាំក្រុមបន្ដបណ្ដោះអាសន្នសិនរហូតដល់ចប់រដូវកាល។ ប្រសិនបើលទ្ធផលឃើញថាបានល្អ នោះអាចនឹងមានការពិចារណាក្នុងការបន្ដផងដែរ៕